Click it and Unblock the Notifications
எண்களின் தொடர்பு
இன்னும் சொல்லப் போனால், மிக பெரிய வீரர்கள், அதிகம் பேசப்படாத வீரர்கள், அணிகள் செய்துள்ள சில அதிசயங்கள் எப்போதும் மறக்க முடியாதவை. அது போல் உலக கோப்பையில் சில எண்கள் அதிசயிக்க வைக்கும். அந்த எண்களை தற்போது பார்க்கலாம்:
36 ஆண்டுகால சாதனை
3.24: இந்த பவுலிங் சராசரி 36 ஆண்டுகளாக முறியடிக்கப்படாமல் இருக்கிறது. அதி சிக்கனமான, உலக கோப்பை பவுலிங் அட்டவணையில் நம்பர் 1 இடத்தில் இருக்கிறது. 1975, 1979, 1983 உலக கோப்பைகளில் ஆடிய மேற்கிந்திய தீவுகளின் உலகின் தலைசிறந்த வேகப் பந்து வீச்சாளர் ஆண்டி ராபர்ட்ஸ்தான் இந்த சாதனைக்கு இன்னமும் சொந்தக்காரர். மொத்தம் 16 போட்டிகளில் 26 விக்கெட்டுகளை அவர் கைப்பற்றினார்.
ஒரே தொடரில் 21 கேட்ச்
21: ஆடம் கில்கிறிஸ்ட் 2003 உலக கோப்பை தொடரில் விக்கெட் கீப்பராக வீரர்களை ஆட்டமிழக்க செய்த எண்ணிக்கை. ஒரே தொடரில் 21 கேட்ச்கள் எடுத்து சாதனையை தன் வசம் வைத்திருக்கிறார். தற்போது அவர் ஓய்வு பெற்று விட்டார்.
மலைக்க வைக்கும் ரேட்
23.8 :பந்துவீச்சில் சிறந்த பவுலிங் ஸ்ட்ரைக் ரேட் என்று இருக்கிறது. அந்த சாதனை வீரர் லசித் மலிங்கா. 23.8 என்ற ஸ்டிரைக் ரேட் முறியடிக்கப்பட வில்லை.
தோனி 32
32: உலக கோப்பையில் தோனி அவுட் ஆக்கிய விக்கெட்டுகள் எண்ணிக்கை யாகும் இது. இந்த உலக கோப்பையிலும், அதிக விக்கெட்டுகளை அவர் அவுட்டாக்கலாம் என்று எதிர்பார்க்கலாம்.
நடுவர்கள் சாதனை
46: இங்கிலாந்து நடுவர் டேவிட் ஷெப்பர்ட் பணியாற்றிய உலக கோப்பை போட்டிகளின் எண்ணிக்கை, அடுத்த இடத்தில் மே.இ.தீவுகளின் ஸ்டீவ் பக்னர் இவர் 45 போட்டிகளில் களநடுவராகப் பணியாற்றியுள்ளார்.
59 எக்ஸ்டிராஸ்
59: 1999 உலக கோப்பையில் ஸ்காட்லாந்து அணிக்கு எதிராக பாகிஸ்தான் அணி விட்டுக் கொடுத்த எக்ஸ்ட்ராஸ் ரன்கள் 59 (கிட்டத்தட்ட 10 ஓவர்கள் என்று வைத்துக் கொள்ளலாம்). அந்த போட்டியில் வாசிம் அக்ரம், சோயப் அக்தர் இருந்தும் 33 வைடுகள் 15 நோபால்கள்.
அதிகபட்ச சராசரி
61.42: இந்தியாவின் பெருஞ்சுவர், பாதுகாப்பு அரண் என்று வர்ணிக்கப்பட்ட வீரர் ராகுல் டிராவிட். 1999ம் ஆண்டு உலக கோப்பையில் வைத்திருந்த இது அவரின் அதிக பட்ச சராசரி சாதனையாகும்.
105 ரன்கள் விட்டுக்கொடுப்பு
105: நியூசிலாந்தின் மார்டின் ஸ்னெடன் 12 ஒவர்களில் 105 ரன்களை விட்டுக் கொடுத்தார், இதே மார்டின் ஸ்னெடன் 1987 உலக கோப்பையில் இந்தியாவுக்கு எதிராக 10 ஓவர்களில் 102 ரன்களை அள்ளிக் கொடுத்த வள்ளல் என்பது பலருக்கு தெரியாது.
குளுஸ்னர் ரெக்கார்டு
124: உலக கோப்பையில் 124 ரன்கள் சராசரி வைத்திருந்த ஒரே வீரர் தென் ஆப்ரிக்காவின் ஆல் ரவுண்டர் லான்ஸ் குளூஸ்னர். 1999 மற்றும் 2003 உலக கோப்பை தொடர்களில் குளூஸ்னர் முத்திரை பதித்தார். ஜூலு என்று செல்ல பெயரால் சக வீரர்களால் அழைக்கப்படுவர். 1999ல் அற்புதமாக ஆடி அனைவரும் பிரமிக்க வைத்தார். அந்த உலககோப்பையில் 281 ரன்களை 140.80 என்ற சராசரியில் எடுத்திருந்தார், பந்து வீச்சில் 17 விக்கெட்டுகளுடன் 4வதாக திகழ்ந்தார். மொத்தமாக இவரது உ.கோப்பை பேட்டிங் சராசரி 124.
அதிகபட்ச ஸ்டிரைக்
387.50: ஒரு இன்னிங்சின் அதிகபட்ச ஸ்டிரைக் ரேட்டை வைத்திருப்பவர் நியூசிலாந்தின் ஜெம்ஸ் பிராங்க்ளின், 2011ம் ஆண்டு உலக கோப்பையில், கனடா அணிக்கு எதிரான ஆட்டத்தில் 8 பந்துகளில் 31 ரன்களை எடுத்தார். 2 பவுண்டரிகள் 3 சிக்சர்கள். 5 பந்துகளில் 26 ரன்கள் அடித்தவர் அடுத்த 5 ரன்களை 3 பந்துகளில் எடுத்தார்.
