கோலியின் மதிப்பு
சர்வதேச அளவில் சமூக வலைதளங்களில் அதிக மக்களால் பின் தொடரப்படும் விளையாட்டு வீரர்களில் விராட் கோலியும் முக்கிய இடத்தில் உள்ளார். இவர் விளம்பர தூதராக செயல்பட்டு, நடித்துக் கொடுத்த முன்னணி நிறுவனங்கள் பெரும் லாபத்தை சந்தித்துள்ளதாக பொருளாதார வல்லுநர்கள் கூறியுள்ளனர். ஆட்டத்தின் போது இவரின் ஆக்ரோஷமே இவருக்கான பிராண்ட் மதிப்பாக இருந்து வருவதால், இவருக்கான மதிப்பு ஏகபோகத்திற்கு இருந்தது.
கோலியின் சந்தை மதிப்பு
இந்நிலையில் இந்திய அணியின் கேப்டன் பதவியில் இருந்து விலகினாலும் விராட் கோலியின் சந்தை மதிப்பில் எந்தவித பாதிப்பும் ஏற்படாது என்பதே உண்மை. ஏற்கனவே போடப்பட்டுள்ள ஒப்பந்தங்களின் படி அடுத்த 2 ஆண்டுகளுக்கு அவரின் சந்தை மதிப்பில் எந்தவொரு நிறுவனமும், வருமானத்தை குறைக்க முடியாது எனத் தெரிவிக்கப்பட்டுள்ளது.
விளம்பர வருமானங்கள்
விராட் கோலி கடந்த 2021ம் ஆண்டில் மட்டும் 30 பெரும் நிறுவனங்களுக்காக நடித்துக் கொடுத்துள்ளார். இதன் மூலம் ரூ.179 கோடி வரை வருமானம் பெற்றுள்ளார் எனத்தெரிகிறது. அவர் விளம்பரத்தில் நடித்துக் கொடுக்க ஒருநாள் ஊதியமாக ரூ.7 - 8 கோடி பெறுகிறார். 2022ம் ஆண்டிற்காக மேலும் சில நிறுவனங்கள் ஒப்பந்தம் போட்டுள்ளதாக தெரிகிறது.
Recommended Video
இன்ஸ்டாகிராம் பதிவுகள்
விராட் கோலிக்கு விளம்பரங்களை தவிர்த்து சமூக வலைதள பதிவுகளுக்கும் கோடி கணக்கில் ஊதியம் கிடைக்கிறது. அவர் இன்ஸ்டாகிராம் பக்கத்தில் போடும் ஒரே ஒரு பதிவுக்கு மட்டும் ரூ.5 கோடி வரை ஊதியமாக வழங்கப்படுகிறது.
ஏனென்றால் அவரை இன்ஸ்டாகிராமில் சுமார் 15 கோடி மக்கள் பின் தொடர்கின்றனர். உலகளவில் அதிகம் பின் தொடரப்படும் விளையாட்டு வீரர்களில் 4வது இடத்தில் உள்ளார். இனி வரும் காலங்களிலும் அவரின் பேட்டிங் அதிரடிகளால் ஊதியங்கள் கூடும் என எதிர்பார்க்கப்படுகிறது.