முதல் சர்வதேச ஒருநாள் போட்டி
நியூசிலாந்தில் சுற்றுப்பயணம் மேற்கொண்டுள்ள இந்திய அணி, முதலில் விளையாடிய 5 போட்டிகள் கொண்ட சர்வதேச டி20 தொடரில் அனைத்து போட்டிகளிலும் வெற்றி பெற்று சாதனை புரிந்தது. இதையடுத்து தற்போது சர்வதேச ஒருநாள் போட்டித் தொடரில் இரு அணிகளும் மோதி வருகின்றன. நேற்று நடைபெற்ற முதல் போட்டியில் இந்தியா அடித்த 347 ரன்களை சேஸ் செய்து நியூசிலாந்து அணி அபார வெற்றி பெற்றுள்ளது.
அணியின் வெற்றிக்கு உதவி
இந்த போட்டியில் 10 பவுண்டரிகள், 4 சிக்ஸ்கள் அடித்து 109 ரன்களை குவித்தார் நியூசிலாந்து அணி வீரர் ராஸ் டெய்லர். இந்திய அணியில் ஸ்ரேயாஸ் ஐயர் அடித்த சர்வதேச ஒருநாள் போட்டியின் முதல் சதத்துடன் கூடிய இந்திய அணியின் 347 ரன்களுக்கு எந்தவிதமான பயனும் இன்றி நியூசிலாந்து வெற்றியை கைகொள்ள ராஸ் டெய்லரின் சதம் பெருமளவில் உதவி புரிந்தது.
ராஸ் டெய்லரின் தனி கொண்டாட்டம்
இந்த போட்டியில் சதமடித்த பின்பு ராஸ் டெய்லர் தனது நாக்கை நீட்டி கொண்டாட்டத்தில் ஈடுபட்டார். இவர் தொடர்ந்து இந்த ஸ்டைலை சில வருடங்களாக தொடர்ந்து வருகிறார். தனது மகள் மெக்கென்சிக்காக தான் இந்த ஸ்டைலை தொடர்வதாகவும், அவளுக்கு இது பிடித்திருப்பதாகவும் தெரிவித்துள்ள ராஸ் டெய்லர், முதன்முதலில் ஆஸ்திரேலியாவிற்கு எதிரான போட்டியில் இதை தான் ஆரம்பித்ததாகவும் குறிப்பிட்டுள்ளார்.
வம்பிழுத்த ஹர்பஜன் சிங்
இந்தியாவிற்கு எதிரான நேற்றைய போட்டியில் சதமடித்த ராஸ் டெய்லர், தன்னுடைய தனித்துவமான ஸ்டைலில் நாக்கை நீட்டி கொண்டாட்டத்தில் ஈடுபட்டார். இதையடுத்து தனது டிவிட்டர் பக்கத்தில் அவரது சதத்திற்கு பாராட்டு தெரிவித்த முன்னாள் இந்திய பௌலர் ஹர்பஜன் சிங், செஞ்சுரி அடித்தவுடன் அவர் நாக்கை நீட்டுவது ஏன் என்று காரணத்தை கேட்டு அவரை வம்பிழுத்தார்.
|
சென்னை சூப்பர் கிங்ஸ் கலாய்
இதையடுத்து ஹர்பஜன் சிங்குடன் சென்னை சூப்பர் கிங்சும் இணைந்துக் கொண்டு ராஸ் டெய்லரை கலாய்த்தது. "வாட் அ நாக்" என்று தமிழில் நாக்கு என்று பொருள்படும்படியாக சிஎஸ்கே கலாய்த்திருந்தது. ஹர்பஜன் சிங் மற்றும் சிஎஸ்கேவின் ராஸ் டெய்லர் குறித்த இந்த கலாய்ப்பிற்கு டிவிட்டரில் ஆயிரக்கணக்கான ரசிகர்கள் லைக்குளை அளித்திருந்தனர்.