அமெரிக்காவில் தனித்திருத்தல்
தற்போது அமெரிக்காவில் இருக்கிறார் ஷாகிப் அல் ஹசன். தனது மனைவி மற்றும் குடும்பத்தைச் சந்திக்கவே அங்கு போயுள்ளார். ஆனால் அவர் அங்கு தற்போது தனித்திருந்து வருகிறார். இந்த நிலையில் தனது இன்ஸ்டாகிராமில் ஒரு பதிவைப் போட்டுள்ளார் ஷாகிப் அல் ஹசன். அவரது மகள் அதில் இருக்கிறார். கண் நிறைய சிரிப்புடன் வெல்கம் ஹோம் என்று எழுதப்பட்ட குட்டி பாப்பாக்களுக்கான டிரஸ்ஸை கையில் பிடித்துள்ளார்.
மீண்டும் தாயானார்
ஷாகிப் இதற்கு கொடுத்துள்ள கேப்ஷன் பெரிய அக்கா என்று கூறியுள்ளார். இதன் மூலம் அவரது மனைவி மீண்டும் தாயாகியுள்ளார் என்பது தெரிய வந்துள்ளது. இதையடுத்து இந்த புகைப்படத்துக்கு வாழ்த்துகள் குவிந்து வருகின்றன. ஷாகிப் அல் ஹசன் தற்போது தொடர்ந்து ஹோட்டலிலேயே தங்கியுள்ளார். அங்கேயே அவர் தனது 33வது பிறந்த நாளையும் மார்ச் 24ம் தேதி தனியாகவே கொண்டாடினார்.
மகளைப் பார்க்க முடியாமல் தவிப்பு
ஹோட்டலில் தனியாக இருந்தபோது தனது மகளைக் கூட பார்க்க முடியவில்லையே என்று வருத்தப்பட்டு ஒரு வீடியோவும் போட்டிருந்தார். இருப்பினும் தனது குடும்பத்தின் நலனுக்காக இந்த தனித்திருத்தல் அவசியம். எனவே அனைவரும் தனித்திருக்க முயற்சியுங்கள். அது உங்களுக்கும், உங்களது குடும்பத்தாருக்கும், உங்கள் அக்கம் பக்கத்தினருக்கும் நல்லது என்று கூறியிருந்தார்.
கொரோனா உதவி
மறுபக்கம் வங்கதேசத்தில் ஷாகிப் அல் ஹசனின் அறக்கட்டளையானது, 2000 பாதிக்கப்பட்ட குடும்பங்களுக்கு உணவுப் பொருட்களை வழங்கி உதவிக் கரம் நீட்டியுள்ளது. மேலும் உலக அளவில் நிதி வசூலித்து ஏழை மக்களுக்கு உதவப் போவதாகவும் ஷாகிப் அல் ஹசன் அறிவித்துள்ளார். கடந்த 2019ம் ஆண்டு முதல் ஷாகிப் அல் ஹசன் கிரிக்கெட் விளையாடாமல் உள்ளார். அவருக்கு ஐசிசி தடை விதித்துள்ளது நினைவிருக்கலாம்.