துரிதமாக 6000 ரன்கள் குவித்தவர்கள் லிஸ்ட்டில் "கடவுள்" இல்லை!

By Sutha

Published: Monday, October 26, 2015, 10:40 [IST]

சென்னை: ஒரு நாள் போட்டிகளில் துரிதமாக 6000 ரன்கள் குவித்த டாப் 10 வீரர்கள் பட்டியலில் சச்சின் டெண்டுல்கர் இல்லை. இந்தியாவைச் சேர்ந்தவர்களில் கோஹ்லியும், கங்குலியும் மட்டுமே உள்ளனர்.

ஒரு நாள் கிரிக்கெட் போட்டிகளில் துரித கதியில் 6000 ரன்கள் சேர்த்த வீரர் என்ற பெருமையை அம்லா நேற்று பெற்றார். கிட்டத்தட்ட ஒரு வருடமாக இருந்து வந்த சாதனையை அவர் நேற்று முறியடித்தார்.

இந்த சாதனை இதுவரை கோஹ்லியிடம் இருந்து வந்தது. தற்போது அது அம்லாவிடம் போய் விட்டது.

1-ம் 10ம் தென் ஆப்பிரிக்காவே

தற்போது துரிதகதியில் 6000 ரன்களைக் குவித்த டாப் 10 வீரர்களில் முதலிடத்திலும், கடைசி இடத்திலும் தென் ஆப்பிரிக்க வீரர்களே உள்ளனர். 10வது இடத்தில் இருப்பவர் முன்னாள் கேப்டன் கிரீம் ஸ்மித் ஆவார்.

123 இன்னிங்ஸ்களில்

ஹசிம் அம்லா தனது 123வது இன்னிங்ஸில் 6000 ரன்களைத் தொட்டு சாதனை படைத்துள்ளார். இது மிகப் பெரிய சாதனையுமாகும். விளையாட வந்து 7 ஆண்டுகள் முடிவடையும் நிலையில் இந்த சாதனையை அவர் செய்துள்ளார்.

2வது இடத்தில் கோஹ்லி

2வது இடத்தில் இருக்கும் விராத் கோஹ்லி 136 இன்னிங்ஸ்களில் 6000 ரன்களைக் கடந்தார். விளையாட வந்து 6 வருடம் 83 நாட்களில் இந்த சாதனையை அவர் செய்திருந்தார்.

3வது இடத்தில் ரிச்சர்ட்ஸ்

மேற்கு இந்தியத் தீவுகள் ஜாம்பவான் விவியன் ரிச்சர்ட்ஸ் கடந்த 1989ம் ஆண்டு 141 இன்னிங்ஸ்களில் 6000 ரன்களைக் கடந்திருந்தார். அந்த சாதனை நீண்ட காலமாக உடைக்கப்படாமல் இருந்தது குறிப்பிடத்தக்கது.

கங்குலி

இந்திய வீரர்களில் கங்குலி 147 இன்னிங்ஸ்களில் 6000 ரன்களைக் குவித்திருந்தார். அதேபோல ஆப் டிவிட்டிலியர்ஸும் இதே அளவிலான இன்னிங்ஸ்களில் 6000 ரன்களைக் குவித்துள்ளார்.