உலக சாதனைகளை சுக்குநூறாக்கிய இந்திய புயல்.. அபிஷேக் சர்மா உடைத்த ரெக்கார்டுகள் இவைதான்!

வெலிங்டன்: நியூசிலாந்துக்கு எதிரான 3-வது டி20 போட்டியில், இந்திய தொடக்க ஆட்டக்காரர் அபிஷேக் சர்மா 35 பந்துகளில் சதம் விளாசி பல உலக சாதனைகளை உடைத்து இருக்கிறார். நியூசிலாந்து நிர்ணயித்த 199 ரன்கள் இலக்கை இந்தியா 40 பந்துகள் மீதமிருக்க எட்டிப்பிடித்து அபார வெற்றி பெற்றது. முழு உறுப்பு நாடுகள் மோதிய டி20 வரலாற்றில் 190 ரன்களுக்கு மேற்பட்ட இலக்கை அதிக பந்துகள் மீதம் வைத்து சேஸ் செய்த புதிய உலக சாதனையை இந்தியா நிகழ்த்தியுள்ளது.

இந்த ஆட்டத்தில் அபிஷேக் சர்மா 11 சிக்சர்களைப் பறக்கவிட்டார். இதன் மூலம் சர்வதேச டி20 போட்டிகளில் 3 முறை 10 அல்லது அதற்கு மேற்பட்ட சிக்சர்களை அடித்த உலகின் முதல் முழு உறுப்பு நாட்டு வீரர் என்ற அரிய சாதனையை இவர் படைத்தார். மேலும் சர்வதேச டி20 அரங்கில் ரோஹித் சர்மாவின் 35 பந்து சத சாதனையை இவர் சமன் செய்தார். இவர் ஏற்கனவே ஆப்கானிஸ்தானுக்கு எதிராக 30 பந்துகளில் சதம் அடித்து உலக சாதனை படைத்தவர் என்பது குறிப்பிடத்தக்கது.

ஒட்டுமொத்த டி20 கிரிக்கெட்டில் தனது 11-வது சதத்தைப் பதிவு செய்த அபிஷேக் சர்மா, விராட் கோலி (10), டேவிட் வார்னர் (10) மற்றும் குயின்டன் டி காக் (10) ஆகியோரை முந்தி புதிய வரலாற்று மைல்கல்லை எட்டியுள்ளார். தற்போது கிறிஸ் கெயில் (22), பாபர் அசாம் (13) ஆகியோருக்கு அடுத்தபடியாக உலக அளவில் 3-வது இடத்தைப் பிடித்துள்ளார். சர்வதேச டி20 போட்டிகளில் இது இவரது 4-வது சதமாகும். இதன் மூலம் சூர்யகுமார் யாதவின் 4 சத சாதனையை இவர் சமன் செய்தார்.

மேலும் வைபவ் சூர்யவன்ஷியுடன் இணைந்து முதல் விக்கெட்டுக்கு 18.13 ரன் ரேட்டில் விளாசி, சர்வதேச டி20 வரலாற்றிலேயே அதிவேகமாக 100 ரன்கள் பார்ட்னர்ஷிப் அமைத்த புதிய உலக சாதனையை அபிஷேக் படைத்தார்.

IND vs NZ: அபிஷேக் அடித்த அடியில் 5 பந்தில் ஓவரை முடித்த அம்பயர்.. பதறிய வீரர்கள்.. என்ன நடந்தது?

அத்துடன் இந்திய டி20 வரலாற்றில் ஒரு இன்னிங்ஸில் அதிக சிக்சர்கள் அடித்த சாதனைப் பட்டியலில் முதல் 3 இடங்களையும் (13, 11, 11 சிக்சர்கள்) அபிஷேக் தன்வசம் வைத்துள்ளார். இந்த சாதனைகள் மூலம் சர்வதேச கிரிக்கெட்டின் தவிர்க்க முடியாத புதிய சகாப்தமாக அபிஷேக் சர்மா உருவெடுத்துள்ளார்.