கேப்டவுன்: டெஸ்ட் கிரிக்கெட்டிலிருந்து தென் ஆப்ரிக்கா வேகப்பந்து வீச்சாளர் டேல் ஸ்டெய்ன் ஓய்வு பெறுவதாக அறிவித்திருக்கிறார்.
டேல் ஸ்டெய்ன் இங்கிலாந்துக்கு எதிராக 2004ம் ஆண்டு டெஸ்ட்டில் அறிமுகம் ஆனார். 93 டெஸ்ட் போட்டிகளில் 439 விக்கெட்டுகளை கைப்பற்றியுள்ளார். 26 முறை ஒரு இன்னிங்சில் 5 விக்கெட்டுகளையும், ஒரு டெஸ்ட் போட்டியில் 10 விக்கெட்டுகள் சாதனையை 5 முறையும் நிகழ்த்தியுள்ளார் ஸ்டெய்ன்.
டெஸ்ட் கிரிக்கெட்டிலிருந்து ஓய்வு பெற்றாலும் டி20 மற்றும் ஒருநாள் போட்டிகளில் டேல் ஸ்டெய்ன் தொடர்ந்து விளையாடுவார். இது குறித்து அவர் கூறியதாவது: நான் அதிகம் விரும்பும் ஒரு விஷயத்தில் இருந்து நிரந்தரமாக விலக முடிவை எடுத்துள்ளேன்.
டெஸ்ட் கிரிக்கெட் தான் பெஸ்ட். காரணம் அது உங்கள் மனம், உடலளவில் மட்டுமல்லாது உணர்வு ரீதியாகவும் சவால் தரும். இன்னொரு டெஸ்ட் போட்டியில் நான் ஆடப்போவதில்லை என்ற முடிவு பயங்கரமானது தான்.
அதை காட்டிலும் அச்சுறுத்துவது இனி விளையாடவே முடியாது என்ற விஷயம். எனவே, டெஸ்ட்டில் இருந்து ஓய்வு என்ற முடிவுக்கு வந்துள்ளேன். ஆகவே டி20, ஒருநாள் தொடர்களில் ஆடி, ஆரோக்கியத்தை பராமரிக்க உள்ளேன் என்றார்.