IND vs WI: 134 கிமீ.. அந்த இடத்தில் பட்ட பந்து.. சுருண்டு விழுந்த கே எல் ராகுல்.. என்ன நடந்தது?

டெல்லி: வெஸ்ட் இண்டீஸ் அணிக்கு எதிரான இரண்டாவது டெஸ்ட் போட்டியில் 121 ரன்கள் என்ற எளிய வெற்றி இலக்கை நோக்கி இந்திய அணி தனது இரண்டாவது இன்னிங்ஸைத் தொடங்கிய நிலையில், வெஸ்ட் இண்டீஸ் வேகப்பந்து வீச்சாளர் ஜெய்டன் சீல்ஸ் வீசிய பந்து, இந்தியத் தொடக்க வீரர் கே.எல். ராகுலின் "பாக்ஸ்" பகுதியில் (Box) பலமாகத் தாக்கியது. அதனால், அவர் வலியால் துடித்து மைதானத்திலேயே சுருண்டு விழுந்தார்.

டெல்லியில் நடைபெற்று வரும் இந்த டெஸ்ட் போட்டியின் நான்காம் நாள் ஆட்டத்தில், ஃபாலோ-ஆன் பெற்று இரண்டாவது இன்னிங்ஸ் ஆடி வந்த வெஸ்ட் இண்டீஸ் அணி, ஜான் கேம்ப்பெல் (115) மற்றும் ஷாய் ஹோப் (103) ஆகியோரின் சாதனை சதங்களால், 390 ரன்கள் குவித்து ஆல் அவுட் ஆனது. இதன்மூலம், இந்திய அணிக்கு 121 ரன்கள் என்ற இலக்கை நிர்ணயித்தது.

ராகுலைத் தாக்கிய 'நாஸ்டி' டெலிவரி!

121 ரன்கள் என்ற இலக்கை விரட்ட, இந்தியத் தொடக்க வீரர்களான யஷஸ்வி ஜெய்ஸ்வால் மற்றும் கே.எல். ராகுல் களமிறங்கினர். ஜெய்ஸ்வால் (4) ஜோமல் வாரிக்கன் பந்துவீச்சில் ஆட்டமிழந்த பிறகு, இந்திய அணியின் பொறுப்பு ராகுலின் தோள்களில் இறங்கியது.

ஜெய்டன் சீல்ஸ் வீசிய ஒரு ஓவரில், ராகுல் ஒரு பவுண்டரி அடித்தார். ஆனால், அதற்கு அடுத்த பந்திலேயே சீல்ஸ் தனது லென்த்தை சற்றே பின்னுக்கு இழுத்து, கூடுதல் வேகத்துடன் வீசினார். 134 கிலோமீட்டர் வேகத்தில் வந்த பந்து, எதிர்பார்த்ததை விட அதிகமாக எகிறி, நேராக கே.எல். ராகுலின் "பாக்ஸ்" பகுதியில் பலமாகத் தாக்கியது.

அந்தத் தாக்குதலின் வேகம் தாங்க முடியாமல், ராகுல் வலியால் துடித்து, மைதானத்திலேயே சுருண்டு விழுந்தார். அவரது வலியின் தீவிரத்தைக் கண்ட வெஸ்ட் இண்டீஸ் வீரர்கள் உடனடியாக அவரை நோக்கி ஓடிவர, இந்திய அணியின் பிசியோதெரபிஸ்ட் உடனடியாகக் களத்திற்குள் விரைந்து வந்து அவருக்கு முதலுதவி அளித்தார். சில நிமிட சிகிச்சைக்குப் பிறகு, ராகுல் வலியைப் பொறுத்துக்கொண்டு மீண்டும் பேட்டிங் செய்யத் தயாரானார்.

காயத்திலிருந்து மீண்டு வந்த சாய் சுதர்சன்

ஜெய்ஸ்வால் ஆட்டமிழந்த பிறகு, மூன்றாவது வீரராக சாய் சுதர்சன் களமிறங்கியது இந்திய ரசிகர்களுக்கு ஆச்சரியத்தையும், மகிழ்ச்சியையும் அளித்தது. இந்தப் போட்டியின் இரண்டாம் நாளில் காயம் காரணமாக ஃபீல்டிங்கில் பங்கேற்காத அவர், அனைத்து சந்தேகங்களையும் தகர்த்து, களமிறங்கி, மிகவும் நேர்த்தியாக 30 ரன்கள் எடுத்து ஆட்டமிழக்காமல் இருக்கிறார்.

நான்காம் நாள் ஆட்ட நேர முடிவில், இந்திய அணி 1 விக்கெட் இழப்பிற்கு 63 ரன்கள் எடுத்துள்ளது. வெற்றிக்கு இன்னும் 58 ரன்கள் மட்டுமே தேவை என்ற நிலையில், இந்திய அணி வெற்றியின் விளிம்பில் உள்ளது.