அதிரடி பவர்பிளே
பெரிதும் எதிர்பார்க்கப்பட்ட அபிஷேக் சர்மா 9 ரன்களில் வெளியேறினார். இதனை தொடர்ந்து ஜோடி சேர்ந்த பிரியம் கார்க் மற்றும் ராகுல் திரிபாதி ஜோடி அதிரடியாக விளையாடி ரன்களை சேர்த்தனர். குறிப்பாக பும்ரா ஓவரிலேயே 15 ரன்கள் விளாசப்பட்டது. இதனால் பவர்பிளேவில் ஐதராபாத் அணி 57 ரன்களை விளாசி இருந்தது.
அசத்திய திரிபாதி
பிரியம் கார்க் 26 பந்துகளில் 42 ரன்கள் விளாசினார். இதில் 4 பவுண்டரிகளும், 2 சிக்சர்களும் அடங்கும். மறுமுனையில் ராகுல் திரிபாதி ரன் குவிக்கும் வேகத்தை அதிகரிக்க, 32 பந்தில் அரைசதம் அடித்தார். ஐதராபாத் அணி 10.1வது ஓவரில் 100 ரன்களை எட்டியது. சிறப்பாக விளையாடிய ராகுல் திரிபாதி 44 பந்துகளில் 76 ரன்கள் குவித்தார். இதில் 3 சிக்சர், 9 பவுண்டரிகள் அடங்கும்.
பந்துவீச்சில் கலக்கல்
இதன் பின்னர் நிக்கோலஸ் பூரானும் தன் பங்கிற்கு 22 பந்துகளில் 38 ரன்கள் விளாசினார். ஐதராபாத் ஸ்கோர் 200 ஐ தாண்டும் என எதிர்பார்க்கப்பட்டது. ஆனால் மும்பை வீரர் ரமன்தீப் சிங் 18வது ஓவரில் 2 முக்கிய விக்கெட்டுகளை வீழ்த்தி 2 ரன்களை மட்டுமே விட்டு கொடுத்தார். இதனால் ஆட்டம் மாறியது.
ஐபிஎல் சாதனை
கடைசி கட்டத்தில் ஐதராபாத் அணியின் வில்லியம்சன் உள்ளிட்டோர் பவுண்டரி விளாச திணறினர். இதனால் ஐதராபாத் அணி 20 ஓவர் முடிவில் 193 ரன்களுக்கு 6 விக்கெட்டுகளை இழந்து தடுமாறியது. இதில் கடைசி 5 ஓவரில் ஐதராபாத் அணி 4 விக்கெட்டுகளை இழந்து 45 ரன்களை மட்டுமே எடுத்துள்ளது. இந்த இன்னிங்சில் சிக்சர்கள் விளாசியதன் மூலம் நடப்பு சீசனில் 900 சிக்சர்கள் அடிக்கப்பட்டுள்ளது. இதில் மும்பை மட்டுமே 100 சிக்சரை முதல் முறையாக விட்டு கொடுத்துள்ளது.