8ஆம் வகுப்பு வரை மட்டுமே படித்த பாபர் அசாம்.. ஹார்வர்ட் பல்கலைக்கழகத்தில் சேர்ந்தது எப்படி?

லாகூர்: பாகிஸ்தான் கிரிக்கெட் அணியின் முன்னணி வீரரான பாபர் அசாம், கிரிக்கெட் விளையாட்டிற்குள் நுழைவதற்கு முன்பு லாகூரில் 8-ஆம் வகுப்பு வரை மட்டுமே படித்ததாகக் கூறப்படுகிறது. ஆனால், பல ஆண்டுகளுக்குப் பிறகு, அவர் 2023-இல் புகழ்பெற்ற ஹார்வர்ட் பிசினஸ் ஸ்கூல் கல்வித் திட்டத்தில் பங்கேற்று அனைவரையும் ஆச்சரியப்படுத்தினார்.

பாகிஸ்தான் அணியின் முன்னணி பேட்டரான பாபர் அசாம், வகுப்பறைகளை விட கிரிக்கெட் மைதானங்களால் செதுக்கப்பட்ட ஒரு தனித்துவமான பாதையைத் தேர்ந்தெடுத்தார். அக்டோபர் 15, 1994 அன்று பஞ்சாபின் லாகூரில் பிறந்த இவர், கிரிக்கெட் ஆர்வம் மிகுந்த ஒரு குடும்பத்தில் வளர்ந்தார். இவரது நெருங்கிய உறவினர்களான கம்ரான் அக்மல் மற்றும் உமர் அக்மல் ஆகிய இருவரும் ஏற்கனவே பாகிஸ்தான் தேசிய அணிக்காக விளையாடிய புகழ்பெற்ற சர்வதேச கிரிக்கெட் வீரர்கள் ஆவர்.

உலகம் அறிந்த கிரிக்கெட் வீரராக உருவெடுப்பதற்கு நீண்ட காலத்திற்கு முன்பு, லாகூரில் உள்ள புகழ்பெற்ற கடாபி மைதானத்தில் பாபர் அசாம் பந்து பொறுக்கி போடும் சிறுவனாக பணியாற்றினார். இந்த ஆரம்பகால அனுபவம், கிரிக்கெட் விளையாட்டின் மீது அவருக்கு இருந்த காதலை மேலும் அதிகரித்தது. படிப்பில் கவனம் செலுத்துவதை விட, தொழில்முறை கிரிக்கெட் விளையாடுவதையே அவர் தனது முதன்மை லட்சியமாகக் கொண்டார்.

இந்திய அணியின் தேர்வுக்குழுத் தலைவராகிறாரா ரவி சாஸ்திரி? முன்னாள் வீரர் சொன்ன கருத்து

பாபர் அசாம் தனது முழு நேர கிரிக்கெட்க்கு முன்பு, லாகூரில் உள்ள அலி எஜுகேஷன் சிஸ்டத்தில் 8-ஆம் வகுப்பு வரை மட்டுமே படித்தார் என்று கூறப்படுகிறது. இருப்பினும், இந்த விவரம் பாபர் அசாம் தரப்பிலிருந்து இதுவரை அதிகாரப்பூர்வமாக உறுதிப்படுத்தப்படவில்லை.

அவரது ஆரம்பகால கிரிக்கெட் கல்வி லாகூர் மைதானங்களில் இருந்து தொடங்கியது. அங்கு புகழ்பெற்ற பயிற்சியாளர் ராணா சாதிக் இவருக்கு பேட்டிங்கின் அடிப்படை நுணுக்கங்களைக் கற்றுக்கொடுத்து, அவரது கிளாசிக் பேட்டிங் ஸ்டைலுக்கு வலுவான அடித்தளத்தை அமைத்தார்.

கிரிக்கெட்டில் பாபர் அசாமின் வளர்ச்சி மிக வேகமாக இருந்தது. அவர் 2010 மற்றும் 2012 ஆகிய இரு ஆண்டுகளிலும் நடைபெற்ற 19 வயதுக்குட்பட்டோருக்கான உலகக் கோப்பை தொடரில் பாகிஸ்தான் அணிக்காக விளையாடினார். இந்த இரண்டு உலகக் கோப்பை தொடர்களிலுமே அவர் தனது அணியில் அதிக ரன் குவித்த வீரராக மிகச் சிறந்த பங்களிப்பை வழங்கினார்.

ஜராய் தரகியாதி வங்கி லிமிடெட் மற்றும் இஸ்லாமாபாத் லியோபார்ட்ஸ் உள்ளிட்ட உள்நாட்டு அணிகளுக்காக லிஸ்ட் ஏ மற்றும் வயது வரம்பு போட்டிகளில் சிறப்பாக விளையாடினார். அதன் தொடர்ச்சியாக, 2015-ஆம் ஆண்டில் ஜிம்பாப்வேக்கு எதிரான ஒருநாள் போட்டியில் களமிறங்கி, பாகிஸ்தான் தேசிய அணியில் தனது சர்வதேச பயணத்தைத் தொடங்கினார்.

தேசிய அணியில் பாபர் அசாம் தனக்கான இடத்தை நிலைநிறுத்திக் கொண்ட பின்னர், முறையான கல்வி முற்றிலும் பின்னுக்குத் தள்ளப்பட்டது. 2019-இல் ஒருநாள் போட்டிக்கும், 2020-இல் டெஸ்ட் போட்டிக்கும் கேப்டனாக பொறுப்பேற்றார். இந்த காலகட்டத்தில் அவர் கல்லூரி அல்லது பல்கலைக்கழகப் படிப்பைத் தொடரவில்லை.

இந்த நிலையில் தான், மே 2023-இல், பாபர் அசாம் தனது கல்விச் சான்றில் ஒரு புதிய மைல்கல்லைச் சேர்த்தார். அவரும் அவரது சக வீரரான முகமது ரிஸ்வானும் அமெரிக்காவின் புகழ்பெற்ற ஹார்வர்ட் பிசினஸ் ஸ்கூலின் 'பிசினஸ் ஆஃப் என்டர்டெயின்மென்ட், மீடியா மற்றும் ஸ்போர்ட்ஸ்' (BEMS) என்ற நிர்வாகக் கல்வித் திட்டத்தில் இணைந்தனர்.

Also Read

கம்பீர் இல்லை.. இந்திய அணியின் சிறந்த பயிற்சியாளர் இவர் தான்.. முகமது ஷமி கருத்து

இந்தத் திட்டத்தில் சேர்ந்த முதல் கிரிக்கெட் வீரர்கள் என்ற பெருமையை இவர்கள் பெற்றனர். இந்த நான்கு நாள் படிப்பு குறித்துப் பேசிய பாபர் அசாம், 'உலகெங்கிலும் உள்ள சமூகங்களுடன் இணையவும், பல புதிய விஷயங்களை ஆராயவும், கற்றுக்கொண்டு வளரவும்' இந்தத் திட்டத்தைத் தேர்ந்தெடுத்ததாக நெகிழ்ச்சியுடன் பகிர்ந்து கொண்டார்.