140 ஆண்டு கால ஆஷஸ் டெஸ்ட் வரலாற்றில் இப்படி நடந்ததே இல்லை.. முதல்முறையாக டபுள் டக் அவுட் சாதனை

பெர்த்: 140 ஆண்டு கால ஆஷஸ் டெஸ்ட் தொடர் வரலாற்றில் முதல்முறையாக ஒரு அரிய நிகழ்வு அரங்கேறி உள்ளது. ஆஸ்திரேலியா - இங்கிலாந்து அணிகள் மோதிய 2025 ஆஷஸ் தொடரின் முதல் போட்டியில் இந்த மோசமான சாதனை நிகழ்ந்தது. இந்தப் போட்டியின் முதல் இன்னிங்ஸில், ஆஸ்திரேலியா மற்றும் இங்கிலாந்து ஆகிய இரு அணிகளின் தொடக்கக் கூட்டணியும் ஒரு ரன் கூட எடுக்காமல் முதல் விக்கெட்டை இழந்தன. ஆஷஸ் வரலாற்றில் இப்படி ஒரு நிகழ்வு நடப்பது இதுவே முதல் முறையாகும்.

பெர்த் மைதானத்தின் வேகப்பந்து வீச்சுக்குச் சாதகமான ஆடுகளத்தில், ஆஸ்திரேலியாவின் மிட்செல் ஸ்டார்க் மற்றும் இங்கிலாந்தின் ஜோஃப்ரா ஆர்ச்சர் ஆகியோரின் ஆதிக்கமே இந்த வரலாற்றுச் சாதனைக்குக் காரணமாக அமைந்தது.

இந்தப் போட்டியில் டாஸ் வென்று முதலில் பேட்டிங்கைத் தேர்வு செய்த இங்கிலாந்து அணிக்கு, மிட்செல் ஸ்டார்க் முதல் ஓவரிலேயே அதிர்ச்சி வைத்தியம் அளித்தார். ஓவரின் கடைசிப் பந்தில், இங்கிலாந்து தொடக்க வீரர் ஜாக் கிராவ்லியை (0) ஸ்லிப்பில் நின்ற உஸ்மான் கவாஜாவிடம் கேட்ச் கொடுத்து வெளியேற்றினார். இதனால், இங்கிலாந்தின் முதல் விக்கெட் ஒரு ரன் கூட எடுக்காமல் 'பூஜ்யத்தில்' வீழ்ந்தது.

இங்கிலாந்து அணியை 172 ரன்களுக்குச் சுருட்டிய ஆஸ்திரேலியா, தனது முதல் இன்னிங்ஸைத் தொடங்கியது. அப்போது இங்கிலாந்துக்கு ஏற்பட்ட அதே நிலை ஆஸ்திரேலியாவுக்கும் ஏற்பட்டது. இங்கிலாந்து வேகப்புயல் ஜோஃப்ரா ஆர்ச்சர் வீசிய முதல் ஓவரின் இரண்டாவது பந்திலேயே, தனது அறிமுகப் போட்டியில் களமிறங்கிய ஆஸ்திரேலியத் தொடக்க வீரர் ஜேக் வெதரல்டை (0) எல்.பி.டபிள்யூ (LBW) முறையில் டக் அவுட்டாக்கினார். இதனால், ஆஸ்திரேலியாவின் முதல் விக்கெட்டும் 'பூஜ்யத்தில்' வீழ்ந்தது.

இந்த 'இரட்டை டக் அவுட்' நிகழ்வின் மூலம், அறிமுகப் போட்டியில் டக் அவுட்டான 5வது ஆஸ்திரேலியத் தொடக்க வீரர் என்ற மோசமான சாதனைப் பட்டியலிலும் ஜேக் வெதரல்ட் இணைந்துள்ளார்.

முன்னதாக, இங்கிலாந்து அணி ஸ்டார்க்கின் வேகத்தில் நிலைகுலைந்தது. பென் டக்கெட் (21 ரன்கள்) மற்றும் ஆலி போப் (46 ரன்கள்) ஆகியோர் சற்றுத் தாக்குப்பிடித்தாலும், நட்சத்திர வீரர் ஜோ ரூட் (0) ஸ்டார்க் பந்துவீச்சில் டக் அவுட்டாகி ஏமாற்றமளித்தார். பின்னர் வந்த ஹாரி புரூக் (52 ரன்கள்) மற்றும் ஜேமி ஸ்மித் (33 ரன்கள்) ஆகியோர் அதிரடியாக ஆடி அணியின் ஸ்கோரை உயர்த்த முயன்றனர்.

இருப்பினும், மிட்செல் ஸ்டார்க் தனது அசாத்தியப் பந்துவீச்சால் 58 ரன்களுக்கு 7 விக்கெட் வீழ்த்தி இங்கிலாந்தின் பேட்டிங் வரிசையைச் சிதைத்தார். இங்கிலாந்து அணி 32.5 ஓவர்களில் 172 ரன்களுக்கு ஆல்-அவுட் ஆனது. இந்தப் போட்டியின் மூலம், ஆஷஸ் தொடரில் 100 விக்கெட்டுகளை (தற்போது 104) வீழ்த்திய முதல் இடது கை வேகப்பந்து வீச்சாளர் என்ற சாதனையையும் ஸ்டார்க் படைத்தார்.

அடுத்து தனது முதல் இன்னிங்ஸை ஆடிய ஆஸ்திரேலிய அணி, முதல் நாள் ஆட்டநேர முடிவில் 9 விக்கெட் இழப்பிற்கு 123 ரன்கள் எடுத்துள்ளது. இங்கிலாந்து அணியின் பென் ஸ்டோக்ஸ் 5 விக்கெட் வீழ்த்தி பதிலடி கொடுத்தார்.