ஷமி, இஷான் கிஷன், சர்பராஸ், ரஜத் உள்பட 9 டெஸ்ட் அணி வீரர்களை உள்ளூர் மேட்ச் ஆட வைத்த பிசிசிஐ

மும்பை: இலங்கை அணிக்கு எதிரான டெஸ்ட் தொடரில் இடம் பெறாத இந்திய சீனியர் மற்றும் நட்சத்திர வீரர்கள் தற்போது துலீப் டிராபி தொடரில் விளையாட வேண்டிய கட்டாயத்திற்குத் தள்ளப்பட்டுள்ளனர். இந்திய டெஸ்ட் அணியில் புறக்கணிக்கப்பட்டு, உள்ளூர் போட்டிகளில் விளையாடவுள்ள 9 முக்கிய வீரர்கள் குறித்து இங்கே காண்போம்.

துலீப் டிராபியில் மத்திய மண்டலப் அணியின் கேப்டனாக நியமிக்கப்பட்டுள்ள ரஜத் படிதார், 2024-ல் இந்திய அணிக்காக 3 டெஸ்ட் போட்டிகளில் விளையாடியுள்ளார். அதேபோல், கடந்த 2023 வெஸ்ட் இண்டீஸ் தொடருக்குப் பின் இந்திய டெஸ்ட் அணியில் புறக்கணிக்கப்பட்ட இஷான் கிஷன், இம்முறை கிழக்கு மண்டல அணியின் கேப்டனாக நியமிக்கப்பட்டுள்ளார்.

மேலும், காயம் மற்றும் பார்ம் அவுட் காரணமாக இந்திய அணியில் நீண்ட நாட்களாக இடம் கிடைக்காத நட்சத்திர வேகப்பந்து வீச்சாளர் முகமது ஷமியும் கிழக்கு மண்டல அணியில் இடம் பெற்றுள்ளார். சர்வதேச டெஸ்ட் போட்டிகளில் 229 விக்கெட்டுகள் வீழ்த்திய ஷமி கிழக்கு மண்டல அணியின் பந்துவீச்சை வழிநடத்த உள்ளார்.

கடந்த 2025 ஜூலைக்குப் பிறகு இந்திய டெஸ்ட் அணியில் இடம் மறுக்கப்பட்டுள்ள ஆல்-ரவுண்டர் ஷர்துல் தாக்கூர், ருதுராஜ் கெய்க்வாட் தலைமையிலான மேற்கு மண்டல அணியில் விளையாடுகிறார். அதே அணியில், 6 டெஸ்ட் போட்டிகளில் விளையாடி 2024 நவம்பருக்குப் பின் இந்திய அணியில் இருந்து கழற்றிவிடப்பட்ட மும்பை பேட்ஸ்மேன் சர்பராஸ் கானும் இடம் பெற்றுள்ளார்.

டெஸ்ட் கிரிக்கெட்டில் முச்சதம் அடித்த சாதனையாளரான கருண் நாயர் தெற்கு மண்டல அணிக்காகவும், அறிமுக டெஸ்டிலேயே சதம் விளாசி தற்போது அணியில் இடம் கிடைக்காமல் தவிக்கும் பிரித்வி ஷா மேற்கு மண்டல அணிக்காகவும் விளையாட உள்ளனர். இளம் வயதிலேயே அறிமுக டெஸ்டில் சதம் அடித்த பிரித்வி ஷாவுக்கு இந்த தொடர் ஒரு முக்கியமான திருப்புமுனையாக அமைய வாய்ப்பு உள்ளது.

"உங்களுக்கு காதும் கேட்கல, கண்ணும் தெரியல ரிட்டையர் ஆகுங்க".. சச்சினுக்காக அம்பயரிடம் எகிறிய சேவாக்

கடந்த 2025-ம் ஆண்டு இங்கிலாந்துக்கு எதிராக டெஸ்டில் அறிமுகமான அன்ஷுல் கம்போஜ் வடக்கு மண்டல அணிக்காகவும், இந்தியாவின் சார்பாக 3 டெஸ்ட் போட்டிகளில் விளையாடிய முகேஷ் குமார் கிழக்கு மண்டல அணிக்காகவும் விளையாட உள்ளனர். இம்முறை 6 அணிகள் பங்கேற்கும் துலீப் டிராபி தொடர் ஆகஸ்ட் 23 முதல் செப்டம்பர் 10 வரை பிசிசிஐ-யின் தேசிய அகாடமியில் நடைபெற உள்ளது. தேசிய அணியில் இடம் கிடைக்காத இந்த 9 வீரர்களும், தங்களை மீண்டும் நிரூபிக்க உள்ளூர் போட்டிகளில் போராட வேண்டிய நிலைக்குத் தள்ளப்பட்டுள்ளனர்.