AUS vs ENG: சாம்பியன்ஸ் டிராபி வரலாற்றிலேயே அதிவேக செஞ்சுரி.. சேவாக் ரெக்கார்டை தொட்ட இங்லிஸ்

லாகூர்: சாம்பியன்ஸ் டிராபி வரலாற்றிலேயே அதிவேக சதத்தை விளாசி இங்கிலாந்து அணியை துவம்சம் செய்தார் ஆஸ்திரேலிய அணியின் விக்கெட் கீப்பர் பேட்ஸ்மேன் ஜோஷ் இங்லிஸ். 2002 ஆம் ஆண்டில் வீரேந்தர் சேவாக் இங்கிலாந்து அணிக்கு எதிராக சாம்பியன்ஸ் டிராபி தொடரில் 77 பந்துகளில் சதம் அடித்து இந்த தொடரில் அதிவேக சதம் அடித்த வீரர் என்ற சாதனையை செய்து இருந்தார்.

சுமார் 23 ஆண்டுகளுக்குப் பிறகு மீண்டும் இங்கிலாந்து அணிக்கு எதிராக ஆஸ்திரேலிய வீரர் ஜோஷ் இங்லிஸ் 77 பந்துகளில் சதம் அடித்து சாம்பியன்ஸ் டிராபி தொடரின் அதிவேக சதம் அடித்து இருந்த சேவாக் சாதனையை சமன் செய்து இருக்கிறார். அது மட்டுமின்றி மற்றொரு சாதனையையும் செய்து இருக்கிறார் ஜோஸ் இங்லிஸ்.

சாம்பியன்ஸ் டிராபியில் விரைவாக 100 ரன்கள் எடுத்த வீரர்கள் -

77 வீரேந்தர் சேவாக் vs இங்கிலாந்து கொழும்பு 2002
77 ஜோஷ் இங்லிஸ் vs இங்கிலாந்து லாகூர் 2025
80 ஷிகர் தவான் vs தென்னாப்பிரிக்கா கார்டிஃப் 2013
87 திலகரத்னே தில்ஷன் vs தென்னாப்பிரிக்கா செஞ்சுரியன் 2009

இங்கிலாந்து அணிக்கு எதிரான 2025 சாம்பியன்ஸ் டிராபி குரூப் பி பிரிவு போட்டியில் ஆஸ்திரேலிய அணியின் விக்கெட் கீப்பர் ஜோஷ் இங்லிஸ் அதிரடியாக சதம் விளாசினார். அவரது சதத்தின் காரணமாக ஆஸ்திரேலிய அணி இந்தப் போட்டியில் எளிதாக வெற்றி பெற்றது.

முதலில் பேட்டிங் செய்த இங்கிலாந்து அணி 50 ஓவர்களில் 351 ரன்கள் எடுத்தது. பின்னர் ஆடிய ஆஸ்திரேலிய அணி முதலில் டிராவிஸ் ஹெட் மற்றும் ஸ்டீவ் ஸ்மித் விக்கெட்டுகளை அடுத்தடுத்து இழந்தது. 27 ரன்களுக்கு இரண்டு விக்கெட்டுகளை இழந்து ஆஸ்திரேலிய அணி தவித்து வந்த நிலையில் மார்னஸ் லாபுஷேன் மற்றும் மேத்யூ ஷார்ட் இணைந்து ரன் குவிப்பில் ஈடுபட்டனர்.

மேத்யூ ஷார்ட் 63 ரன்கள் எடுத்தும், மார்னஸ் லாபுஷேன் 47 ரன்கள் எடுத்தும் ஆட்டமிழந்தனர். ஐந்தாம் வரிசையில் இறங்கிய ஜோஷ் இங்லிஸ் மற்றும் ஆறாம் வரிசையில் இறங்கிய அலெக்ஸ் கேரி பொறுப்பாக விளையாடி இந்த போட்டியின் முடிவை மாற்றினர். அலெக்ஸ் கேரி 69 ரன்கள் எடுத்து ஆட்டமிழந்தார்.

ஜோஷ் இங்லிஸ் கடைசி வரை ஆட்டமிழக்காமல் நின்று சதம் அடித்து அசத்தினார். அவர் 77 பந்துகளில் சதம் அடித்த நிலையில் 86 பந்துகளில் 120 ரன்கள் எடுத்து கடைசி வரை ஆட்டமிழக்காமல் இருந்தார். ஆஸ்திரேலிய அணி 5 விக்கெட் வித்தியாசத்தில் 352 ரன்கள் என்ற இலக்கை வெற்றிகரமாக எட்டியது.

இந்தப் போட்டியில் சதம் அடித்ததன் மூலம் ஜோஷ் இங்லிஸ் மற்றுமொரு சாதனையையும் செய்துள்ளார். ஆஸ்திரேலிய அணிக்காக மூன்று வித கிரிக்கெட் போட்டிகளிலும் சதம் அடித்த நான்காவது வீரர் என்ற சாதனையை அவர் படைத்துள்ளார்.

டி20, ஒருநாள் போட்டிகள் மற்றும் டெஸ்ட் என மூன்று வெவ்வேறு விதமான கிரிக்கெட் போட்டிகளிலும் இதுவரை ஜோஷ் இங்லிஸ் சதம் அடித்து இருக்கிறார். முன்னதாக ஷேன் வாட்சன், கிளென் மேக்ஸ்வெல் மற்றும் டேவிட் வார்னர் இந்த சாதனையை செய்திருந்தனர்.