ஆணவத்துல "ஆடுனா".. வெஸ்ட் இண்டீஸுக்கு ஆப்கானிஸ்தான் கொடுத்த ஆப்புதான் கிடைக்கும்!

ஆரம்பத்திலி்ருந்தே பிரமாதம்

ஆப்கானிஸ்தான் அணி இந்தத் தொடரில் ஆரம்பத்திலிருந்தே சிறப்பாக ஆடி வந்தது. நேற்றைய போட்டிக்கு முன்பு அது ஆடிய 3 போட்டிகளிலுமே தோல்விதான் என்ற போதிலும் அது தனது போராட்டத்தை விட்டதே இல்லை.

தடாலடி ஆட்டம்

நேற்றைய ஆட்டத்திலும் கூட மேற்கு இந்தியத் தீவுகள்தான் வெல்லும் என்றே பொதுவாக எதிர்பார்க்கப்பட்டது. ஆனால் ஆப்கானிஸ்தான் வீரர்கள் அதிரடியாக நிலைமையை தங்களுக்குச் சாதகமாக திருப்பி விட்டு விட்டனர்.

123 ரன்கள்

ஆப்கானிஸ்தான் அணி 7 விக்கெட் இழப்புக்கு 123 ரன்களை எடுத்தது. அந்த அணியின் நஜிபுல்லா ஜர்தான் சிறப்பாக ஆடி ஆட்டமிழக்காமல் 48 ரன்களைக் குவித்தார்.

அலட்சியமான ஆட்டம்

மேற்கு இந்தியத் தீவுகள் அணி நேற்றைய போட்டியில் மிகவும் அலட்சியமாக ஆடியது போலவே தெரிந்தது. காரணம், எப்படியும் ஜெயித்து விடலாம் என்ற அதீத நம்பிக்கையே. ஆனால் அதை சிதறடித்து விட்டனர் ஆப்கானிஸ்தானியர்கள்.

சேஸிங்கில் சொதப்பல்

மேற்கு இந்தியத் தீவுகள் அணி சேஸிங்கில் மிகவும் சொதப்பியது. ஓப்பனர் எவின் லூயிஸ் டக் அவுட் ஆனார். ஆஸ்திரேலியாவிந் 17 வயதேயான இளம் பந்து வீச்சாளர் ரஷீத் கான் அபாரமாக பந்து வீசி 2 விக்கெட்களைச் சாய்த்தார்.

கடைசி ஓவரில் கட்டையைக் கொடுத்த ஆப்கான்

மேற்கு இந்தியத் தீவுகள் அணி கடைசி ஓவரில் 10 ரன்கள் எடுக்க வேண்டிய நிலை. அந்த ஓவரில் பிராத்வெய்ட்டை 13 ரன்கள் இருந்தபோது, அபாரமாக கேட்ச் செய்து அவுட்டாக்கினார் நஜிபுல்லா. அது ஆட்டத்தின் போக்கை மாற்றியது. மேற்கு இந்தியத் தீவுகள் அணிக்குத் தோல்வியைக் கொடுத்து விட்டது.

117ல் சுருண்ட மேற்கு இந்தியத் தீவுகள்

3 பந்துகள் மீதமிருந்த நிலையில் 117 ரன்களுக்கு ஆல் அவுட்டாகி மேற்கு இந்தியத் தீவுகள் அணி பரிதாபத் தோல்வியைத் தழுவியது.

முதலிடத்தில் மேற்கு இந்தியத் தீவுகள்

இந்தப் போட்டியில் தோற்றாலும் கூட மேற்கு இந்தியத் தீவுகள் அணி தொடர்ந்து முதலிடத்தில் இருக்கிறது. அரை இறுதியில் இந்தியாவை அது சந்திக்கிறது.