ஆசிய கோப்பைக்கு சிக்கல்.. பாகிஸ்தானை டீலில் விட்ட இலங்கை, வங்கதேசம்.. அடுத்தது என்ன?

துபாய் : ஆசிய கோப்பை கிரிக்கெட் போட்டிக்கு தற்போது பெரிய சிக்கல் ஒன்று ஏற்பட்டிருக்கிறது. இம்முறை ஆசிய கோப்பை கிரிக்கெட் போட்டிகளை பாகிஸ்தான் நடத்த திட்டமிட்டிருந்தது.

இந்த நிலையில் பாகிஸ்தானில் வந்து கிரிக்கெட் போட்டிகளில் விளையாட மாட்டோம் என இந்தியா அறிவித்தது. இதனால் உலகக்கோப்பை தொடருக்கு தாங்கள் வரப்போவதில்லை என பாகிஸ்தான் பதிலடி கொடுத்தது.

இந்த நிலையில் இரு நாட்டுக்கு இடையிலான கிரிக்கெட் உறவுகளை மேம்படுத்தும் வகையில் பாகிஸ்தான் அணி ஒரு திட்டத்தை வகுத்தது. அதன்படி இந்தியா விளையாடும் போட்டிகளை துபாயில் நடத்த பாகிஸ்தான் ஒப்புக் கொண்டது. முதலில் இந்த பிளானுக்கு தலையாட்டிய பிசிசிஐ பிறகு பின் வாங்கியது. மேலும் பாகிஸ்தானில் இந்தத் தொடரை நடத்தக்கூடாது என்றும் பிசிசிஐ போர் கொடி தூக்கியது.

இந்த நிலையில் இந்த பிரச்சினை மேலும் சிக்கல் ஆகும் விதமாக பாகிஸ்தான் விடுத்த கோரிக்கையை இலங்கை, வங்கதேசம் மற்றும் ஆப்கானிஸ்தான் ஆகிய நாடுகளின் கிரிக்கெட் சங்கங்கள் நிராகரித்துள்ளது. இந்தியா விளையாடும் போட்டிகளை துபாயில் நடத்துவது சரிவராது என்றும் அந்த சங்கங்கள் குறிப்பிட்டுள்ளது. இதனால் பாகிஸ்தானில் இருந்து போட்டியை வேறு நாட்டுக்கு மாற்றும் முடிவு தான் எடுக்கப்படும் என தெரிகிறது.

பாகிஸ்தானில் ஆசிய கோப்பை நடக்கவில்லை என்றால் செப்டம்பர் மாதம் இலங்கையில் இந்த போட்டிகளை நடத்த திட்டமிடப்பட்டு இருக்கிறது. எனினும் இந்த தொடருக்கு பாகிஸ்தான் பங்கேற்காது எனும் தெரிகிறது. இதற்கு பலி வாங்கும் விதமாக இந்தியா வந்து தாங்கள் உலக கோப்பையை விளையாட மாட்டோம் என பாகிஸ்தான் அறிவிக்கவும் வாய்ப்பு இருக்கிறது.

இதனால் தற்போது வரை ஐசிசி உலகக் கோப்பை தொடருக்கான அட்டவணையும் அறிவிக்கப்படவில்லை. இதனால் இந்த ஆண்டு நடைபெறும் இரண்டு மிகப்பெரிய தொடர்கள் திட்டமிட்டபடி சிறப்பாக இருக்குமா என்ற கேள்வி எழுந்துள்ளது .