மலிங்காவிற்கு மாற்று
முதலில் மலிங்காவிற்கு மாற்றாக அல்சாரி ஜோசப் ஆடுவார் என கூறப்பட்ட போது, யாரும் இவரை கண்டுகொள்ளவில்லை. மும்பை முதலில் பேட்டிங் செய்து 136 ரன்கள் மட்டுமே எடுத்தது. ஹைதராபாத் அணிக்கு 137 ரன்கள் என்ற எளிய இலக்கு நிர்ணயிக்கப்பட்டது.
ஜோசப்பின் முதல் ஓவர்
பும்ரா, ஜேசன் பெஹ்ரண்டாப், ஹர்திக் பண்டியா தான் மும்பை பந்துவீச்சில் முக்கிய பங்காற்றப் போகிறார்கள் என்ற எதிர்பார்ப்பு நிலவியது. ஆனால், தன் ஹைதராபாத் இன்னிங்க்ஸின் ஐந்தாவது ஓவரை வீசினார் ஜோசப். அது தான் ஐபிஎல் தொடரில் ஜோசப்பின் முதல் ஓவர்.
டேவிட் வார்னர் அவுட்
தன் முதல் ஓவரின் முதல் பந்தில் உச்சகட்ட பார்மில் இருக்கும் அனுபவ வீரர் டேவிட் வார்னரை பௌல்டு அவுட் செய்து தன் மீதான எதிர்பார்ப்பை கிளறி விட்டார். தன் அடுத்து ஓவரில் விஜய் ஷங்கரை காலி செய்தார். ஹைதராபாத் அணி இதன் பின் தடுமாறத் துவங்கியது.
6 விக்கெட்கள்
அல்சாரி ஜோசப் தொடர்ந்து ஹூடா, ரஷித் கான், புவனேஸ்வர் குமார், சித்தார்த் கௌல் விக்கெட்களை எடுத்து அசத்தினார். இந்தப் போட்டியில் 3.4 ஓவர்கள் வீசி 12 ரன்கள் மட்டுமே கொடுத்து 6 விக்கெட்கள் அள்ளினார் ஜோசப்.
11 ஆண்டு சாதனை
இந்த பந்துவீச்சின் மூலம் 11 ஆண்டு கால ஐபிஎல்-இன் சிறந்த பந்துவீச்சு சாதனையை முறியடித்தார் ஜோசப். ஐபிஎல்-இன் துவக்க வருடமான 2008இல் ராஜஸ்தான் ராயல்ஸ் வீரர் சோஹைல் தன்வீர் 4 ஓவர்களில் 14 ரன்கள் கொடுத்து 6 விக்கெட்கள் எடுத்து இருந்ததே ஐபிஎல் சிறந்த பந்துவீச்சாக இருந்தது.
ஆச்சரிய சாதனை
12 ரன்களில் 6 விக்கெட்கள் எடுத்த அல்சாரி ஜோசப் அந்த சாதனையை தன் அறிமுகப் போட்டியிலேயே முறியடித்து அனைவரையும் ஆச்சரியத்தில் ஆழ்த்தினார். இவரது அசத்தல் பந்துவீச்சால் வெறும் 136 ரன்கள் குவித்த மும்பை இந்தியன்ஸ் அணி 40 ரன்கள் வித்தியாசத்தில் வெற்றி பெற்றது.