டி20 உலககோப்பை 2026: ஆஸ்திரேலிய அணிக்கு வந்து இறங்கிய இடி.. 2 முக்கிய வீரர்கள் விலகல்

சிட்னி: 2026ஆம் ஆண்டு ஐசிசி ஆண்கள் டி20 உலகக் கோப்பை தொடரில் ஆஸ்திரேலிய அணியின் பிரபல வேகப்பந்து வீச்சாளர் பாட் கம்மின்ஸ் பங்கேற்க மாட்டார் என அறிவிக்கப்பட்டுள்ளது. அவருக்குப் பதிலாக பென் ட்வார்ஷூயிஸ் அணியில் சேர்க்கப்பட்டுள்ளார். அதேபோல், மேத்யூ ஷார்ட்டுக்குப் பதிலாக மாட் ரேன்ஷா, ஆஸ்திரேலிய 15 பேர் அணியில் இடம்பிடித்துள்ளார்.

இந்த அறிவிப்பை கிரிக்கெட் ஆஸ்திரேலியா 'எக்ஸ்' சமூக வலைதளம் மூலம் வெளியிட்டது. மொத்தம் 20 அணிகள் கலந்துகொள்ளும் இந்த உலகக் கோப்பைத் தொடர், 2026 பிப்ரவரி 7 முதல் மார்ச் 8 வரை இந்தியா மற்றும் இலங்கையில் உள்ள எட்டு மைதானங்களில் (இந்தியாவில் ஐந்து, இலங்கையில் மூன்று) நடைபெறவுள்ளன.

கம்மின்ஸ் கடைசியாக 2025-26 ஆஷஸ் தொடரின் மூன்றாவது டெஸ்ட் போட்டியில் ஆஸ்திரேலியாவுக்காக விளையாடினார். 57 டி20 சர்வதேசப் போட்டிகளில் 66 விக்கெட்டுகளை எடுத்திருக்கும் இவர், இறுதியாக 2024 டி20 உலகக் கோப்பையின் சூப்பர் 8 சுற்றில் (ஜூன் 24, 2024 அன்று இந்தியாவுக்கு எதிராக) ஆஸ்திரேலியாவுக்காக களமிறங்கினார்.

பாட் கம்மின்ஸ் இல்லாத நிலையில், ஆஸ்திரேலியாவின் வேகப்பந்து வீச்சுத் தாக்குதலை ஜோஷ் ஹேசில்வுட் வழிநடத்துவார். அவருக்கு பலமாக சேவியர் பார்ட்லெட், நாதன் எல்லிஸ் மற்றும் பென் ட்வார்ஷூயிஸ் ஆகியோர் இருப்பார்கள். ஆல்-ரவுண்டர்களான கேமரூன் கிரீன் மற்றும் மார்கஸ் ஸ்டோய்னிஸ் ஆகியோரும் தங்கள் வேகப் பந்துவீச்சால் முக்கியப் பங்காற்றுவார்கள்.

ஆஸ்திரேலியத் தேர்வாளர் டோனி டோடிமயிட், ட்வார்ஷூயிஸ் மற்றும் ரேன்ஷா ஆகியோர் இத்தொடரில் சிறப்பாகச் செயல்படுவார்கள் என நம்பிக்கை தெரிவித்தார். "பாட் தனது முதுகு காயத்திலிருந்து மீள மேலும் அவகாசம் தேவைப்படுவதால், பென் ஒரு இடது கை வேகப்பந்து வீச்சாளர் மட்டுமின்றி, சிறந்த ஃபில்டர் மற்றும் பின் வரிசையில் அதிரடி ஆட்டத்தையும் வெளிப்படுத்தக்கூடிய மாற்று வீரர் ஆவார்," என்று டோடிமயிட் கூறினார்.

"அவரது துடிப்பான பந்துவீச்சு மற்றும் அதிரடி திறன், ஆடுகளங்களுக்கும், அணியின் ஒட்டுமொத்த அமைப்புக்கும் நன்றாகப் பொருந்தும் என்று கருதுகிறோம்." ரேன்ஷா குறித்துப் பேசிய அவர், "மாட் (ரேன்ஷா) சமீபகாலமாக அனைத்துப் போட்டிகளிலும், குறிப்பாக ஆஸ்திரேலியா, குயின்ஸ்லாந்து புல்ஸ் மற்றும் பிரிஸ்பேன் ஹீட் அணிகளுக்காகப் பல்வேறு வெள்ளைப்பந்து ஃபார்மட்களில் சிறப்பாகச் செயல்பட்டுள்ளார்," என்றார்.

"முன் வரிசை சீராக இருப்பதாலும், இலங்கையில் நடைபெறும் லீக் ஆட்டங்களில் சுழற்பந்து வீச்சுக்குச் சாதகமான ஆடுகளங்கள் இருக்கும் என எதிர்பார்ப்பதாலும், மாட் நடு வரிசைக்கு கூடுதல் பலம் அளிப்பார் என நம்புகிறோம். டிம் டேவிட் தனது காயத்திலிருந்து மீண்டுவரும் திட்டம் தொடக்க கட்டத்தில் உள்ளது." அவர் மேலும், "இடது கை ஆட்டக்காரராக, நடுவரிசை பேட்டிங்கில் அவர் ஒரு தனித்துவமான அம்சத்தை அளிக்கிறார்," என்று தெரிவித்தார்.

டி20 உலகக் கோப்பைக்கான ஆஸ்திரேலியா அணி: மிட்செல் மார்ஷ் (கேப்டன்), சேவியர் பார்ட்லெட், கூப்பர் கொன்னோலி, டிம் டேவிட், பென் ட்வார்ஷூயிஸ், கேமரூன் கிரீன், நாதன் எல்லிஸ், ஜோஷ் ஹேசில்வுட், டிராவிஸ் ஹெட், ஜோஷ் இங்கிலிஸ், மேத்யூ குஹ்னெமன், கிளென் மேக்ஸ்வெல், மாட் ரேன்ஷா, மார்கஸ் ஸ்டோய்னிஸ், ஆடம் சம்பா.