Asia Cup: சூப்பர் 4-க்காக முட்டி மோதும் மூன்று அணிகள்.. குரூப் பி சிக்கல்.. இந்தியா நிலை என்ன?

துபாய்: 2025 ஆசிய கோப்பை தொடரில் பாகிஸ்தான் - ஐக்கிய அரபு அமீரகம் (UAE) போட்டிக்குப் பிறகு, 'குரூப் ஏ' பிரிவிலிருந்து சூப்பர் 4 சுற்றுக்குத் தகுதி பெறும் இரண்டு அணிகள் எவை என்பது உறுதியாகிவிட்டது. இந்தியாவும், பாகிஸ்தான்னும் சூப்பர் 4 சுற்றுக்கு முன்னேறியுள்ள நிலையில், 'குரூப் பி' பிரிவில் மீதமுள்ள இரண்டு இடங்களுக்கு இலங்கை, வங்கதேசம் மற்றும் ஆப்கானிஸ்தான் இடையே மும்முனைப் போட்டி நிலவுகிறது.

குரூப் ஏ: சர்ச்சைகளுக்கு மத்தியில் தகுதி பெற்ற பாகிஸ்தான்:

இந்தியாவிடம் படுதோல்வி, கைகுலுக்கல் சர்ச்சை, தொடரிலிருந்து விலகுவோம் என்ற மிரட்டல் எனப் பல பரபரப்பான நிகழ்வுகளுக்குப் பிறகு, ஐக்கிய அரபு அமீரகத்திற்கு எதிரான 'வாழ்வா சாவா' ஆட்டத்தில் பாகிஸ்தான் அணி 41 ரன்கள் வித்தியாசத்தில் வெற்றி பெற்றது. இந்த வெற்றியின் மூலம், 4 புள்ளிகளுடன் 'குரூப் ஏ' பிரிவில் இரண்டாவது இடத்தைப் பிடித்து, சூப்பர் 4 சுற்றுக்கு பாகிஸ்தான் தகுதி பெற்றுள்ளது.

இந்திய அணி, தான் விளையாடிய இரண்டு போட்டிகளிலும் அபார வெற்றி பெற்று, 4 புள்ளிகள் மற்றும் மிகச் சிறந்த நெட் ரன் ரேட்டுடன் (+4.793) ஏற்கனவே முதலிடத்தைப் பிடித்து சூப்பர் 4 சுற்றுக்கு கம்பீரமாகத் தகுதி பெற்றுவிட்டது. ஐக்கிய அரபு அமீரகம் மற்றும் ஓமன் அணிகள் தொடரிலிருந்து வெளியேறின.

குரூப் பி: திக் திக் நிமிடங்கள்! யாருக்கு வாய்ப்பு?

'குரூப் ஏ' பிரிவு தெளிவாகிவிட்ட நிலையில், 'குரூப் பி' பிரிவுதான் தற்போது 2025 ஆசிய கோப்பையின் மையமாக மாறியுள்ளது. இந்தப் பிரிவில், இலங்கை மற்றும் வங்கதேசம் தலா 4 புள்ளிகளுடனும், ஆப்கானிஸ்தான் 2 புள்ளிகளுடனும் உள்ளன. இந்தப் பிரிவின் கடைசி போட்டி, இலங்கை மற்றும் ஆப்கானிஸ்தான் இடையே நடைபெற உள்ளது. இந்தப் போட்டியின் முடிவுதான், இந்த மூன்று அணிகளின் தலையெழுத்தையும் தீர்மானிக்கும். இலங்கை - ஆப்கானிஸ்தான் போட்டியின் முடிவை இரண்டு சூழ்நிலைகளாக பார்க்கலாம்.

சூழ்நிலை 1: ஆப்கானிஸ்தானை வீழ்த்தி இலங்கை வெற்றி பெற்றால், அந்த அணி 6 புள்ளிகளுடன் முதலிடத்தைப் பிடித்து சூப்பர் 4 சுற்றுக்கு தகுதி பெறும். ஆப்கானிஸ்தான் 2 புள்ளிகளுடன் வெளியேறும். அப்போது, 4 புள்ளிகளுடன் இருக்கும் வங்கதேசம், இரண்டாவது அணியாக சூப்பர் 4 சுற்றுக்கு தகுதி பெற்றுவிடும்.

சூழ்நிலை 2: ஆப்கானிஸ்தான் இலங்கையை வீழ்த்தினால், அது புள்ளிப் பட்டியலை மிகவும் சிக்கலாக்கும். ஆப்கானிஸ்தான் வெற்றி பெற்றால், அவர்களும் 4 புள்ளிகளைப் பெறுவார்கள். அப்போது, ஆப்கானிஸ்தான், இலங்கை, வங்கதேசம் ஆகிய மூன்று அணிகளுமே தலா 4 புள்ளிகளுடன் சமநிலையில் இருக்கும். இந்த நிலையில், நெட் ரன் ரேட் (Net Run Rate) அடிப்படையிலேயே முதல் இரண்டு இடங்களைப் பிடிக்கும் அணிகள் தகுதி பெறும்.

யாருக்கு சாதகம்?

நெட் ரன் ரேட் அடிப்படையில், ஆப்கானிஸ்தான் (+2.150) மற்றும் இலங்கை (+1.546) ஆகியவை மிகவும் வலுவான நிலையில் உள்ளன. வங்கதேசத்தின் நெட் ரன் ரேட் (-0.270) மைனஸில் இருப்பதால், அவர்களின் வாய்ப்பு மிகவும் குறைவு. இலங்கை அணி மிக மிக மோசமான தோல்வியைச் சந்தித்தால் மட்டுமே வங்கதேசத்திற்கு வாய்ப்பு கிடைக்கும். எனவே, ஆப்கானிஸ்தான் வெற்றி பெற்றால், அவர்களும் இலங்கையும் சூப்பர் 4 சுற்றுக்கு தகுதி பெறவே அதிக வாய்ப்புள்ளது.

ஆசிய கோப்பை புள்ளிப் பட்டியல் (பாக். vs UAE போட்டிக்குப் பிறகு):

குழு ஏ

1 - இந்தியா - போட்டிகள்: 2, வெற்றி: 2, புள்ளிகள்: 4, நெட் ரன் ரேட்: +4.793
2 - பாகிஸ்தான் - போட்டிகள்: 3, வெற்றி: 2, புள்ளிகள்: 4, நெட் ரன் ரேட்: +1.790
3 - ஐக்கிய அரபு அமீரகம் - போட்டிகள்: 3, வெற்றி: 1, புள்ளிகள்: 2, நெட் ரன் ரேட்: -1.984
4 - ஓமன் - போட்டிகள்: 2, வெற்றி: 0, புள்ளிகள்: 0, நெட் ரன் ரேட்: -3.375

குழு பி

1 - இலங்கை - போட்டிகள்: 2, வெற்றி: 2, புள்ளிகள்: 4, நெட் ரன் ரேட்: +1.546
2 - வங்கதேசம் - போட்டிகள்: 3, வெற்றி: 2, புள்ளிகள்: 4, நெட் ரன் ரேட்: -0.270
3 - ஆப்கானிஸ்தான் - போட்டிகள்: 2, வெற்றி: 1, புள்ளிகள்: 2, நெட் ரன் ரேட்: +2.150
4 - ஹாங்காங் - போட்டிகள்: 3, வெற்றி: 0, புள்ளிகள்: 0, நெட் ரன் ரேட்: -2.151