ராக்கெட் சர்வீஸ்
ராக்கெட் சர்வீஸ் என்று இதனை வர்ணிக்கின்றனர் டென்னிஸ் ரசிகர்கள். புல்லட் போல படு வேகமாக போட்டார் இந்த சர்வீஸை வீனஸ்.
மணிக்கு 209 கிலோமீட்டர் வேகம்
இந்த சர்வீஸ் மணிக்கு 209 கிலோமீட்டர் என்ற வேகத்தில் அதிரடியாக இருந்தது.
ஆனால் உலக சாதனை இல்லை
இந்த ராக்கெட் சர்வீஸ், உலகின் அதி வேக சர்வீஸாகவும் கருதப்பட்டது. ஆனால் அதை மகளிர் டென்னிஸ் சங்க நிர்வாகிகள் சாதனையாக அங்கீகரிக்க மறுத்து விட்டனர்.
உரிய முறையில் கணக்கிடவில்லை
இதுகுறித்து அவர்கள் கூறுகையில், டோக்கியோ தொடரில் சர்வீஸ்களின் வேகத்தைக் கணக்கிடும் உரிய கருவி வைக்கப்படவில்லை. அங்கிருந்தவை நம்பகத்தன்மை இல்லாதவை. எனவே இந்த சர்வீஸின் கணக்கை வைத்து அதி வேக சர்வீஸ் என்ற முடிவுக்கு வருவது கடினம். எனவே வீனஸின் சர்வீஸ் வேகம் சாதனையாக கருதப்பட முடியாது என்று கூறி விட்டனர்.
33 வயதில் புத்துணர்ச்சியுடன் ஆட்டம்
வீனஸுக்கு தற்போது 33 வயதாகிறது. இடையில் சரியான பார்மில் அவர் இல்லை. இந்தத் தொடரில் அவர் தொடக்கம் முதலே விறுவிறுப்புடன் ஆடி வருகிறார். அதன் பிரதிபலிப்பே இந்த அதி வேக சர்வீஸ்.
ஆனாலும் சாதனைக்காரிதான்
இருப்பினும் வீனஸ் ஏற்கனவே சர்வீஸில் உலக சாதனை படைத்தவர்தான். 2007 அமெரிக்க ஓபன் டென்னிஸ் போட்டியில் அவர் மணிக்கு 207.6 கிலோமீட்டர் என்ற வேகத்தில் சர்வீஸ் போட்டு சாதனை படைத்தவர் ஆவார். அதேபோல 2008ம் ஆண்டிலும் இதே வேகத்தில் சர்வீஸ் போட்டுள்ளார்.
63வது இடத்தில்
தற்போது 63வது தரவரிசையில் இருக்கும் வீனஸ், 7 முறை கிராண்ட் ஸ்லாம் பட்டம் வென்றவர் ஆவார். ஆனால் காயம், உடல் சுகவீனம் போன்றவற்றால் அவரது டென்னிஸ் வாழ்க்கை பெரும் சரிவுக்குப் போய் விட்டது.
நானா போட்டேன்...
டோக்கியோ போட்டியில் அதி வேகமாக சர்வீஸ் போட்டது குறித்து வீனஸ் கூறுகையில், நான் வேகமாக சர்வீஸ் போடுவதாக உணர்ந்தேன். ஆனால் இந்த வேகத்தில் அது இருக்கும் என்று நான் எதிர்பார்க்கவில்லை. என்னாலேயே நம்ப முடியவில்லை. நான் மீண்டும் நல்ல பார்மில் இருப்பதாகவும் உணர்கிறேன் என்றார் அவர்.
எங்கே ஓய்வு பெறுவது...
ஓய்வு குறித்த கேள்விக்கு அவர் பதிலளிக்கையில் நான் நினைத்தால் கூட செரீனா விட மாட்டாள். நல்ல ஆரோக்கியத்துடனும், உடல் பலத்துடனும் இருக்கும் வரை ஆட வேண்டியதுதான் என்றார்.