இரண்டாவது டெஸ்ட் போட்டி
இந்தியா - வங்கதேசம் மோதிய இரண்டாவது டெஸ்ட் போட்டி இரண்டு அணிகளுக்கும் முதல் பகல் - இரவு டெஸ்ட் என்ற வரலாற்று சிறப்புமிக்க போட்டியாக அமைந்தது. இந்தியா இந்தப் போட்டியில் ஆதிக்கம் செலுத்தி மூன்றாம் நாளில், ஒரு இன்னிங்க்ஸ் மற்றும் 46 ரன்கள் வித்தியாசத்தில் வங்கதேச அணியை வீழ்த்தியது.
7வது வெற்றி
இந்தப் போட்டியின் வெற்றி மூலம் இந்திய அணி கடைசியாக தான் ஆடிய ஏழு டெஸ்ட் போட்டிகளில் வெற்றி பெற்று சாதனை செய்துள்ளது. இதுவே டெஸ்ட் போட்டிகளில் இந்திய அணியின் நீண்ட வெற்றிப் பயணம் ஆகும்.
தோனியை முந்திய கோலி
தோனியின் தலைமையில் கடந்த 2013ஆம் ஆண்டில் இந்தியா தொடர்ந்து ஆறு போட்டிகளில் வெற்றிகளை குவித்து இருந்தது. அதை முறியடித்துள்ள கோலி, தொடர்ந்து ஏழு போட்டிகளில் கேப்டனாக இந்திய அணியை வெற்றி பெற வைத்துள்ளார்.
இன்னிங்க்ஸ் வெற்றி சாதனை
அதிக இன்னிங்க்ஸ் வெற்றி பெற்ற இந்திய கேப்டன்களில் கடந்த போட்டியில் முதல் இடத்தை பிடித்த கோலி, இந்தப் போட்டியில் கிடைத்த இன்னிங்க்ஸ் வெற்றி மூலம் 11 இன்னிங்க்ஸ் வெற்றி பெற்ற இந்திய கேப்டன் என்ற புதிய உச்சத்தை தொட்டுள்ளார். தோனி 9 இன்னிங்க்ஸ் வெற்றிகளுடன் இரண்டாம் இடத்தில் இருக்கிறார்.
கோலி குவித்த வெற்றிகள்
டெஸ்ட் அணி கேப்டனாக கோலி 33 வெற்றிகள் பெற்று, அதிக டெஸ்ட் போட்டி வெற்றிகள் பெற்ற கேப்டன்கள் பட்டியலில் ஆஸ்திரேலியாவின் ஆலன் பார்டரை பின்தள்ளி ஐந்தாம் இடத்தை பிடித்தார்.
12வது தொடர் வெற்றி
வங்கதேச தொடரை 2 - 0 என கைப்பற்றிய இந்திய அணி சொந்த மண்ணில் தொடர்ந்து 12வது டெஸ்ட் தொடர் வெற்றியை பதிவு செய்துள்ளது. ஆஸ்திரேலியா சொந்த மண்ணில் அதிகபட்சமாக தொடர்ந்து 10 டெஸ்ட் தொடர்களில் மட்டுமே வெற்றி பெற்றுள்ளது குறிப்பிடத்தக்கது.
4 இன்னிங்க்ஸ் வெற்றிகள்
இரண்டாம் டெஸ்ட் போட்டியில் இன்னிங்க்ஸ் வெற்றி பெற்றது இந்தியா. இதன் மூலம், டெஸ்ட் போட்டிகளில் தொடர்ந்து நான்காவது இன்னிங்க்ஸ் வெற்றி பெற்றுள்ளது. இது டெஸ்ட் போட்டிகளில் இமாலய சாதனையாகும்.
டெஸ்ட் வரலாற்றில் சாதனை
டெஸ்ட் வரலாற்றில் இதுவரை எந்த அணியும் தொடர்ந்து நான்கு போட்டிகளில் இன்னிங்க்ஸ் வெற்றி பெற்றதில்லை. இந்திய அணி இதற்கு முன் ஆடிய தென்னாப்பிரிக்க டெஸ்ட் தொடரின் கடைசி இரு போட்டிகளில் பெற்ற இன்னிங்க்ஸ் வெற்றிகளுடன், வங்கதேச டெஸ்ட் தொடரின் இரண்டு போட்டிகளிலும் இன்னிங்க்ஸ் வெற்றி பெற்றது.