வரலாற்றிலேயே முதல்முறையாக சிங்கப்பூர் ஓபனில் தங்கம் வென்ற இந்திய ஜோடி.. சாத்விக், சிராக் ஜோடி வெற்றி

சிங்கப்பூர்: 2026 சிங்கப்பூர் ஓபன் பேட்மிண்டன் தொடரில் இந்தியாவின் நட்சத்திர ஆடவர் ஜோடியான சாத்விக்சாய்ராஜ் ராங்கிரெட்டி மற்றும் சிராக் ஷெட்டி ஜோடி வரலாற்றுச் சாதனை படைத்துள்ளது. ஆடவர் இரட்டையர் பிரிவில் சாம்பியன் பட்டம் வென்று, இத்தொடரில் தங்கம் வென்ற முதல் இந்திய ஆடவர் இரட்டையர் ஜோடி என்ற பெருமையை இவர்கள் பெற்றுள்ளனர்.

ஞாயிற்றுக்கிழமை நடைபெற்ற விறுவிறுப்பான இறுதிப்போட்டியில், உலகத் தரவரிசையில் 4-வது இடத்தில் உள்ள சாத்விக் - சிராக் ஜோடி, இந்தோனேசியாவின் ஃபஜர் அல்பியான் மற்றும் முகமது ஃபிக்ரி ஜோடியை எதிர்கொண்டது. ஆட்டத்தின் தொடக்கத்தில் இந்திய ஜோடி சற்றே தடுமாறியது. முதல் கேமை 18-21 என்ற கணக்கில் இந்தோனேசிய ஜோடி கைப்பற்றியது.

எனினும், மனதிடம் தளராமல் விளையாடிய இந்திய வீரர்கள், அடுத்த இரண்டு கேம்களில் ஆக்ரோஷமான ஆட்டத்தை வெளிப்படுத்தினர். நீண்ட நேரம் நீடித்த 'ரேலிகளில்' திறமையாகச் செயல்பட்ட சாத்விக் - சிராக் ஜோடி, அடுத்தடுத்த கேம்களை 21-17, 21-16 என்ற கணக்கில் கைப்பற்றி சாம்பியன் பட்டத்தை தட்டிச் சென்றது. சுமார் 1 மணி 13 நிமிடங்கள் இந்த விறுவிறுப்பான ஆட்டம் நீடித்தது.

2 ஆண்டுகாலக் காத்திருப்பு

இந்த வெற்றியின் மூலம் தங்களது 2 ஆண்டுகால காத்திருப்புக்கு இந்திய ஜோடி முற்றுப்புள்ளி வைத்துள்ளது. கடைசியாக 2024-ம் ஆண்டு தாய்லாந்து ஓபன் தொடரில் இவர்கள் பட்டம் வென்றிருந்தனர். அதன் பிறகு 4 முறை பல்வேறு தொடர்களில் இறுதிப்போட்டி வரை முன்னேறியும், சாம்பியன் பட்டத்தை வெல்ல முடியாமல் ஏமாற்றம் அடைந்தனர். தற்போது சிங்கப்பூர் ஓபன் (சூப்பர் 750) பட்டத்தை வென்று மீண்டும் உலகின் முன்னணி ஜோடி என்பதை நிரூபித்துள்ளனர்.

இது இவர்களது ஒட்டுமொத்த பாட்மிண்டன் வாழ்வில் 9-வது வேர்ல்டு டூர் பட்டமாகும். மேலும், சூப்பர் 750 அந்தஸ்து கொண்ட தொடரில் இவர்கள் வெல்லும் 3-வது பட்டம் இது என்பது குறிப்பிடத்தக்கது. இந்தத் தொடரின் அரையிறுதியில் நடப்பு உலக சாம்பியன்களான தென்கொரிய ஜோடியை வீழ்த்தி இவர்கள் இறுதிப்போட்டிக்கு முன்னேறியிருந்தது குறிப்பிடத்தக்கது.

நெகிழ்ச்சியான கொண்டாட்டம்

வெற்றி உறுதியானதும் சாத்விக் மற்றும் சிராக் இருவரும் மைதானத்திலேயே படுத்துக் கொண்டு தங்களது மகிழ்ச்சியை வெளிப்படுத்தினர். சாத்விக் தனது சகோதரர் சமீபத்தில் தந்தை ஆனதை முன்னிட்டு, 'குழந்தையைத் தொட்டில் ஆட்டும்' செய்கையைச் செய்து அந்த வெற்றியைத் தனது குடும்பத்திற்கு அர்ப்பணித்தார். சிராக் தனது வழக்கமான ஆக்ரோஷமான முழக்கத்துடன் மைதானத்தில் நடனமாடி ரசிகர்களை உற்சாகப்படுத்தினார்.

RCB vs GT Final: ஆர்சிபி-க்கு ஆரம்பமே வெற்றி.. குஜராத் டைட்டன்ஸ் அணியில் இருந்து தமிழக வீரர் நீக்கம்

சிங்கப்பூர் மைதானத்தில் திரண்டிருந்த ரசிகர்கள் அளித்த பெரும் ஆதரவு தங்களுக்குப் பெரிய உந்துதலாக இருந்ததாக வெற்றிக்குப் பிறகு வீரர்கள் தெரிவித்தனர். இந்த வரலாற்று வெற்றி, இந்த சீசனின் அடுத்தடுத்த போட்டிகளில் இந்திய ஜோடிக்கு மிகப்பெரிய தன்னம்பிக்கையை அளிக்கும் என எதிர்பார்க்கப்படுகிறது.