திரும்ப பெறப்பட்ட அபிஷேக் சர்மாவின் அரைசதம்.. 50 ரன்களிலிருந்து 49 ரன்களாக குறைப்பு.. என்ன நடந்தது?

பெல்ஃபாஸ்ட்: அயர்லாந்துக்கு எதிரான முதலாவது டி20 போட்டியில், இந்திய அணி 34 ரன்கள் வித்தியாசத்தில் தோல்வியடைந்தது. இந்தப் போட்டியில் இந்திய அணியின் தொடக்க ஆட்டக்காரர் அபிஷேக் சர்மா அதிரடியாக விளையாடி அரைசதம் குவித்தார். இருப்பினும், 183 ரன்கள் என்ற இலக்கை நோக்கி விளையாடிய இந்திய அணி 148 ரன்களுக்கு ஆல்-அவுட் ஆனதால், அவரது சிறப்பான ஆட்டம் வீணானது.

போட்டி நடந்து கொண்டிருந்த போது அபிஷேக் சர்மாவின் ரன் கணக்கில் சிறிய குழப்பம் ஏற்பட்டது. எட்டாவது ஓவரில் லியாம் மெக்கார்த்தி வீசிய பந்தில் ஒரு ரன் எடுத்தபோது, அவர் தனது அரைசதத்தை எட்டியதாக நேரலை ஒளிபரப்பில் காட்டப்பட்டது. இந்திய அணியின் வீரர்கள் அமர்ந்திருந்த பகுதியில் இருந்து கைதட்டி பாராட்டினர்.

அபிஷேக் சர்மாவும் அவர்களுக்கு நன்றி தெரிவித்தார். ஆனால், அடுத்த பந்திலேயே அவர் டீப் மிட்-விக்கெட்டில் பெஞ்சமின் காலிட்ஸிடம் கேட்ச் கொடுத்து ஆட்டமிழந்தார். அப்போது ஸ்கோர்கார்டில் அவர் 20 பந்துகளில் 50 ரன்கள் எடுத்ததாகக் காட்டப்பட்டது. ஆனால், பின்னர் இரண்டாவது ஓவரில் நிகழ்ந்த 'லெக்-பை' திருத்தம் காரணமாக இவரது ரன் 49 ஆகக் குறைக்கப்பட்டது.

ஆர்ச்சரின் பந்துவீச்சை துவம்சம் செய்த 15 வயது சிறுவன்: சங்கக்காரா பகிர்ந்த பிரமிக்க வைக்கும் உண்மை!

இரண்டாவது ஓவரின் கடைசி பந்தில், இடதுகை வேகப்பந்து வீச்சாளர் ஜெய் மூந்த்ரா வீசிய பந்து ஷார்ட் ஃபைன் லெக் திசைக்குச் சென்றபோது அபிஷேக் சர்மா ஒரு ரன் எடுத்தார். அப்போது கள நடுவர் இதனை பேட்டில் பட்ட ரன் என்று அறிவித்தார். ஆனால், பின்னர் அது 'லெக்-பை' (Leg-bye) என திருத்தம் செய்யப்பட்டதால், அபிஷேக் சர்மாவின் ரன் எண்ணிக்கை 50-லிருந்து 49 ஆகக் குறைக்கப்பட்டது.

அபிஷேக் சர்மாவின் தனிநபர் போராட்டம்

இலக்கை நோக்கி விளையாடிய இந்திய அணி ஆரம்பத்திலேயே அடுத்தடுத்து விக்கெட்டுகளை இழந்து தவித்தபோது, அபிஷேக் சர்மா மட்டுமே தனி ஒருவராகப் போராடினார். இடதுகை ஆட்டக்காரரான அவர், இரண்டு சிக்ஸர்கள் மற்றும் ஏழு பவுண்டரிகளுடன் 245 என்ற அதிரடியான ஸ்டிரைக் ரேட்டில் ரன் குவித்தார். ஆனால், மற்ற பேட்டர்கள் யாரும் அதற்கு ஈடுகொடுத்து விளையாடவில்லை. ஆல்-ரவுண்டர் சிவம் துபே மட்டுமே ஓரளவுக்கு விளையாடி 15 பந்துகளில் 25 ரன்கள் (இரண்டு சிக்ஸர்கள், ஒரு பவுண்டரி) எடுத்தார்.

IND vs IRE: அயர்லாந்திடம் தோற்றதுக்கு காரணம் என்ன? உண்மையை ஒப்புக்கொண்ட அபிஷேக் சர்மா

அயர்லாந்து அணியின் கட்டுப்பாடான பந்துவீச்சு, இந்திய அணிக்கு எதிரான வரலாற்றுச் சிறப்புமிக்க முதல் வெற்றியை அவர்களுக்குப் பெற்றுத் தந்துள்ளது. சர்வதேச ஆண்கள் கிரிக்கெட்டில் இந்தியாவை அயர்லாந்து அணி வீழ்த்துவது இதுவே முதல் முறையாகும். அயர்லாந்து அணியின் மேத்யூ ஹம்ப்ரிஸ் மற்றும் மேத்யூ ஹாலார்ட் தலா மூன்று விக்கெட்டுகளை வீழ்த்தினர். இந்தத் தொடரின் இரண்டாவது மற்றும் இறுதி டி20 போட்டி ஜூன் 28, ஞாயிற்றுக்கிழமை அதே மைதானத்தில் நடைபெறவுள்ளது.