2 எல்லைக்கும் போன அர்ஷ்தீப் சிங்.. மாஸ் ரெக்கார்டை செய்த அடுத்த ஓவரே பரிதாப பவுலிங் சாதனை

மான்செஸ்டர்: இந்தியா - இங்கிலாந்து அணிகளுக்கு இடையிலான 2-வது டி20 போட்டியில், இந்திய வேகப்பந்து வீச்சாளர் அர்ஷ்தீப் சிங் தனது முதல் இரண்டு ஓவர்களில் இருவேறு உச்சகட்ட சாதனைகளைப் படைத்து ரசிகர்களை வியப்பிலும் அதிர்ச்சியிலும் ஆழ்த்தியுள்ளார். முதல் ஓவரில் அசத்தல் சாதனையை செய்த அவர் அடுத்து வீசிய ஓவரில் படுமோசமான சாதனையை செய்து வெறுப்பேற்றினார்.

இந்தப் போட்டியில் முதலில் பேட்டிங் செய்த இந்திய அணி 190 ரன்கள் குவித்தது. அடுத்து இங்கிலாந்து அணி பேட்டிங் செய்தபோது முதல் ஓவரை அர்ஷ்தீப் சிங் வீசினார். அந்த ஓவரின் முதல் பந்திலேயே ஆபத்தான பில் சால்ட்டை 0 ரன்னில் இஷான் கிஷானிடம் கேட்ச் கொடுக்க வைத்து வெளியேற்றினார். தொடர்ந்து அந்த ஓவரின் 5-வது பந்தில் இங்கிலாந்து விக்கெட் கீப்பர் ஜோஸ் பட்லரை 0 ரன்னில் வருண் சக்ரவர்த்தியின் சூப்பர் கேட்ச் மூலம் ஆட்டமிழக்கச் செய்தார்.

இதன் மூலம், சர்வதேச டி20 கிரிக்கெட் வரலாற்றிலேயே முதல் முறையில் இங்கிலாந்து அணியின் இரண்டு தொடக்க ஆட்டக்காரர்களும் ரன் ஏதும் எடுக்காமல் ஆட்டமிழந்த வரலாற்றுச் சாதனையை அர்ஷ்தீப் சிங் நிகழ்த்தினார். ஆனால், இந்த மகிழ்ச்சி அடுத்த சில நிமிடங்களிலேயே தலைகீழாக மாறியது.

ஆட்டத்தின் 3-வது ஓவரை (அர்ஷ்தீப்பின் 2-வது ஓவர்) வீச அவர் மீண்டும் வந்தார். அந்த ஓவரில் இங்கிலாந்து கேப்டன் ஹாரி புரூக், அர்ஷ்தீப் சிங்கின் பந்துவீச்சை நாலாபுறமும் சிதறடித்தார். முதல் பந்தில் ஜேகப் பெத்தேல் 1 ரன் எடுக்க, அடுத்த 5 பந்துகளையும் புரூக் எதிர்கொண்டார். அடுத்தடுத்த பந்துகளில் இரண்டு பவுண்டரிகளை (4, 4) விளாசிய புரூக், அதற்கு அடுத்த 3 பந்துகளையும் சிக்ஸர்களாக (6, 6, 6) மாற்றிப் பறக்கவிட்டார்.

இதனால் அந்த ஒரே ஓவரில் அர்ஷ்தீப் சிங் 27 ரன்களை வாரிக் கொடுத்தார். சர்வதேச டி20 போட்டிகளில் ஒரு ஓவரில் அதிக ரன்களைக் கொடுத்த இந்திய பந்துவீச்சாளர்களின் பட்டியலில் இது மூன்றாவது மோசமான சாதனையாகப் பதிவானது.

வெறும் மூன்றே மேட்ச்சில் உலகக்கோப்பை ஹீரோ சஞ்சு சாம்சன் கதையை முடித்த கம்பீர் - ஸ்ரேயாஸ் கூட்டணி

தனது முதல் ஓவரில் 1 ரன் மட்டுமே கொடுத்து 2 விக்கெட்டுகளை வீழ்த்தியிருந்த அர்ஷ்தீப் சிங்கின் பந்துவீச்சு புள்ளிவிவரம், 2 ஓவர்களின் முடிவில் 28 ரன்களுக்கு 2 விக்கெட் என மாறியது. ஒரே போட்டியில் மிகச் சிறந்த சாதனையும், அதே சமயம் மோசமான சாதனையும் படைத்த அர்ஷ்தீப்பின் இந்த ஓவர்கள் ரசிகர்கள் மத்தியில் கவனம் பெற்றது.

ஜாம்பவான் சச்சினின் மெகா சாதனையை தகர்த்த வைபவ் சூர்யவன்ஷி.. 15 வயதில் இந்திய அணியில் வரலாறு