வைபவ் சூர்யவன்ஷியின் தம்பி அசத்தல்! வெறும் 6 மாத பயிற்சியில் 10 வயதில் சதம் விளாசிய ஆஷிர்வாத்

பீகார் மாநிலம் சமஸ்திபூரின் தாஜ்பூர் பகுதியில் உள்ள மோதிப்பூர் கிராமத்தைச் சேர்ந்த சூர்யவன்ஷி குடும்பத்தில், வைபவ் சூர்யவன்ஷி ஏற்கனவே தனது கிரிக்கெட் திறமையால் பலரையும் கவர்ந்துள்ளார். இப்போது அக்குடும்பத்திலிருந்து மற்றொரு இளம் வீரரான 10 வயது ஆஷிர்வாத் சூர்யவன்ஷியும் அனைவரது கவனத்தையும் ஈர்க்கத் தொடங்கியுள்ளார்.

வைபவின் தம்பியான ஆஷிர்வாத், தனது கிரிக்கெட் பயணத்தின் ஆரம்பத்திலேயே ஒரு சிறந்த பேட்டிங் திறமையை வெளிப்படுத்தியுள்ளார். தாஜ்பூர் கிரிக்கெட் அகாடமியில் சேர்ந்த வெறும் ஆறு மாதங்களிலேயே, ஆஷிர்வாத் தனது முதல் பயிற்சி ஆட்டத்தில் 87 பந்துகளில் 103 ரன்கள் எடுத்து விளாசியுள்ளார். இந்த இன்னிங்ஸில் 20 பவுண்டரிகளும், ஒரு சிக்ஸரும் அடங்கும்.

இது ஒரு உள்ளூர் பயிற்சிப் போட்டியாக இருந்தாலும், தற்போது இலங்கை ஏ கிரிக்கெட் முத்தரப்பு தொடரில் இந்திய ஏ அணிக்காக விளையாடி வரும் வைபவ், தனது தம்பியின் ஸ்கோர்கார்டை சமூக ஊடகங்களில் பகிர்ந்து கொண்டார். அதன் பின்னரே இச்செய்தி பலரையும் சென்றடைந்தது.10 வயது சிறுவனான ஆஷிர்வாத் மீது அனைவரது கவனத்தையும் திருப்பியதோடு, சூர்யவன்ஷி குடும்பத்தில் இருந்து உருவாகும் மற்றொரு வளர்ந்து வரும் வீரரைப் பற்றிய ஆர்வத்தையும் தூண்டியுள்ளது.

வைபவ் சூர்யவன்ஷி கை கலப்பில் ஈடுபட கூடாது.. சச்சினை பார்த்து கத்துக்கோங்க.. வசீம் ஜாபர் அறிவுரை

வெறும் ஆறு மாதப் பயிற்சி மட்டுமே

ஆஷிர்வாத்தின் இந்த சதம் மிகவும் வியக்கத்தக்க ஒன்றாக இருப்பதற்கு முக்கியக் காரணம், அவர் கிரிக்கெட் விளையாடத் தொடங்கி வெறும் ஆறு மாதங்களே ஆகிறது என்பதுதான். அவர் இந்த விளையாட்டை மிக விரைவாகக் கற்றுக்கொண்டு அனைவரையும் கவர்ந்துள்ளார்.

"ஆஷிர்வாத் வெறும் 6 மாதங்களுக்கு முன்புதான் கிரிக்கெட் விளையாடத் தொடங்கினார். ஆனால் அவர் பேட் பிடிக்கும் விதம் (Bat handling) மற்றும் கிரிப் ஆகியவற்றை மிக விரைவாகக் கற்றுக்கொண்டார்" என்று தாஜ்பூர் கிரிக்கெட் அகாடமியை நடத்தி வரும் ஆஷிர்வாத்தின் பயிற்சியாளர் சந்திர தீப் தெரிவித்தார்.

மூத்த சகோதரரான வைபவ் சென்ற பாதையிலேயே இந்த இளைய சூர்யவன்ஷியும் பயணிப்பதாக பயிற்சியாளர் நம்புகிறார். "பெரியவர் பெரியவர்தான், ஆனால் சிறியவர் இன்னும் ஒரு படி மேலே போவார் என்ற பழமொழி இதற்கு மிகச் சரியாகப் பொருந்தும். இரு சகோதரர்களும் சேர்ந்து எதிரணிக்குச் சிம்மசொப்பனமாக மாறுவார்கள்" என்று சந்திர தீப் பெருமையுடன் கூறினார்.

