பென் ஸ்டோக்ஸ் காயம்
ராஜஸ்தான் ராயல்ஸ் அணி தனது முதல் லீக் போட்டியில் பஞ்சாப் கிங்ஸ் அணியை எதிர்கொண்டது. இப்போட்டியில் பீல்டிங் செய்துகொண்டிருந்த பென் ஸ்டோக்ஸுக்கு விரலில் காயம் ஏற்பட்டது. காயத்தின் தன்மை மிகவும் பெரிதாக இருப்பதால், அவர் எஞ்சிய போட்டிகளில் பங்கேற்கமாட்டார் என ராஜஸ்தான் ராயல்ஸ் அணி நிர்வாகம் அறிவித்தது.
தென்னாப்பிரிக்க வீரர்
ஸ்டோக்ஸுக்கு பதிலாக தென்னாப்பிரிக்க அதிரடி வீரர் ராஸி வான் டெர் டுசெனை அணியில் எடுக்க ராஜஸ்தான் அணி அழைப்பு விடுத்தது. எனினும் இதுகுறித்த அதிகாரப்பூர்வ அறிவிப்பு ஏதும் வெளியாகவில்லை. பேச்சுவார்த்தை மட்டத்தில் இருப்பதாகவும், வான் டெர் டுசென் ஒப்புக்கொண்டால் அதிகாரப்பூர்வ அறிவிப்பு வெளியாகும் என எதிர்பார்க்கப்பட்டது.
தோல்வி
இந்நிலையில் அந்த முயற்சியும் தோல்வியில் முடிந்துள்ளது. ராஸி வான் டெர் டுசென் ஐபிஎல் தொடரில் விளையாட இன்னும் அந்த நாட்டு கிரிக்கெட் வாரியத்திடம் அனுமதி பெறவில்லை, எனக்கூறப்படுகிறது. இதுமட்டுமல்லாமல் இந்தியாவில் கொரோனா அதிகரித்து வருவதால் அவருக்கு விசா கிடைப்பதிலும் சிக்கல் ஏற்பட்டுள்ளது. எனவே ராஜஸ்தான் அணியில் சேருவதில் சந்தேகம் தான்.
ஃபுல் ஃபார்ம்
டுசென் தற்போது சிறந்த ஃபார்மில் உள்ளார். சமீபத்தில் நடைபெற்ற பாகிஸ்தானுக்கு எதிரான தொடரில் 2 ஒருநாள் போட்டிகளில் 183 ரன்களை குவித்தார். இதில் ஒரு சதமும் அடங்கும். அதே போல 2 டி20 போட்டிகளில் ஆடி 183 ரன்களை விளாசியுள்ளார். இதனால் டி20 போட்டியில் இவரின் ஸ்ட்ரைக் ரேட் 153.57 என சிறப்பாக உள்ளது. ஆனால் அவருக்கு சமீப காலமாக காய பாதிப்பு ஏற்பட்டு வருகிறது. இதனால் பாகிஸ்தான் தொடரில் கடைசி ஒரு நாள் போட்டியிலும், முதல் 2 டி20 போட்டிகளிலும் ஆடவில்லை என்பது குறிப்பிடத்தக்கது.