பீகார் 574 ரன்கள் அடித்த சாதனை.. முக்கிய கேள்விகளை எழுப்பிய அஸ்வின்.. கவனிக்குமா பிசிசிஐ

மும்பை: உள்நாட்டு கிரிக்கெட்டில் அணிகளுக்கு இடையே சம அளவிலான போட்டி இல்லை என்று இந்திய அணியின் முன்னாள் சுழற்பந்து வீச்சாளர் ரவிச்சந்திரன் அஸ்வின் தெரிவித்துள்ளார். பீகார் அணி அருணாச்சலப் பிரதேசத்தை 397 ரன்கள் வித்தியாசத்தில் வீழ்த்தி சாதனை படைத்த சம்பவத்தை அடுத்து அஸ்வின் இந்த விமர்சனத்தை முன்வைத்துள்ளார். இந்தப் போட்டியில், வைபவ் சூர்யவன்ஷி தனது முதல் லிஸ்ட் ஏ சதத்தை அடித்த இளம் வீரர் என்ற பெருமையைப் பெற்றார்.

சில உள்நாட்டு அணிகளுக்கு மத்தியில் தரத்தில் மிகப்பெரிய அளவில் ஏற்றத்தாழ்வுகள் இருப்பதாகவும், இது அணிகளுக்கு இடையே சரியான போட்டி உருவாகும் வாய்ப்பை முழுமையாக நீக்குவதாகவும் அஸ்வின் குறிப்பிட்டுள்ளார். பீகார் அணி அருணாச்சலப் பிரதேசத்திற்கு எதிராக 50 ஓவர்களில் 574 ரன்கள் என்ற இமாலய ஸ்கோரை எட்டிய பின்னரே தனது யூடியூப் சேனலில் அஸ்வின் இந்தக் கருத்துக்களைப் பகிர்ந்து கொண்டார்.

அதிக ரன்கள் குவிப்பது பாராட்டத்தக்கது என்றாலும், இத்தகைய போட்டிகள் அர்த்தமுள்ள எந்தவொரு போட்டியையும் வழங்குவதில்லை என அஸ்வின் தனது ஆதங்கத்தை வெளிப்படுத்தினார். இது குறித்து பேசிய அஸ்வின், "வைபவ் சூர்யவன்ஷிக்கு மிகப்பெரிய பாராட்டுக்கள். ஆனால் நான் மீண்டும் ஒரு கேள்வி கேட்க விரும்புகிறேன். சில அணிகளிடையே தரத்தில் மிகப்பெரிய வேறுபாடு உள்ளது. இது ஒருதலைப்பட்சமாக மாறி, எந்தவித போட்டியும் இல்லாமல் போகிறது."

"இது ஒரு சிறந்த சூழ்நிலை அல்ல. வைபவின் ஆட்டத்திற்குப் பாராட்டுக்கள். அவர் என்ன செய்ய வேண்டுமோ அதைச் செய்கிறார். ஆனால் அருணாச்சலப் பிரதேசம் போன்ற அணிகள் நல்ல அணிகளாக மாற வேண்டும் என்பதில் நாம் தீவிரமாக இருந்தால், இது அவர்களின் தன்னம்பிக்கைக்கு என்ன செய்யும்?" என்று கேள்வி எழுப்பினார்.

இந்த பிளேட் குரூப் மோதலில், பீகார் அணியின் கேப்டன் சகிபுல் கனி தனது அதிரடி ஆட்டத்தால் வெறும் 32 பந்துகளில் சதம் அடித்து, லிஸ்ட் ஏ கிரிக்கெட்டில் இந்திய வீரர் ஒருவரின் அதிவேக சதத்தைப் பதிவு செய்தார். அவர் வெறும் 40 பந்துகளில் 128 ரன்கள் குவித்து அசத்தினார்.

கனி ஆட்டமிழக்கும் முன், வைபவ் சூர்யவன்ஷி 84 பந்துகளில் 190 ரன்கள் குவித்து, இதில் 15 சிக்ஸர்கள் உட்பட, வெறும் 36 பந்துகளில் சதம் அடித்து மிரட்டினார். அவரின் ஆட்டம் பீகார் அணிக்கு வலுவான அடித்தளத்தை அமைத்தது.

விக்கெட் கீப்பர் ஆயுஷ் லோஹருகா 56 பந்துகளில் 116 ரன்கள் அடித்து இந்த ரன் மழையில் இணைந்தார். இருப்பினும், இந்தப் போட்டியில் 49 பவுண்டரிகளும், 38 சிக்ஸர்களும் பறந்தன. வைபவ் மற்றும் கனியின் அசாதாரணமான பேட்டிங்கிற்கு முன்னால், லோஹருகாவின் அதிரடி ஆட்டம் சற்று மங்கிப்போனது குறிப்பிடத்தக்கது.

சுமாரான பந்துவீச்சுக்கு எதிராக வைபவ் ஆட்டத்தின் தொடக்கத்திலேயே அதிரடி காட்டினார். பின்னர், அவரது அனுபவம் வாய்ந்த அணி வீரர்கள் வேகத்தைத் தொடர்வதன் மூலம் தங்கள் அணியை இந்த ஃபார்மட்டில் ஒரு உலக சாதனை மொத்த ஸ்கோரை எட்டச் செய்து, அபார வெற்றியைப் பதிவு செய்தனர்.