30 மாஜி வீரர்கள்
டினி, பிளான்டர், ஜிப்ஸ், ஆஷ்வெல் பிரின்ஸ், ஜேபி டுமினி, பால் ஆடம்ஸ் உள்ளிட்ட 30 வீரர்கள் இதுதொடர்பாக வெளியிட்டுள்ள அறிக்கை தென்னாப்பிரிக்காவில் புயலைக் கிளப்பியுள்ளது. அதில் அவர்கள் லுங்கி அங்கிடிக்கு முழு ஆதரவு தெரிவித்துள்ளனர். அவரைக் கண்டித்து அறிக்கை விட்ட பாட் சிம்காக்ஸ், போத்தா டிப்பென்னர், ரூடி ஸ்டெயின், பிரையன் மெக்மில்லன் ஆகியோருக்கு கண்டனமும் தெரிவித்துள்ளார்.
லுங்கி சொன்னது சரியே
இதுதொடர்பான அந்த அறிக்கையில், நாங்கள் லுங்கிக்கு ஆதரவு தெரிவிக்கிறோம். அவருடைய நிலைப்பாட்டை ஆதரிக்கிறோம். அவருக்கு முழு உறுதுணையாக இருக்கிறோம். லுங்கி மீதான விமர்சனத்தை நாங்கள் நிராகரிக்கிறோம். இதுகுறித்து தென்னாப்பிரிக்க கிரிக்கெட் வாரியம் கவனத்தில் கொள்ள வேண்டும். பாட் சிம்காக்ஸ் போன்றோர் கூறியுள்ள விமர்சனத்தின் மீது கிரிக்கெட் வாரியம் நடவடிக்கை எடுக்க வேண்டும். அங்கிடிக்கு ஆதரவாக கிரிக்கெட் வாரியம் இருக்க வேண்டும் என்று தெரிவித்துள்ளனர்.
அவர் அப்படித்தான்
சிம்காக்ஸ் போன்றோர் அங்கிடியை விமர்சிப்பதில் ஆச்சரியம் இல்லை. அவர்களைப் பற்றி அனைவருக்கும் தெரியும். இந்த விஷயத்தில் அங்கிடியின் கருத்தை நாங்கள் முழுமையாக ஆதரிக்கிறோம். விளையாட்டில் இன்னும் நிறவெறி இருக்கத்தான் செய்கிறது. அதைப் போக்க அனைவரும் இணைந்து பாடுபட வேண்டும். பிளாக் லைவ்ஸ் மேட்டர் இயக்கம் அந்தப் போராட்டத்துக்கு வலுவூட்டும் என்று கூறியுள்ளனர் மாஜி வீரர்கள்.
நிறவெறிக்கு எதிர்ப்பு
அமெரிக்காவில் கருப்பர் இனத்தைச் சேர்ந்த ஜார்ஜ் பிளாயிட் கொடூரமான முறையில் கொல்லப்பட்ட சம்பவத்தைத் தொடர்ந்து பிளாக் லைவ்ஸ் மேட்டர் இயக்கம் அமெரிக்காவில் வெடித்துக் கிளம்பியது. இது இப்போது உலகளாவிய இயக்கமாக மாறியுள்ளது. பலரும் இந்த இயக்கத்திற்கு ஆதரவாக குரல் கொடுத்து வருகின்றனர். போராட்டங்களும் நடந்து வருகின்றன என்பது நினைவிருக்கலாம்.