பிரதமர் சுவாரஸ்ய கேள்வி
ஆஸ்திரேலிய பிரதமர் இல்லத்தில் நிகழ்ந்த சந்திப்பில் இந்திய வீரர்களை வரவேற்று கை குலுக்கினார் ஆஸி. பிரதமர். அப்போது ரிஷப் பண்ட்டோடு கை குலுக்கிய போது "ஆ.. ஆமாம்.. நீதானே ஸ்லெட்ஜிங் செய்தது" என கேட்டார். இதை எதிர்பார்க்காத ரிஷப் பண்ட் ஒரு நொடி ஸ்தம்பித்து பின் சிரித்து மழுப்பினார்.
ரிஷப் பண்ட் சீண்டல்
ரிஷப் பண்ட் முதல் டெஸ்ட் முதலே ஆஸ்திரேலிய வீரர்கள் பேட்டிங் செய்யும் போது கீப்பிங் செய்து கொண்டே அவர்களை சீண்டி வந்தார். பாட் கம்மின்ஸ், ஆஸி. கேப்டன் டிம் பெய்ன், கவாஜா என பலரையும் குறி வைத்து சீண்டினார் பண்ட்.
போட்டியை விரும்புவோம்
இதை தான் ஆஸ்திரேலிய பிரதமர் கேட்டுள்ளார். ரிஷப் பண்ட் ஒருவாறு சிரித்து சமாளித்தார். பின்னர் ஆஸ்திரேலிய பிரதமர், "உங்களை வரவேற்கிறோம். போட்டி மிகுந்த விளையாட்டை நாங்கள் விரும்புவோம்" என ரிஷப் பண்ட்டின் சீண்டல்களை விளையாட்டின் அங்கமாக எடுத்துக் கொண்டதை நினைவு கூர்ந்தார்.
கேப்டனின் குழந்தைகளோடு பண்ட்
இந்த சந்திப்பில் இந்திய அணியின் கேப்டன் கோலியையும் புகழ்ந்து பேசினார் ஆஸ்திரேலிய பிரதமர். மறுபுறம் ரிஷப் பண்ட், ஆஸ்திரேலிய அணி கேப்டனின் குழந்தைகளோடு சிறிது நேரம் செலவழித்தார்.
செய்து காட்டிய ரிஷப் பண்ட்
ஆஸ்திரேலிய கேப்டன் டிம் பெய்ன் மூன்றாவது போட்டியில், ரிஷப் பண்ட்டை கலாய்த்து, தன் குழந்தைகளை பார்த்துக் கொள்ளுமாறு கூறினார் என்பது குறிப்பிடத்தக்கது. அதை அப்படியே செய்து காட்டினார் ரிஷப் பண்ட்.