டெஸ்ட் தொடர்
இங்கிலாந்து - பாகிஸ்தான் அணிகள் இடையே டெஸ்ட் தொடர் நடைபெற்று வருகிறது. முதல் டெஸ்ட் மான்செஸ்டர் நகரில் துவங்கியது. பாகிஸ்தான் அணி டாஸ் வென்று பேட்டிங் செய்தது. பாகிஸ்தான் அணி பலம் குறைந்த அணியாகவே காட்சி அளித்தது.
பாகிஸ்தான் தடுமாற்றம்
இங்கிலாந்து அணியில் ஆண்டர்சன், பிராடு, வோக்ஸ் போன்ற அனுபவ வீரர்கள் இருந்ததால் அந்த அணி ஆதிக்கம் செலுத்தும் என எதிர்பார்க்கப்பட்டது. துவக்கத்தில் 43 ரன்களுக்கு 2 விக்கெட்களை இழந்தது பாகிஸ்தான் அணி.
பாபர் ஆசாம் அவுட்
அதன் பின் துவக்க வீரர் ஷான் மசூத், பாபர் ஆசாம் சிறப்பாக ஆடி ரன் சேர்த்தனர். பாபர் ஆசாம் 69 ரன்கள் எடுத்து ஆட்டமிழந்தார். அவரைத் தொடர்ந்து இரண்டு பேட்ஸ்மேன்கள் விரைவாக ஆட்டமிழந்தனர். பாகிஸ்தான் அணி 176 ரன்களுக்கு 5 விக்கெட்களை இழந்தது.
251 பந்துகளில் சதம்
அடுத்து ஷதாப் கான் உடன் இணைந்து கூட்டணி அமைத்த ஷான் மசூத் தன் நிதான ஆட்டத்தை தொடர்ந்தார். 251 பந்துகளில் சதம் கடந்து அசத்தினார். இந்த ஆட்டம் மூலம் மசூத் இங்கிலாந்து மண்ணில் பல்வேறு சாதனைகளை செய்துள்ளார்.
இங்கிலாந்து மண்ணில்..
இங்கிலாந்து மண்ணில் 1996க்கு பின் டெஸ்ட் போட்டிகளில் சதம் அடிக்கும் முதல் பாகிஸ்தான் துவக்க வீரர் ஷான் மசூத் தான். அவருக்கு முன்னதாக சயீத் அன்வர் 1996இல் சதம் அடித்து 176 ரன்கள் குவித்து இருந்தார். மேலும், இங்கிலாந்து மண்ணில் சதம் அடிக்கும் ஐந்தாவது பாகிஸ்தான் துவக்க வீரரும் மசூத் தான்.
மூன்று டெஸ்ட் சதம்
மேலும், பாகிஸ்தான் அணிக்காக தொடர்ந்து மூன்று டெஸ்ட் சதம் அடித்த வீரர்கள் பட்டியலில் ஆறாம் இடம் பெற்றார். இதே பட்டியலில் இடம் பெற்ற இரண்டாவது பாகிஸ்தான் துவக்க வீரர் ஷான் மசூத். இது மட்டுமின்றி மற்றொரு சாதனையையும் செய்துள்ளார்.
200 பந்துகளுக்கும் மேல்..
சயீத் அன்வருக்குப் பின் இங்கிலாந்து மண்ணில் டெஸ்ட் போட்டிகளில் 200 பந்துகளுக்கும் மேல் சந்தித்த முதல் துவக்க வீரர் என்ற சாதனையையும் செய்துள்ளார் ஷான் மசூத். அவரது நிதான ஆட்டத்தால் இங்கிலாந்து அணி பின்னடைவை சந்தித்துள்ளது.