நியூடெல்லி : மகளிர் உலக சாம்பியன்ஷிப் தொடரில் இந்தியாவின் மேரி கோம் தன் ஆறாவது உலக சாம்பியன்ஷிப் பட்டத்தை வென்று, உலக அளவில் சிறந்த குத்துச்சண்டை வீராங்கனை என்ற பெருமையை பெற்றுள்ளார்.
டெல்லியில் நடைபெற்று வரும் மகளிர் உலக சாம்பியன்ஷிப் தொடரில் மகளிர் 48 கிலோ எடைப் பிரிவு இறுதிப் போட்டிக்கு தகுதி பெற்ற இந்தியாவின் மேரி கோம், அந்த போட்டியில் உக்ரைன் நாட்டின் ஹன்னா ஒக்ஹோடாவை 5-0 என வீழ்த்தி வெற்றி பெற்றார். இதன் மூலம் தன் ஆறாவது சாம்பியன்ஷிப் பட்டத்தை வென்றார் மேரி கோம்.
இந்த 6வது சாம்பியன்ஷிப் பட்டத்தின் மூலம் மேரி கோம் கியூபாவின் பிரபல குத்துச்சண்டை வீரர் பெலிக்ஸ் சவானின் சாதனையை சமன் செய்துள்ளார். சவானும் ஆறு முறை உலக சாம்பியன்ஷிப் பட்டம் வென்றுள்ளார் என்பது குறிப்பிடத்தக்கது.
ஆடவர் மற்றும் மகளிர் பிரிவில் இணைந்து அதிக முறை சாம்பியன் பட்டம் வென்ற சாதனையை சமன் செய்துள்ள மேரி கோம், மகளிர் பிரிவில் அதிக முறை பட்டம் வென்று முதல் இடத்தை பிடித்துள்ளார். இதன் மூலம் உலக அளவில் பெரிய சாதனை செய்து இந்தியாவிற்கு பெருமை தேடித் தந்துள்ளார்.
A stellar achievement for #MaryKom , becoming the first woman boxer to win six world championship Gold. One of India's greatest ever sportsperson. Super happy and super proud ! pic.twitter.com/jw2V4QBulo
— Virender Sehwag (@virendersehwag) November 24, 2018
தன் முதல் உலக சாம்பியன்ஷிப் பதக்கத்தை தன் 19 வயதில் வென்றார். பின்னர் 16 ஆண்டுகள் கழித்து, தற்போது 35 வயதில் தன் ஆறாவது தங்கத்தை வென்றுள்ளார் மேரி கோம்.
2001இல் மகளிர் சாம்பியன்ஷிப் தொடரில் வெள்ளி வென்ற மேரி கோம், அடுத்து 2002, 2005, 2006, 2008, 2010 மற்றும் 2018இல் தங்கம் வென்று இருக்கிறார்.