இந்தியா வெற்றி
இந்தூரில் நேற்று நடைபெற்ற இலங்கைக்கு எதிரான இரண்டாவது டி20 போட்டியில் 7 விக்கெட்டுகள் வித்தியாசத்தில் இந்தியா அபார வெற்றி பெற்றுள்ளது. இலங்கையின் 142 என்ற இலக்கை இந்தியா எளிதாக கடந்தது.
32 பந்துகளுக்கு 45 ரன்களை குவித்த ராகுல்
துவக்க ஆட்டக்காரர்களாக களமிறங்கிய கே.எல். ராகுல் மற்றும் ஷிகர் தவான் இருவரும் பார்ட்னர்ஷிப்பில் 71 ரன்களை குவித்தனர். 32 பந்துகளுக்கு 45 ரன்களை கே.எல் ராகுல் குவிக்க, ஷிகர் தவான் 29 பந்துகளுக்கு 32 ரன்களை அள்ளினார்.
அபார ஆட்டத்தால் திணறிய இலங்கை
அடுத்ததாக ஸ்ரேயாஸ் ஐயரும் கோலியும் இணைந்து போட்டியை முடித்து வைத்தனர். ஸ்ரேயாஸ் ஐயர் 26 பந்துகளில் 36 ரன்களை விளாச, கோலி 17 பந்துகளில் 30 ரன்களை அடித்து வெற்றியுடன் ஆட்டத்தை முடித்து வைத்தார்.
கோலியின் சாதனை பட்டியல்
கடந்த 2019ல் உலக அளவில் பல்வேறு சாதனைகளுக்கு சொந்தக்காரராக விளங்கிய கோலி, அந்த சாதனை பயணத்தை இந்த ஆண்டிலும் தான் விளையாடிய முதல் போட்டியிலேயே துவக்கி வைத்துள்ளார்.
டி20 போட்டிகளில் சாதனை
இலங்கைக்கு எதிரான இந்த போட்டியில் விளையாடி, சர்வதேச டி20 போட்டிகளில் அதிவேகமாக 1000 ரன்களை குவித்த கேப்டன் என்ற சாதனையை கோலி பெற்றுள்ளார். இந்த சாதனையை முன்னாள் கேப்டன் தோனி 57 போட்டிகளிலும் நியூசிலாந்தின் கேப்டன் கேன் வில்லியம்சன் 36 இன்னிங்சிலும் பெற்றுள்ளனர்.
முறியடித்த விராட் கோலி
சர்வதேச டி20 போட்டிகளில் தென்னாப்பிரிக்க கேப்டன் பாப் டு பிளெசிசின் 31 இன்னிங்சில் 1000 ரன்களை கடந்த கேப்டன் என்ற சாதனையை தற்போது 30 இன்னிங்சில் கடந்து விராட் கோலி முறியடித்துள்ளார்.