டாஸ் வெற்றி
பிளே-ஆஃப் சுற்றுக்கு முன்னேற வேண்டும் என்றால் வெற்றி பெற்றே தீர வேண்டும் என்ற நிலையில் இந்தப் போட்டியில் சன்ரைசர்ஸ் ஹைதராபாத் அணி களமிறங்கியது. அந்த அணி டாஸ் வென்று பந்துவீச்சை தேர்வு செய்தது.
மும்பை தடுமாற்றம்
மும்பை இந்தியன்ஸ் அணியில் ரோஹித் சர்மா அணிக்கு திரும்பினார். அவர் 4 ரன்கள் மட்டுமே எடுத்து ஆட்டமிழந்தார். டி காக் 25, சூர்யகுமார் யாதவ் 36, இஷான் கிஷன் 33 ரன்கள் எடுத்தனர். அடுத்து க்ருனால் பாண்டியா டக் அவுட் ஆனார். சௌரப் திவாரி 1 ரன்னில் ஆட்டமிழந்தார்.
இலக்கு
பொல்லார்டு கடைசி நேரத்தில் விக்கெட் வீழ்ச்சிக்கு நடுவே அதிரடி ஆட்டம் ஆடி 25 பந்துகளில் 41 ரன்கள் குவித்தார். மும்பை இந்தியன்ஸ் அணி 20 ஓவர்களில் 8 விக்கெட் இழப்பிற்கு 149 ரன்கள் மட்டுமே எடுத்தது. ஹர்திக் பாண்டியா அணியில் இல்லாதது பேட்டிங்கில் பாதிப்பை ஏற்படுத்தியது.
ஹைதராபாத் ஜோடி
150 ரன்கள் வெற்றி இலக்கை துரத்திய ஹைதராபாத் அணிக்கு சிறப்பான துவக்கம் அளித்தது டேவிட் வார்னர் - விரிதிமான் சாஹா ஜோடி. இருவரும் கடைசி வரை ஆட்டமிழக்காமல் நின்று 17.1 ஓவரில் அணியை வெற்றி பெற வைத்தனர்.
இமாலய வெற்றி
வார்னர் 58 பந்துகளில் 85 ரன்களும், விரிதிமான் சாஹா 45 பந்துகளில் 58 ரன்கள் குவித்து இருந்தனர். ஹைதராபாத் அணி 10 விக்கெட் வித்தியாசத்தில் மும்பை இந்தியன்ஸ் அணியை வீழ்த்தியது. மும்பை அணி மட்டுமே ஒரே தொடரில் 10 விக்கெட் வித்தியாசத்தில் வெற்றியும் பெற்று, தோல்வியும் அடைந்துள்ளது,
பிளே-ஆஃப் சுற்றுக்கு முன்னேற்றம்
இந்த இமாலய வெற்றி மூலம் சன்ரைசர்ஸ் ஹைதராபாத் அணி பிளே-ஆஃப் சுற்றுக்கு முன்னேறியது. மும்பை இந்தியன்ஸ், டெல்லி கேபிடல்ஸ், ராயல் சேலஞ்சர்ஸ் பெங்களூர் அணிகளுடன், ஹைதராபாத் அணியும் பிளே-ஆஃப் சுற்றில் பங்கேற்க உள்ளது.