அந்த 3 பேருக்கும் பேட்டிங் வராது.. வாயை விட்ட இங்கி. வீரர் ராபின்சன்.. வச்சு செய்யும் ஆஸி. ரசிகர்கள்

லண்டன்: இங்கிலாந்து அணி நட்சத்திர வேகப்பந்துவீச்சாளர் ராபின்சன் வாயை விட்டு வாங்கிக் கட்டிக் கொண்டுள்ளார். இந்த சம்பவத்தால் ராபின்சன்னை ஆஸ்திரேலிய ரசிகர்கள் கிண்டல் செய்து வருகின்றனர்.

இங்கிலாந்து - ஆஸ்திரேலியா அணிகளுக்கு இடையிலான ஆஷஸ் தொடர் நடைபெற்று வருகிறது. இதன் முதல் போட்டியில் கேப்டன் கம்மின்ஸால் ஆஸ்திரேலிய அணி 2 விக்கெட்டுகள் வித்தியாசத்தில் த்ரில் வெற்றியை பெற்றது. 2 நாட்களாகியும் ஆஷஸ் தொடர் வெற்றியில் இருந்து ஆஸ்திரேலிய அணி ரசிகர்கள் இன்னும் வெளிவரவில்லை. வெற்றியை தீவிரமாக கொண்டாடி வருகின்றனர்.

இதனிடையே இங்கிலாந்து அணியின் ராபின்சன்னை ஆஸ்திரேலிய ரசிகர்கள் கிண்டல் செய்து வருகின்றனர். 3ஆம் நாள் ஆட்டத்திற்கு பின் செய்தியாளர்களை சந்தித்த ராபின்சன், ஆஸ்திரேலிய அணியின் கடைசி 3 வீரர்களுக்கும் பேட்டிங் வராது. இதுகுறித்து வீரர்களின் ஆலோசனை கூட்டணித்திலும் பேசி இருக்கிறோம். போலாந்த், லயன் மற்றும் ஹேசல்வுட் ஆகிய மூவரும் நம்பர் 11 வீரர்களே என்று ஆஸ்திரேலிய வீரர்களை கிண்டல் செய்தார்.

ஆனால் ஆஷஸ் முதல் போட்டியில் ஆஸ்திரேலிய அணி தரப்பில் நைட் வாட்ச்மேனாக களமிறங்கிய போலாந்த் 20 ரன்களும், லயன் 16* ரன்களும் எடுத்து அந்த அணியின் வெற்றிக்கு முக்கிய காரணமாக அமைந்தனர். குறிப்பாக லயன் அடித்த ஒரு ஸ்ட்ரைட் ட்ரைவ் ரசிகர்கள் மத்தியில் வியப்பை ஏற்படுத்தியது. இந்த நிலையில் ராபின்சன் கருத்துக்கு ஆஸி. கேப்டன் பேட் கம்மின்ஸ் பதிலடி கொடுத்துள்ளார்.

அதில், ராபின்சன் பேசியதை கவனிக்கவில்லை. ஆனால் எங்கள் அணியின் அனைத்து பந்துவீச்சாளர்களும் பேட்டிங் பயிற்சியை தீவிரமாக மேற்கொண்டு வருகின்றனர். குறிப்பாக லயன், போலாந்த் இருவரும் வலைபயிற்சியில் ஈடுபட்டு வருகின்றனர். இந்தத் தொடரில் சரியான திட்டத்துடனே களமிறங்கி இருக்கிறோம். இவ்வளவு ஏன், 2019ஆம் ஆண்டு ஜாக் லீச் கூட சிறந்த நம்பர் 11 பேட்ஸ்மேனாக இருந்தார் என்று தெரிவித்தார். இதையடுத்து ராபின்சன்னை ஆஸ்திரேலிய ரசிகர்கள் வாயை கொடுத்து வாங்கிக் கொண்டதாக கிண்டல் செய்து வருகின்றனர்.