“பாபர் அசாம் 250 ரன் குவிப்பார்.. பாகிஸ்தான் வெற்றி பெறும்”.. இங்கிலாந்து ஜாம்பவான் பிராட் பேச்சு

லண்டன்: இங்கிலாந்து அணிக்கு எதிரான இரண்டாவது டெஸ்ட் போட்டியில் பாகிஸ்தான் அணி வெற்றி பெற வேண்டுமானால், காயம் காரணமாக முதல் போட்டியில் விளையாடாத பாபர் அசாம் மீண்டும் அணிக்குத் திரும்ப வேண்டும் என்றும், அவர் 250 ரன்கள் வரை குவிக்கக்கூடிய திறமை கொண்டவர் என்றும் இங்கிலாந்து முன்னாள் வேகப்பந்து வீச்சாளர் ஸ்டூவர்ட் பிராட் தெரிவித்துள்ளார். கடந்த சில ஆண்டுகளாக பாபர் அசாம் பெரிய அணிகளுக்கு எதிராக சரியாக ரன் குவிக்கவில்லை என்ற விமர்சனம் இருக்கும் நிலையில் பிராட் இவ்வாறு கூறி இருக்கிறார்.

லீட்ஸ் நகரில் நடைபெற்ற முதல் டெஸ்ட் போட்டியில் இங்கிலாந்து அணியிடம் பாகிஸ்தான் இன்னிங்ஸ் மற்றும் 103 ரன்கள் வித்தியாசத்தில் படுதோல்வி அடைந்தது. பாகிஸ்தான் அணியின் பேட்ஸ்மேன்கள் ஆலி ராபின்சன் மற்றும் ஜோஷ் டங் ஆகியோரின் வேகப்பந்து வீச்சைச் சமாளிக்க முடியாமல் விரைவில் விக்கெட்களை பறிகொடுத்தனர். பாகிஸ்தான் அணி முறையே 171 மற்றும் 135 ரன்களுக்கு அடுத்தடுத்து சுருண்டது.

கையில் ஏற்பட்ட காயம் காரணமாக முதல் போட்டியில் விளையாடாத பாபர் அசாம், லார்ட்ஸ் மைதானத்தில் ஆகஸ்ட் 27 அன்று தொடங்கவுள்ள இரண்டாவது போட்டியில் களம் இறங்குவார் என எதிர்பார்க்கப்படுகிறது. இது குறித்து ஜோஸ் பட்லருடன் 'ஃபார் தி லவ் ஆஃப் கிரிக்கெட்' என்ற நிகழ்ச்சியில் பேசிய ஸ்டூவர்ட் பிராட், "இங்கிலாந்து மண்ணில் இங்கிலாந்தை வீழ்த்த வேண்டுமானால் பாகிஸ்தான் அணிக்கு ஒரு பெரிய அதிர்ஷ்டம் தேவை. பாபர் அசாம் போன்ற ஒரு சிறந்த வீரர் அணியில் இருக்கும் போது, அவரால் 250 ரன்கள் வரை குவிக்க முடியும். பாகிஸ்தான் அணி அதையே நம்பியிருக்க வேண்டும். முதல் போட்டியில் பாபர் அசாம் இல்லாத போது பாகிஸ்தான் பேட்டிங் வரிசை மிகவும் பலவீனமாகத் தெரிந்தது. பாபர் அசாம் தனது காயம் குணமாகி லார்ட்ஸ் மைதானத்தில் களம் இறங்கினால் மட்டுமே அணியின் வீரர்களுக்கு ஒரு புதிய உத்வேகம் கிடைக்கும் என்பதால் அவர் கண்டிப்பாக விளையாட வேண்டும்" என்று கூறியுள்ளார்.

லார்ட்ஸ் மைதானத்தின் ஆடுகளம் குறித்துப் பேசிய பிராட், "லார்ட்ஸ் மைதானத்தில் பேட்ஸ்மேன்களுக்குச் சாதகமான ஆடுகளம் தயாரிக்கப்படும் என எதிர்பார்க்கிறேன். இதற்கு முன்பு நியூசிலாந்துக்கு எதிரான போட்டியின் போது லாதம், ரவீந்திரா, வில்லியம்சன், மிட்செல் மற்றும் பிளெண்டல் போன்ற பேட்ஸ்மேன்கள் இங்கு சிறப்பாக விளையாடினர். அதேபோல் இந்த ஆடுகளமும் பிளாட் விக்கெட்டாக பேட்டிங்கிற்கு சாதகமாக இருக்கும்" என்று தெரிவித்துள்ளார்.

இந்த வீரரை டீமில் இருந்து தூக்க வேண்டிய நேரம்.. அவருக்கு பேக்-பூட்டில் ஆட வரலை.. பாண்டிங் அதிரடி

பாகிஸ்தான் அணியின் சிறந்த பேட்ஸ்மேனான பாபர் அசாம் மீண்டும் அணிக்குத் திரும்பும் பட்சத்தில், அது இங்கிலாந்து பந்துவீச்சாளர்களுக்குப் பெரிய சவாலாக அமையும் என எதிர்பார்க்கப்படுகிறது.