சாதனைகள்
சிறிய வயதிலேயே சர்வதேச அளவில் பல்வேறு சாதனைகளுக்கு சொந்தக்காரராக விளங்குபவர் இந்திய அணியின் கேப்டன் விராட் கோஹ்லி. எளிதில் உணர்ச்சி வசப்படுபவர் என்ற விமர்சனத்திற்கு ஆளாகிவரும் இவர், தன்னுடைய 31வது பிறந்தநாளை இன்று கொண்டாடி வருகிறார். அவருக்கு பல்வேறு தரப்பினரும் வாழ்த்துக்களை தெரிவித்து வருகின்றனர்.
15 வயது சிக்கு
இந்நிலையில், சிக்கு என்று செல்லமாக அழைக்கப்படும் விராட், 15 வயது சிக்குவிற்கு (அதாவது தனக்கு) தனது டிவிட்டர் பக்கத்தில் எனக்கான குறிப்புகள் என்ற ஹேஷ்டாக்கில் எழுதியுள்ள கடிதம் அனைவரின் கவனத்தையும் பெற்று டிரெண்டிங்காகியுள்ளது.
நிறைய வாய்ப்புகள்
தனது கடிதத்தில், முதலில் சிக்குவிற்கு பிறந்தநாள் வாழ்த்துக்களை தெரிவித்துக் கொண்டுள்ள கோஹ்லி, வாழ்க்கை அதிகப்படியான வாய்ப்புக்களை வைத்துள்ளதாகவும், அதை பெறுவதற்கு அனைத்து வாய்ப்புகளையும் பயன்படுத்திக்கொள்ள தயாராக இருக்கும்படியும் தெரிவித்துள்ளார்.
உன்னில் நம்பிக்கை வை
சிக்கு அதிகமானவர்களால் விரும்பப்படுபவனாக இருப்பான் என்று தெரிவித்துள்ள கோஹ்லி, தன்னை வெறுப்பவர்கள் குறித்து கவலைப்படாமல், உன்னில் நம்பிக்கை வை என்று அறிவுறுத்தியுள்ளார்.
அப்பா பேச்சை ரசி
உன்னுடைய பிறந்தநாளில் அப்பா அளிக்காத ஷூ குறித்து கவலைப்படாதே. ஆனால் அவர் இன்று காலை கொடுத்த அரவணைப்பையும், உன்னுடைய உயரம் குறித்த அவரது நகையாடலையும் ரசி என்றும் விராட் தெரிவித்துள்ளார். அப்பா பலமுறை உன்னை கடிந்துக் கொண்டதற்கு காரணம், உன்னை சிறந்தவனாக்க அவர் முயன்றதே என்று விராட் தெரிவித்துள்ளார். இதன்மூலம் அவர் தன்னுடைய சிறுவயது பருவத்தை திரும்பிப் பார்த்துள்ளார்.
உயர்ந்த கனவுகள்
இறுதியாக, கனவுகளை துரத்து என்றும் உயர்ந்த கனவுகள் மாற்றத்தை உருவாக்கும் என்று உலகிற்கு உணர்த்து என்றும் சிக்குவிற்கு கூறி தனது கடிதத்தை முடித்துள்ளார் கோஹ்லி.