உலக கிரிக்கெட் வரலாற்றில் யாரும் செய்யாத சாதனை.. முரட்டு பேட்ஸ்மேன் ஆண்ட்ரே ரஸ்ஸல் இமாலய ரெக்கார்ட்

ஷார்ஜா: டி20 கிரிக்கெட்டின் அசுரன் என்று அழைக்கப்படும் ஆண்ட்ரே ரஸ்ஸல், கிரிக்கெட் உலகம் இதுவரை கண்டிராத ஒரு வரலாற்றுச் சாதனையைப் படைத்துள்ளார். டி20 வரலாற்றில் பேட்டிங், பவுலிங் மற்றும் சிக்ஸர்கள் அடிப்பதில் ஒரு புதிய சாதனைப் பட்டியலை தொடங்கி வைத்துள்ளார்.

வெஸ்ட் இண்டீஸ் அணியை சேர்ந்த ஆல்-ரவுண்டரான ஆண்ட்ரே ரஸ்ஸல், சமீபத்தில் தான் ஐபிஎல் மற்றும் சர்வதேச கிரிக்கெட்டில் இருந்து ஓய்வு பெற்றார். இந்நிலையில், தற்போது நடைபெற்று வரும் ஐஎல்டி20 (ILT20) தொடரில் அபுதாபி நைட் ரைடர்ஸ் அணிக்காக விளையாடி வரும் அவர், வெள்ளிக்கிழமை நடைபெற்ற போட்டியில் இந்தச் சாதனையை நிகழ்த்தினார்.

என்ன சாதனை?

டி20 கிரிக்கெட் வரலாற்றில் 5000 ரன்கள், 500 விக்கெட்டுகள் மற்றும் 500 சிக்ஸர்கள் அடித்த உலகின் முதல் மற்றும் ஒரே வீரர் ஆண்ட்ரே ரஸ்ஸல் ஆவார்.
டெசர்ட் வைப்பர்ஸ் அணிக்கு எதிரான போட்டியில் ஷிம்ரான் ஹெட்மையர் விக்கெட்டை வீழ்த்தியபோது, டி20 போட்டிகளில் தனது 500-வது விக்கெட்டை ரஸ்ஸல் பதிவு செய்தார். இதன் மூலம் இந்த மும்முனைச் சாதனையை அவர் எட்டினார்.

புள்ளிவிவரம் மிரட்டல்

இதுவரை 576 டி20 போட்டிகளில் விளையாடியுள்ள ரஸ்ஸலின் புள்ளிவிவரங்கள்:

• ரன்கள்: 9,496
• விக்கெட்டுகள்: 500
• சிக்ஸர்கள்: 772
• ஸ்டிரைக் ரேட்: 168.24

டி20 கிரிக்கெட்டில் 5000 ரன்கள் மற்றும் 500 விக்கெட்டுகளை வீழ்த்திய வீரர்கள் பட்டியலில் டுவைன் பிராவோ மற்றும் ஷகிப் அல் ஹசன் ஆகியோர் உள்ளனர். ஆனால், இவர்களுடன் "500 சிக்ஸர்கள்" என்ற கணக்கையும் சேர்க்கும்போது, ஆண்ட்ரே ரஸ்ஸல் தனி ஒருவனாக கெத்து காட்டுகிறார்.

போட்டி முடிவு

இந்தப் போட்டியில் ரஸ்ஸல் பேட்டிங்கில் 23 பந்துகளில் 36 ரன்கள் விளாசினார் (3 பவுண்டரி, 2 சிக்ஸர்). பந்துவீச்சில் ஒரு விக்கெட்டை வீழ்த்தினார். இருப்பினும், அவரது அபுதாபி நைட் ரைடர்ஸ் அணி 171 ரன்கள் குவித்தும், எதிரணியிடம் தோல்வியைத் தழுவியது.

சமீபத்தில்தான் (நவம்பர் 30) ஐபிஎல் தொடரிலிருந்து ஓய்வு பெறுவதாக அறிவித்து கொல்கத்தா ரசிகர்களை சோகத்தில் ஆழ்த்திய ரஸ்ஸல், டி20 லீக் போட்டிகளில் இன்னும் நான் ராஜாவாகத்தான் இருக்கிறேன் என்பதை இந்தச் சாதனை மூலம் நிரூபித்துள்ளார்.