நியூசிலாந்து ஸ்கோர்
இந்தப் போட்டியில் முதலில் பேட்டிங் செய்த நியூசிலாந்து அணி 239 ரன்கள் எடுத்தது. இந்திய அணி எளிதாக இந்த இலக்கை எட்டும் என ரசிகர்கள் எதிர்பார்த்தனர். ஆனால், நடந்தது வேறாக இருந்தது.
இந்தியா அதிர்ச்சி
இந்திய அணியின் துவக்க வீரர்கள் ரோஹித் சர்மா, ராகுல், கேப்டன் கோலி - மூவரும் 1 ரன் எடுத்து ஆட்டமிழந்தனர். இந்தியா 5 ரன்களுக்கு 3 விக்கெட்கள் இழந்து அதிர்ச்சி அளித்தது. மிடில் ஆர்டரில் தோனியை களமிறக்காமல், அவருக்கு முன் ரிஷப் பண்ட், தினேஷ் கார்த்திக் மற்றும் ஹர்திக் பண்டியா களமிறங்கினர். அவர்களும் சொற்ப ரன்கள் எடுத்து ஆட்டமிழந்தனர்.
தோனி - ஜடேஜா அபாரம்
அடுத்து பேட்டிங் வரிசையில் ஏழாவது மற்றும் எட்டாவது இடத்தில் தோனி, ஜடேஜா களமிறங்கினர். அவர்கள் இருவரும் நீண்ட நேரம் பேட்டிங் செய்தனர். ஏழாவது விக்கெட்டுக்கு 116 ரன்கள் சேர்த்து நியூசிலாந்து அணிக்கு ஆட்டம் காட்டினர்.
ஜடேஜா அசத்தல்
ஜடேஜா அசத்தலாக ஆடினார். தோனி பொறுமையாக ஆட, ஜடேஜா வெளுத்து வாங்கினார். நான்கு சிக்ஸர்கள், நான்கு ஃபோர் அடித்த அவர் 59 பந்துகளில் 77 ரன்கள் குவித்து 48வது ஓவரில் ஆட்டமிழந்தார்.
தோனி போராட்டம்
அடுத்து தோனி 72 பந்துகளில் 50 ரன்கள் எடுத்தார். அவர் 49வது ஓவரில் மார்டின் குப்டிலின் அபார த்ரோவால் ரன் அவுட் செய்யப்பட்டார், அத்துடன் இந்திய அணியின் வெற்றிக் கனவும் தகர்ந்தது.
ரசிகர்கள் பாராட்டு
இந்தியா 18 ரன்கள் வித்தியாசத்தில் நியூசிலாந்து அணியிடம் தோல்வி அடைந்து தொடரில் இருந்து வெளியேறியது. எனினும், தோனி, ஜடேஜாவின் போராட்டத்தை இந்திய ரசிகர்கள் பாராட்டித் தள்ளினர்.