இந்திய டெஸ்ட் அணியில் இடம் கிடைத்தாலும் போட்டியில் ஆட முடியாது.. இக்கட்டான நிலையில் ஆகிப் நபி

மும்பை: இலங்கை டெஸ்ட் தொடருக்கான இந்திய அணியில் ஜம்மு காஷ்மீர் வேகப்பந்து வீச்சாளர் ஆகிப் நபி கடைசி நேரத்தில் பும்ராவுக்கு பதில் சேர்க்கப்பட்டுள்ளார். ஆனால், அவருக்கு அணியில் இடம் கிடைத்துவிட்டாலும், பிளேயிங் லெவனில் வாய்ப்பு கிடைக்குமா என்பது பெரிய கேள்விக்குறியாகவே உள்ளது.

இந்தியா மற்றும் இலங்கை அணிகளுக்கு இடையிலான முதலாவது டெஸ்ட் போட்டி ஆகஸ்ட் 15 அன்று கல்லே மைதானத்தில் தொடங்குகிறது. இலங்கை ஆடுகளங்கள் பொதுவாகவே சுழற்பந்து வீச்சுக்குச் சாதகமானவை என்பதால், கேப்டன் சுப்மன் கில் மற்றும் பயிற்சியாளர் கௌதம் கம்பீர் ஆகியோர் 3 சுழற்பந்து வீச்சாளர்களுடன் களம் இறங்கவே அதிக வாய்ப்புள்ளது.

இதனால், பிளேயிங் லெவனில் 2 வேகப்பந்து வீச்சாளர்களுக்கு மட்டுமே இடம் கிடைக்கும். பந்துவீச்சுப் பிரிவில் ஆகிப் நபியைத் தவிர முகமது சிராஜ் மற்றும் பிரசித் கிருஷ்ணா ஆகிய அனுபவமிக்க வேகப்பந்து வீச்சாளர்களும் அணியில் உள்ளனர்.

கடந்த ரஞ்சி கோப்பை தொடரில் 60 விக்கெட்டுகளை வீழ்த்தி ஆகிப் நபி அசத்தி இருந்தாலும், சர்வதேச அளவிலான அனுபவத்தைக் கருத்தில் கொண்டு சிராஜ் மற்றும் பிரசித் கிருஷ்ணா ஆகியோருக்கே கேப்டன் சுப்மன் கில் முன்னுரிமை அளிப்பார் என்று எதிர்பார்க்கப்படுகிறது. ஏனெனில், உலக டெஸ்ட் சாம்பியன்ஷிப் இறுதிப்போட்டிக்கு முன்னேற வேண்டும் என்றால், இந்தியா மீதமுள்ள 9 டெஸ்ட் போட்டிகளில் 7 போட்டிகளில் கண்டிப்பாக வெற்றி பெற வேண்டும். எனவே, இலங்கை தொடரை 2-0 என்ற கணக்கில் முழுமையாக வெல்வதே இந்தியாவின் முதன்மை இலக்காக இருக்கும்.

பும்ராவுக்கே காயம் வந்தாலும் உங்களை மட்டும் டீமில் சேர்க்க மாட்டோம்.. முகமது ஷமிக்கு ஏற்பட்ட நிலைமை

இந்த இக்கட்டான சூழலில், இந்திய அணி நிர்வாகம் எந்தவொரு புதிய பரிசோதனையையும் செய்ய விரும்பாது. எனவே, ஆகிப் நபிக்கு தற்போதைய நிலையில் போட்டியில் விளையாடும் வாய்ப்பு கிடைப்பது மிகவும் கடினம். சிராஜ் அல்லது பிரசித் கிருஷ்ணா ஆகிய இருவரில் யாருக்காவது காயம் ஏற்பட்டாலோ அல்லது அவர்கள் போட்டிகளில் மோசமாகச் செயல்பட்டாலோ மட்டுமே ஆகிப் நபிக்கு பிளேயிங் லெவனில் இடம் கிடைக்க வாய்ப்புள்ளது.