ஒரே மைதானம், ஒரே கனவு

வைபவ்வின் கிரிக்கெட் கனவு எங்கு தொடங்கியதோ, அதே மைதானத்தில்தான் ஆஷிர்வாத்தின் பயணமும் தொடங்கியுள்ளது. இவர்களது வீட்டிற்குப் பின்னால் இரண்டு பயிற்சி ஆடுகளங்கள் (பிட்ச்கள்) உள்ளன. ஒன்று சிமெண்ட் ஆடுகளம், மற்றொன்று மண் ஆடுகளம். சிறுவயதில் வைபவ் தனது திறமையை வளர்த்துக்கொள்ள இதே ஆடுகளங்களில்தான் பல மணிநேரம் செலவிட்டார். இன்று, அதே மைதானத்தில் ஆஷிர்வாத்தும் பயிற்சி பெற்று வருகிறார்.

பயிற்சியாளர் சந்திர தீப் கூறுகையில், இந்த இரண்டு ஆடுகளங்களும் முற்றிலும் மாறுபட்ட சவால்களை வழங்குவதோடு, வைபவின் ஆட்டத்தை மேம்படுத்துவதில் முக்கியப் பங்கு வகித்ததாகத் தெரிவித்தார். இப்போது ஆஷிர்வாத்தும் அதே கடினமான பயிற்சியை மேற்கொண்டு வருகிறார். "சிமெண்ட் ஆடுகளத்தில் பந்து அதிக வேகத்தில் வரும். மண் ஆடுகளத்தில் பந்து வேகம் குறைந்து, சுழலும் என்பதால் அங்கு பேட்டிங் செய்வது மிகவும் கடினமாக இருக்கும். வைபவ் சிறுவயதிலிருந்தே இந்த இரண்டு பிட்ச்களிலும் பயிற்சி செய்தார், இப்போது ஆஷிர்வாத்தும் அதைத்தான் செய்கிறார்" என்றார்.

வைபவ்வின் நகல் அல்ல

இரு சகோதரர்களுக்கும் இடையே ஒப்பீடுகள் வருவது இயல்பான ஒன்றுதான், ஆனால் ஆஷிர்வாத், வைபவ்வின் அச்சு அசலான நகல் அல்ல.வைபவ் இடது கை பேட்ஸ்மேன் மற்றும் ஸ்பின் பந்துவீச்சாளர் ஆவார். ஆனால் ஆஷிர்வாத் வலது கை பேட்ஸ்மேன் மற்றும் வலது கை மிதவேக பந்துவீச்சாளர் (medium pacer) ஆவார்.

தற்போதைய கிரிக்கெட் வீரர்களில் யாரையாவது ஆஷிர்வாத் நினைவூட்டுகிறாரா என்று பயிற்சியாளரிடம் கேட்டபோது, அவர் ஒரு சுவாரஸ்யமான ஒப்பீட்டைத் தந்தார். "வைபவ்விற்கு இயற்கையாகவே பேட் ஸ்விங் நன்றாக இருந்தது. ஆனால் ஆஷிர்வாத் தனது சொந்த வழியைத் தேர்ந்தெடுத்துள்ளார். அவர் என்னவாக விரும்புகிறார் என்று ஒருமுறை கேட்டபோது, தான் ஒரு ஆல்-ரவுண்டர் ஆக வேண்டும் என்றார். அவர் பார்க்க ஹர்திக் பாண்டியா போல இருக்கிறார். பேட்டிங், பந்துவீச்சு என இரண்டிலும் சிறந்து விளங்குகிறார்" என்று சந்திர தீப் தெரிவித்தார்.

அண்ணனைப் பார்த்து கற்றுக் கொள்ளும் பாடங்கள்

ஆஷிர்வாத் தனது அண்ணன் வைபவ் பயிற்சி செய்வதை மணிக்கணக்கில் பார்த்துள்ளார். வீட்டில் இருந்தாலும் அல்லது பயிற்சி ஆட்டங்களின் போதாக இருந்தாலும், அவர் தனது அண்ணனை உன்னிப்பாகக் கவனித்து, மெதுவாக கிரிக்கெட்டில் ஆர்வத்தை வளர்த்துக்கொண்டார்.

பயிற்சியாளர் சந்திர தீப்பின் கூற்றுப்படி, ஆஷிர்வாத் மிகவும் அமைதியான பையன், அதிகம் பேசுவதை விட தனது ஆட்டத்தில் கவனம் செலுத்துவதையே விரும்புகிறார். "நான் என் அண்ணனைப் போல விளையாட விரும்புகிறேன், அவரைப் போலவே கடுமையாக உழைக்க விரும்புகிறேன் என்று அவன் கூறுகிறான். வைபவ் அவனுக்கு ஒரு பெரிய உத்வேகமாக இருந்துள்ளார்" என்று பயிற்சியாளர் கூறினார்.

