SENA நாடுகளில் அதிக அரைசதம்.. தோனியை எட்டிப்பிடிக்க முயலும் ரிஸ்வான்.. மிரண்டுபோன ஆஸ்திரேலியா!

சிட்னி: SENA நாடுகளில் அதிக அரைசதங்கள் அடித்த ஆசிய விக்கெட் கீப்பர்கள் பட்டியலில் பாகிஸ்தான் அணியின் ரிஸ்வான் 3வது இடத்திற்கு முன்னேறியுள்ளார்.

ஆஸ்திரேலியா அணிக்கு எதிரான கடைசி டெஸ்ட் போட்டியில் பாகிஸ்தான் அணி விளையாடி வருகிறது. இந்த போட்டியில் டாஸ் வென்ற பாகிஸ்தான் அணி கேப்டன் ஷான் மசூத் பேட்டிங்கை தேர்வு செய்தார். இதையடுத்து களமிறங்கிய பாகிஸ்தான் அணியின் தொடக்க வீரர்களான அப்துல்லா சஃபீக் மற்றும் சயீம் அயூப் இருவரும் டக் அவுட்டாகி வெளியேறினார். தொடர்ந்து வந்த நட்சத்திர வீரர் பாபர் அசாம் 26 ரன்களில் எடுத்து சிறப்பாக விளையாடிய போது, திடீரென கம்மின்ஸ் பந்தில் ஆட்டமிழந்து வெளியேறினார்.

தொடர்ந்து வந்த சக்கீலும் 5 ரன்களில் வெளியேற, பாகிஸ்தான் அணி 75 ரன்களுக்கு 4 விக்கெட்டுகளை இழந்து தடுமாறியது. இந்த நிலையில் கேப்டன் ஷான் மசூத் - ரிஸ்வான் கூட்டணி இணைந்து பாகிஸ்தான் அணியை மீட்க போராடியது. இதில் ஷான் மசூத் 35 ரன்கள் எடுத்து ஆட்டமிழக்க, அனைத்து பொறுப்புகளும் ரிஸ்வான் தலையில் விழுந்தது. இதன்பின் அதிரடிக்கு திரும்பிய ரிஸ்வான், ஆஸ்திரேலியா பவுலர்களை சிதறடித்தார். சரியான பந்துகளை தேர்வு செய்து பவுண்டரிகளாக விளாசி தள்ளினார்.

சிறப்பாக ஆடிய அவர் 74 பந்துகளில் அரைசதம் விளாசி அசத்தினார். டெஸ்ட் கிரிக்கெட்டில் முகமது ரிஸ்வான் அடிக்கும் 9வது அரைசதம் இதுவாகும். இதன்பின் அதிரடியை அடுத்த கியருக்கு மாற்றிய அவர், பாகிஸ்தான் அணியின் ஸ்கோரை வேகமாக உயர்த்தினார். இதனால் சதம் விளாசுவார் என்று எதிர்பார்க்கப்பட்ட நிலையில், 103 பந்துகளில் 2 சிக்ஸ், 10 பவுண்டரி உட்பட 88 ரன்கள் எடுத்து ஆட்டமிழந்தார். இதன்பின் பெவிலியன் நோக்கி நடந்து சென்ற அவருக்கு ரசிகர்கள் எழுந்து கைகளை தட்டி பாராட்டு தெரிவித்தனர்.

SENA நாடுகளில் முகமது ரிஸ்வான் அடிக்கும் 7வது அரைசதம் இது. இதன் மூலமாக ஆசிய விக்கெட் கீப்பர்களில் SENA நாடுகளில் அதிக அரைசதங்கள் விளாசிய வீரர்கள் பட்டியலில் ரிஸ்வான் 3வது இடத்திற்கு முன்னேறியுள்ளார். 15 இன்னிங்ஸ்களில் 7 அரைசதம் அடித்த ரிஸ்வான் 3வது இடத்திலும், 39 இன்னிங்ஸ்களில் 8 அரைசதங்களுடன் இந்திய வீரர் ரிஷப் பண்ட் 2வது இடத்திலும், 60 இன்னிங்ஸில் 13 அரைசதங்கள் அடித்துள்ள இந்திய ஜாம்பவான் தோனி முதலிடத்திலும் இருக்கிறார்.