எங்களை அனைத்து பிரிவிலிலும் வங்கதேசம் வீழ்த்திவிட்டது.. தோல்விக்கு சாக்கு சொல்ல விரும்பல.. ஆஸி. கேப்டன் கம்மின்ஸ்

டார்வின்: வங்கதேச அணிக்கு எதிரான முதலாவது டெஸ்ட் போட்டியில் ஆஸ்திரேலிய அணி 9 விக்கெட் வித்தியாசத்தில் அதிர்ச்சித் தோல்வியடைந்தது. சொந்த மண்ணில் வங்கதேச அணிக்கு எதிராக ஆஸ்திரேலியா எதிர்கொள்ளும் முதல் டெஸ்ட் தோல்வி இதுவாகும். இந்தத் தோல்விக்குப் பிறகு பேசிய ஆஸ்திரேலிய அணியின் கேப்டன் பேட் கம்மின்ஸ், வங்கதேச அணி அனைத்து துறைகளிலும் தங்களை விட சிறப்பாக செயல்பட்டதாக பாராட்டினார்.

டார்வினில் உள்ள மர்ராரா கிரிக்கெட் மைதானத்தில் நடைபெற்ற இந்த ஆட்டத்தில், ஆஸ்திரேலிய அணி பேட்டிங், பந்துவீச்சு மற்றும் ஃபீல்டிங் ஆகிய மூன்றிலும் சோபிக்கத் தவறியது. போட்டிக்குப் பிறகு முன்னாள் ஆஸ்திரேலிய விக்கெட் கீப்பரும் பேட்டருமான ஆடம் கில்கிறிஸ்ட்டிடம் பேசிய கம்மின்ஸ், இந்தத் தோல்விக்கு எந்தவித காரணங்களையும் கூற விரும்பவில்லை எனத் தெரிவித்தார்.

"இந்தப் போட்டிக்கான எங்களின் தயாரிப்புகள் மிகச் சிறப்பாக இருந்தன. எனவே, தோல்விக்கு எந்த காரணங்களையும் நாங்கள் கூற முடியாது. வங்கதேச அணி மிகச் சிறப்பாக விளையாடியது. முதல் நாள் ஆட்டத்தின் போது ஆடுகளம் பந்துவீச்சுக்கு சாதகமாக இருந்தது உண்மைதான். ஆனால் நாங்கள் இன்னும் சற்று நீண்ட நேரம் பேட்டிங் செய்திருக்க வேண்டும். அதே நேரத்தில், பந்துவீச்சிலும் எங்களால் விக்கெட்டுகளை வீழ்த்தி அழுத்தத்தை ஏற்படுத்த முடியவில்லை" என்று கம்மின்ஸ் கூறினார்.

மேலும் பேசிய அவர், "வங்கதேச அணி அனைத்து துறைகளிலும் எங்களை விட சிறப்பாக செயல்பட்டது. அவர்கள் ஆட்டத்தில் மிகுந்த பொறுமையையும் ஒழுக்கத்தையும் காட்டினர். ஒருமுறை நாங்கள் போட்டியில் பின்வாங்கியவுடன், மீண்டும் ஆட்டத்திற்குள் நுழைவது மிகவும் கடினமாகிவிட்டது" என்று மனமாரப் பாராட்டினார்.

முதல் டெஸ்டில் ஆஸ்திரேலிய பேட்டர்கள் இரண்டு இன்னிங்ஸ்களிலும் தடுமாறினாலும், அணியில் உடனடியாக எந்த மாற்றமும் செய்யப்போவதில்லை என்று கம்மின்ஸ் தெளிவுபடுத்தியுள்ளார். வரும் நாட்களில் அணியின் செயல்பாடு குறித்து ஆய்வு செய்து, முன்னேற வேண்டிய பகுதிகளைக் கண்டறிய உள்ளதாக அவர் தெரிவித்தார்.

"அதிர்ச்சிகளில் இருந்து மீண்டு வருவதில் ஆஸ்திரேலிய அணி எப்போதும் சிறந்தது. இது போன்ற போட்டிகள் முடியும் போது, அடுத்த போட்டிக்கான அணியின் கட்டமைப்பு குறித்து யோசிப்பது வழக்கம். தோல்வியிலிருந்து பாடம் கற்றுக்கொண்டு, அடுத்த போட்டியில் வலுவாக மீண்டு வருவோம் என்பதில் சந்தேகமில்லை" என்று நம்பிக்கையுடன் கூறினார்.