வைபவ்வின் வெற்றியை ஆஷிர்வாத் அளவுக்கு வேறு யாரும் இவ்வளவு தீவிரமாகக் கொண்டாடியிருக்க மாட்டார்கள். வைபவ் தனது அசத்தலான 2026 ஐபிஎல் தொடரில் 237.30 ஸ்டிரைக் ரேட்டுடன் 776 ரன்கள் குவித்தபோதும், 19 வயதுக்குட்பட்டோருக்கான உலகக் கோப்பையில் விளையாடியபோதும், வீட்டில் பட்டாசு வெடித்து ஆஷிர்வாத் கொண்டாடியுள்ளார். தொலைக்காட்சியில் வைபவ்வின் போட்டிகள் ஒளிபரப்பப்படும் போதெல்லாம், ஆஷிர்வாத் திரையை விட்டு நகரவே மாட்டார்.

கவர் டிரைவ் மற்றும் மீன் பிரியர்

வைபவ் போல, ஆஷிர்வாத்திற்கும் ஒரு பிடித்தமான ஷாட் உள்ளது - அதுதான் கவர் டிரைவ். அவரது அன்றாட வழக்கமே கிரிக்கெட்டைச் சுற்றியே சுழல்கிறது, காலையில் உடற்பயிற்சி, அதைத் தொடர்ந்து நீண்ட பேட்டிங் பயிற்சி என அவரது நாட்கள் நகர்கின்றன.

கிரிக்கெட் பயிற்சி முடிந்ததும், அவருக்கு மிகவும் பிடித்த ஒரு விஷயம் உண்டு. மீன் உணவு. கிரிக்கெட்டைப் போலவே, உணவுத் தேர்வுகளிலும் இந்த இரண்டு சகோதரர்களும் வேறுபடுகிறார்கள். வைபவ் வளர்ந்து வரும் காலத்தில் மட்டன் (ஆட்டுக்கறி) பிரியராக அறியப்பட்டவர், ஆனால் ஆஷிர்வாத்திற்கு மீன் இல்லாமல் இருக்க முடியாது. "அவருக்கு மீன் என்றால் மிகவும் பிடிக்கும். உணவோடு மீன் கண்டிப்பாக இருக்க வேண்டும்" என்று பயிற்சியாளர் கூறினார்.

அண்ணன் சதம் அடிப்பதை நேரில் காண ஆவல்

இங்கிலாந்து மற்றும் அயர்லாந்து சுற்றுப்பயணத்திற்கான இந்தியாவின் டி20 அணியிலும், ஆசிய விளையாட்டுப் போட்டிகளுக்கான இந்திய அணியிலும் வைபவ் தேர்வு செய்யப்பட்டுள்ளார். இந்த சாதனையை படைத்த மிக இளம் வீரர் என்ற பெருமையையும் அவர் பெற்றுள்ளார். இதனால், ஒட்டுமொத்தக் குடும்பத்தின் வெளிச்சமும் இப்போது அவரது தம்பியின் மீதும் விழத் தொடங்கியுள்ளது.

வைபவ் சூர்யவன்ஷி ஒரு சின்ன குழந்தை.. பிசிசிஐ செய்த சிறப்பு ஏற்பாடு.. விவரம்

அவர்களது குடும்பம் விரைவில் இங்கிலாந்துக்கு செல்ல உள்ள நிலையில், இந்த இளம் சிறுவனின் மகிழ்ச்சிக்கு எல்லையே இல்லை. எல்லாவற்றிற்கும் மேலாக, வைபவ் நேரில் சதம் அடிப்பதை அவர் பார்க்க விரும்புகிறார். "அவன் தன் குடும்பத்துடன் இங்கிலாந்து செல்ல உள்ளான், இதனால் மிகவும் மகிழ்ச்சியாக இருக்கிறான். அண்ணன் சதம் அடிப்பதை நேரில் பார்க்க வேண்டும் என்று சொல்கிறான்" என்று பயிற்சியாளர் நிறைவு செய்தார்.சூர்யவன்ஷி குடும்பத்திற்கு, தங்களது வீட்டிற்கு பின்னால் உள்ள இரண்டு எளிய ஆடுகளங்களில் தொடங்கிய கனவு, இப்போது அதன் இரண்டாவது அத்தியாயத்தை நோக்கி நகரத் தொடங்கியுள்ளது.