IND vs BAN: வங்கதேசம் ஜெயித்தால் இந்திய அணியின் பைனல் வாய்ப்பு ஓவர்.. ஆசிய கோப்பையே மாறிடும்

துபாய்: 2025 ஆசிய கோப்பை கிரிக்கெட் தொடர் இறுதிக்கட்டத்தை நெருங்கி வரும் நிலையில், சூப்பர் 4 சுற்றின் மிக முக்கியமான போட்டியில் இந்திய அணி இன்று வங்கதேச அணியை எதிர்கொள்கிறது. இந்தத் தொடரில் இதுவரை தோல்வியைச் சந்திக்காத ஒரே அணியாக வலம் வரும் இந்தியா, இந்தப் போட்டியிலும் எளிதாக வெற்றி பெற்று இறுதிப் போட்டிக்கு முன்னேறும் என்று பரவலாக எதிர்பார்க்கப்படுகிறது.

ஆனால், கிரிக்கெட்டில் எதுவும் நடக்கலாம் என்பதற்கு ஏற்ப, ஒருவேளை இன்றைய போட்டியில் வங்கதேசம் வெற்றி பெற்றால், புள்ளிப் பட்டியலில் பெரும் குழப்பம் ஏற்பட்டு, இந்திய அணியின் இறுதிப் போட்டி வாய்ப்புக்கே ஆபத்து நேரிடலாம். இந்திய அணி லீக் சுற்றில் தனது அனைத்துப் போட்டிகளிலும் வெற்றி பெற்று, சூப்பர் 4 சுற்றின் முதல் போட்டியில் பாகிஸ்தானையும் வீழ்த்தி 2 புள்ளிகளுடன் வலுவான நிலையில் உள்ளது.

இன்றைய போட்டியில் வங்கதேசத்தை வீழ்த்திவிட்டால், இந்திய அணி 4 புள்ளிகளுடன் புள்ளிப் பட்டியலில் முதலிடத்தைப் பிடித்து, இறுதிப் போட்டிக்குத் தகுதி பெறுவதை கிட்டத்தட்ட உறுதி செய்துவிடும். அதன்பிறகு இலங்கைக்கு எதிரான கடைசிப் போட்டி, இந்திய அணிக்கு ஒரு சம்பிரதாயப் போட்டியாகவே அமையும்.

ஒருவேளை, இன்றைய போட்டியில் எதிர்பாராதவிதமாக வங்கதேசம் வெற்றி பெற்றால், ஆசிய கோப்பையின் அனைத்துக் கணக்குகளும் தலைகீழாக மாறிவிடும். தற்போதுள்ள புள்ளிப் பட்டியலின்படி, இந்திய அணி ஒரு போட்டியில் வென்று 2 புள்ளிகளுடனும், வங்கதேசம் ஒரு போட்டியில் வென்று 2 புள்ளிகளுடனும், பாகிஸ்தான் இரண்டு போட்டிகளில் ஆடி ஒரு வெற்றியுடன் 2 புள்ளிகளுடனும் உள்ளன. இலங்கை அணி இரண்டு போட்டிகளிலும் தோல்வியடைந்து தொடரிலிருந்து வெளியேறிவிட்டது.

இந்தச் சூழலில், இன்று வங்கதேசம் இந்தியாவை வீழ்த்தினால், அந்த அணி 4 புள்ளிகளுடன் புள்ளிப் பட்டியலில் முதலிடத்தைப் பிடிக்கும். அப்போது இந்திய அணி 2 புள்ளிகளுடனே நீடிக்கும். இது இந்திய அணிக்கு மிகப்பெரிய நெருக்கடியை உருவாக்கும். ஏனெனில், அடுத்து பாகிஸ்தானுக்கு எதிரான போட்டியில் வங்கதேசம் தோல்வியடைந்தாலும் கூட, அதிக நெட் ரன் ரேட் வைத்திருக்கும் பட்சத்தில் இறுதிப் போட்டிக்கு முன்னேற வாய்ப்புள்ளது.

அதே நேரத்தில், இந்தியா தனது கடைசிப் போட்டியில் இலங்கையை மிகப்பெரிய ரன் வித்தியாசத்தில் வீழ்த்தி, தனது நெட் ரன் ரேட்டை பாகிஸ்தான் மற்றும் வங்கதேசத்தை விட அதிகமாக உயர்த்த வேண்டிய கட்டாயத்திற்குத் தள்ளப்படும். இந்தியாவின் இந்தத் தோல்வி, பாகிஸ்தான் அணிக்கு ஒரு புதிய வாய்ப்பை உருவாக்கும். பாகிஸ்தான் அணி தனது கடைசிப் போட்டியில் வங்கதேசத்தை வீழ்த்தி, அதிக நெட் ரன் ரேட் பெற்று இறுதிப் போட்டிக்கு முன்னேற கடுமையாக முயற்சிக்கும்.

எனவே, இன்றைய போட்டி இந்திய அணிக்கு ஒரு சாதாரண லீக் போட்டி அல்ல. இது கிட்டத்தட்ட ஒரு வாழ்வா-சாவா போட்டியாகவே பார்க்கப்படுகிறது. எந்தவிதமான சிக்கல்களுக்கும், கணக்குகளுக்கும் இடம் கொடுக்காமல், எளிதாகவும், கம்பீரமாகவும் இறுதிப் போட்டிக்கு முன்னேற, இன்றைய போட்டியில் வங்கதேசத்தை வீழ்த்துவது ஒன்றே இந்திய அணிக்கு இருக்கும் எளிய வழி. இல்லையெனில், இந்திய அணி மிகப்பெரிய சிக்கலை எதிர்கொள்ள நேரிடும். பாகிஸ்தானை இரண்டு முறை ஊதித் தள்ளியதை போலவே வங்கதேச அணியையும் இந்தியா எளிதாக வீழ்த்தும் என்றே நம்புவோம்.