ஆஸ்திரேலிய மண்ணில் மாபெரும் வரலாறு.. டெஸ்டில் சதம் அடித்து அசத்திய வங்கதேச வீரர் தன்சித் ஹசன்

டார்வின்: ஆஸ்திரேலியாவுக்கு எதிரான முதல் டெஸ்ட் போட்டியில் வங்கதேச அணியின் தொடக்க வீரர் தன்சித் ஹசன் சதம் அடித்து புதிய வரலாற்றுச் சாதனை படைத்துள்ளார். இதன் மூலம், ஆஸ்திரேலிய மண்ணில் டெஸ்ட் போட்டியில் சதம் அடித்த முதல் வங்கதேச பேட்ஸ்மேன் என்ற பெருமையை அவர் பெற்றுள்ளார்.

டார்வினில் நடைபெற்று வரும் இப்போட்டியின் 2-வது நாளில், தனது 2-வது டெஸ்ட் போட்டியில் மட்டுமே விளையாடும் தன்சித் ஹசன், 188 பந்துகளில் தனது முதல் டெஸ்ட் சதத்தை நிறைவு செய்தார். பேட் கம்மின்ஸ், மிட்செல் ஸ்டார்க், ஜோஷ் ஹேசில்வுட் மற்றும் நாதன் லயன் போன்ற உலகத்தரம் வாய்ந்த பந்துவீச்சாளர்களை எதிர்கொண்டு அவர் இந்த சாதனையைப் படைத்துள்ளார்.

இதன் மூலம், ஆஸ்திரேலிய மண்ணில் வங்கதேச வீரரின் அதிகபட்ச டெஸ்ட் ஸ்கோர் என்ற 23 ஆண்டுகால சாதனையை தன்சித் முறியடித்துள்ளார். இதற்கு முன்பு கடந்த 2003-ஆம் ஆண்டு கெய்ர்ன்ஸ் நகரில் நடைபெற்ற டெஸ்ட் போட்டியில் ஹன்னன் சர்க்கார் எடுத்த 76 ரன்களே ஆஸ்திரேலியாவில் ஒரு வங்கதேச வீரரின் அதிகபட்ச ஸ்கோராக இருந்தது. தற்போது அந்த சாதனையை தன்சித் தகர்த்துள்ளார்.

இப்போட்டியில் முதலில் பேட்டிங் செய்த ஆஸ்திரேலிய அணி, வங்கதேச வேகப்பந்து வீச்சாளர் ஹசன் மஹ்மூத்தின் அபார பந்துவீச்சால் 198 ரன்களுக்கு சுருண்டது. அவர் 6 விக்கெட்களை வீழ்த்தினார். இதனைத் தொடர்ந்து தனது முதல் இன்னிங்ஸைத் தொடங்கிய வங்கதேச அணிக்கு தன்சித் ஹசன் அபாரமாக ரன் குவித்தார். அவர் 2-வது விக்கெட்டுக்கு மோமினுல் ஹக்குடன் இணைந்து 102 ரன்கள் சேர்த்தார். மோமினுல் 49 ரன்களில் ஆட்டமிழந்தார்.

அதன்பின்னர், கேப்டன் நஜ்முல் ஹொசைன் சாண்டோவுடன் ஜோடி சேர்ந்த தன்சித் ஹசன், வங்கதேச அணியின் ஸ்கோரை உயர்த்தினார். ஆஸ்திரேலிய பந்துவீச்சாளர்கள் எவ்வித அழுத்தத்தையும் ஏற்படுத்த முடியாதபடி இந்த ஜோடி நிதானமாக விளையாடி ரன்களைக் குவித்தது. சதம் அடித்த தன்சித் ஹசன் 101 ரன்கள் எடுத்து ஆட்டமிழந்தார். நஜ்முல் ஹொசைன் சாண்டோ அரைசதம் கடந்து இருந்தார்.

"39 வயதில் மெஸ்ஸியால் உலகக்கோப்பை ஆட முடியுது.. விராட் - ரோஹித்தால் முடியாதா?": ஹர்பஜன் சிங் அதிரடி

இப்போட்டி தொடங்குவதற்கு முன்பு ஆஸ்திரேலிய அணியே வெற்றி பெறும் எனப் பலரும் கணித்திருந்தனர். ஆனால், தன்சித் ஹசனின் இந்த சதத்தின் மூலம், பலம் வாய்ந்த ஆஸ்திரேலியாவுக்கு எதிராக வங்கதேச அணி தற்போது போட்டியைத் தனது முழு கட்டுப்பாட்டிற்குள் கொண்டு வந்துள்ளது.