ஜோ ரூட் வெற்றிகள்
ஜோ ரூட் தலைமையில் இங்கிலாந்து அணி அதன் சொந்த மண்ணில் இந்தியாவை 4க்கு1 என்ற கணக்கில் டெஸ்ட் தொடரை வென்றுள்ளது. இதே போன்று தென்னாப்பிரிக்க மண்ணில் 3க்கு1 என்ற கணக்கில் ஜோ ருட் தலைமையிலான அணி வென்றுள்ளது. மேலும் இலங்கையில் 20 ஆண்டுகளுக்கு பிறகு டெஸ்ட் தொடரை வென்ற இங்கிலாந்து கேப்டன் என்ற பெருமையையும் ஜோ ருட் படைத்தார்.
நம்பர் 1 கேப்டன்
இதே போன்று அதிக ரன்கள் அடித்த இங்கிலாந்து டெஸ்ட் கேப்டன் என்ற பெருமையை ஜோ ரூட் படைத்துள்ளார். இதுவரை டெஸ்ட் கேப்டனாக ரூட் 5295 ரன்களை விளாசியுள்ளார். இதில் 12 சதங்களும் அடங்கும். இதன் மூலம் சர்வதேச அளவில் டெஸ்ட் போட்டியில் அதிக ரன்கள் அடித்த கேப்டன் என்ற பட்டியலில் 5வது இடத்தில் உள்ளார். சமீப காலமாக இங்கிலாந்து அணி டெஸ்ட் போட்டியில் தொடர் தோல்வியை சந்தித்து வருகிறது.
தொடர் தோல்வி
ஆஷஸ் டெஸ்ட் தொடர் மற்றும் வெஸ்ட் இண்டீஸ் டெஸ்ட் தொடர் என அடுத்தடுத்து 2 தொடரை இங்கிலாந்து அணி இழந்தது மேலும் அணி வீரர்கள் ரூட்டுக்கு போதிய ஒத்துழைப்பு வழங்குவதில்லை என்ற குற்றச்சாட்டும் எழுந்தது. எனினும் கேப்டன் பதவியிலிருந்து ஜோ ரூட் விலக மாட்டேன் என்று பிடிவாதமாக இருந்தார்.
அடுத்த கேப்டன் யார்?
இந்த நிலையில், இங்கிலாந்து அணியின் பயிற்சியாளர் தொடர் தோல்வியின் காரணமாக விலகிய நிலையில், தற்போது ஜோ ரூட்டும் நெருக்கடி ஏற்பட்டதை அடுத்து தனது கேப்டன் பதவியை ராஜினாமா செய்துள்ளார். இந்த நிலையில், புதிய கேப்டனாக பென் ஸ்டோக்ஸ் செயல்படுவார் என்ற தகவல் வெளியாகியுள்ளது. கேப்டன் பதவியை எதிர்பார்த்து தான் ஐபிஎல் தொடரில் ஸ்டோக்ஸ் விளையாடாமல் புறக்கணித்தார் என்று கூறப்படுகிறது.