IND vs BAN: “இந்தியாவுக்கெல்லாம் பயப்பட மாட்டோம்.. யோசிக்கவும் மாட்டோம்”.. வங்கதேச வீரர் மஹதி ஹாசன்

துபாய்: 2025 ஆசிய கோப்பை சூப்பர் 4 சுற்றில், புதன்கிழமை அன்று இந்தியாவை எதிர்கொள்ளவிருக்கும் வங்கதேச அணியின் சுழற்பந்து வீச்சாளர் ஷேக் மஹதி ஹசன், இந்திய அணியைப் பார்த்துத் தாங்கள் அஞ்சவில்லை என்றும், எதிரணி யார் என்பதைப் பற்றித் தங்களுக்குக் கவலையில்லை என்றும் கூறி, இந்திய அணிக்கு சவால் விடுத்துள்ளார்.

சூப்பர் 4 சுற்றின் முதல் போட்டியில், நடப்பு சாம்பியனான இலங்கையை வீழ்த்தி வங்கதேசம் பெரும் நம்பிக்கையுடன் உள்ளது. இந்த நிலையில், பயிற்சிக்குப் பிறகு செய்தியாளர்களிடம் பேசிய மஹதி ஹசன், இந்திய அணியுடனான போட்டியை மற்றுமொரு சாதாரண ஆட்டமாகவே தாங்கள் கருதுவதாகத் தெரிவித்தார்.

"ஒரு போட்டியில் வெற்றி பெற்ற பிறகு நாங்கள் எதையும் பெரிதாக எடுத்துக்கொள்வதில்லை. ஆரம்பத்திலிருந்தே நாங்கள் இயல்பாகவே இருக்கிறோம். எங்களது உடல்மொழி அப்படித்தான் இருக்கிறது. நாங்கள் அதிகமாகச் சிந்திப்பதில்லை. நாங்கள் கிரிக்கெட் போட்டியில் விளையாட மட்டுமே செல்கிறோம். எதிரணி இந்தியாவா அல்லது ஆஸ்திரேலியாவா என்பதெல்லாம் எங்களுக்குக் கவலையில்லை" என்று மஹதி ஹசன் கூறினார்.

வரலாறு இந்தியாவுக்குச் சாதகம்:

சர்வதேச டி20 போட்டிகளைப் பொறுத்தவரை, வங்கதேசத்திற்கு எதிராக இந்தியாவே அதிகம் ஆதிக்கம் செலுத்தி வருகிறது. இரு அணிகளும் இதுவரை 17 முறை மோதியுள்ளன, அதில் 16 முறை இந்தியாவே வெற்றி பெற்றுள்ளது. பல நாடுகள் பங்கேற்கும் தொடர்களில் இதுவரை வங்கதேசம் இந்தியாவை வீழ்த்தியதே இல்லை. 2019 ஆம் ஆண்டு நடந்த இருதரப்பு தொடரில் மட்டுமே வங்கதேசம் ஒரே ஒரு முறை வெற்றி பெற்றுள்ளது.

இருப்பினும், இந்த புள்ளிவிவரங்களைப் பற்றிக் கவலைப்படவில்லை என்று கூறிய மஹதி, "எல்லாமே போட்டியின் சூழலைப் பொறுத்தது. களத்தில் அந்த நேரத்தில் எப்படிச் செயல்படுகிறோம் என்பதில்தான் எல்லாம் இருக்கிறது" என்று குறிப்பிட்டார்.

சூர்யகுமார் யாதவ், சுப்மன் கில், ஹர்திக் பாண்டியா என நட்சத்திர பட்டாளங்களைக் கொண்ட இந்திய அணி, பேட்டிங் மற்றும் வேகப்பந்து வீச்சில் மிகவும் பலமாக உள்ளது. காகிதத்தில் இந்தியாவே வெற்றி பெற அதிக வாய்ப்புள்ளதாகக் கருதப்பட்டாலும், துபாயின் மெதுவான ஆடுகளத்தில் வங்கதேசத்தின் பலம் வாய்ந்த சுழற்பந்து வீச்சு தாக்கத்தை ஏற்படுத்த வாய்ப்பு உள்ளது.

மஹதி ஹசன் மற்றும் இடது கை சுழற்பந்து வீச்சாளர் நசும் அகமது ஆகியோர் அடங்கிய வங்கதேச சுழல் கூட்டணி, சுழற்பந்து வீச்சுக்குச் சாதகமான ஆடுகளங்களில் இந்திய பேட்ஸ்மேன்களுக்கு நெருக்கடி கொடுக்கக் கூடியவர்கள். ஆனால், இந்தியா இதுவரை துபாயில் ஆடிய மூன்று போட்டிகளிலும் பேட்டிங்கில் முழு ஆதிக்கம் செலுத்தி வெற்றி பெற்று இருக்கிறது. அது வங்கதேசத்திற்கு பெரும் சவாலாக அமையும்.

கண்டுகொள்ளப் போவதில்லை:

சமூக வலைத்தளங்களில் இந்தப் போட்டியை 'டேவிட் vs கோலியாத்' என்று ரசிகர்கள் வர்ணிப்பது குறித்துப் பேசிய மஹதி, "நாங்கள் அதைப் பற்றிச் சிந்திக்கவில்லை. அதையெல்லாம் நீங்கள்தான் (ஊடகங்கள்) அல்லது ரசிகர்கள்தான் உருவாக்குகிறீர்கள். நாங்கள் ஒவ்வொரு சர்வதேசப் போட்டியையும் எப்படி விளையாடுவோமோ, அதேபோல சாதாரணமாகவே விளையாடுவோம்" என்றார்.

சூப்பர் 4 சுற்று சூடுபிடித்துள்ள நிலையில், இந்தப் போட்டியின் முக்கியத்துவத்தை இரு அணிகளும் நன்கு உணர்ந்துள்ளன. இதில் வெற்றி பெற்றால், இந்திய அணி இறுதிப் போட்டிக்கான தனது இடத்தை கிட்டத்தட்ட உறுதி செய்துவிடும். மறுபுறம், வங்கதேசம் மீண்டும் ஒரு வெற்றியைப் பதிவு செய்தால், அது நிச்சயம் கிரிக்கெட் உலகில் அதிர்வலைகளை ஏற்படுத்தும்.