10 ஆண்டுகளில் மெகா வெற்றி.. ஆசிய கோப்பைக்கு முன் நெதர்லாந்தை ஊதித்தள்ளிய வங்கதேசம்

தாகா: ஆசியக் கோப்பை தொடருக்குத் தயாராகும் விதமாக, வங்கதேச அணி தனது சொந்த மண்ணில் நெதர்லாந்துக்கு எதிரான முதல் டி20 போட்டியில் இமாலய வெற்றியைப் பதிவு செய்துள்ளது. சனிக்கிழமை சில்ஹெட்டில் நடைபெற்ற இந்தப் போட்டியில், நெதர்லாந்தை 8 விக்கெட் வித்தியாசத்தில் மிக எளிதாக வீழ்த்தியது வங்கதேசம்.

இந்தப் போட்டியில் 39 பந்துகள் மீதமிருந்த நிலையில் வெற்றியை வசப்படுத்தியதன் மூலம், கடந்த 10 ஆண்டுகளில் தனது சொந்த மண்ணில் பந்துகள் அடிப்படையில் பெற்ற மிகப்பெரிய வெற்றியைப் பதிவு செய்து வரலாற்று சாதனை படைத்துள்ளது.

டாஸ்கின் அஹமதின் அனல் பறந்த பந்துவீச்சு!

டாஸ் வென்ற நெதர்லாந்து அணி முதலில் பேட்டிங்கைத் தேர்வு செய்தது. ஆனால், வங்கதேசத்தின் வேகப்பந்து வீச்சாளர் டாஸ்கின் அஹமதின் துல்லியமான பந்துவீச்சுக்கு முன் நெதர்லாந்து பேட்ஸ்மேன்கள் மிரண்டு போயினர். போட்டியின் ஆரம்பம் முதலே ஆதிக்கம் செலுத்திய டாஸ்கின், நெதர்லாந்தின் டாப் ஆர்டரான மேக்ஸ் ஓ'டவுட், விக்ரம்ஜித் சிங், நோவா க்ரோஸ் மற்றும் கைல் க்ளெய்ன் ஆகியோரின் விக்கெட்டுகளை அடுத்தடுத்து சாய்த்து அதிர்ச்சி கொடுத்தார். தனது 4 ஓவர்களில் 28 ரன்களை மட்டுமே விட்டுக்கொடுத்து 4 முக்கிய விக்கெட்டுகளை அவர் கைப்பற்றினார்.

அவருடன் முஸ்தாபிசுர் ரஹ்மான் சிக்கனமாகப் பந்துவீசி ஒரு விக்கெட்டையும், சயிஃப் ஹசன் இரண்டு விக்கெட்டுகளையும் வீழ்த்த, நெதர்லாந்து அணி ரன் குவிக்க முடியாமல் திணறியது. அந்த அணியில் அதிகபட்சமாக தேஜா நிடமனூரு 26 ரன்கள் எடுத்தார். இறுதியில், நெதர்லாந்து அணி 20 ஓவர்கள் முடிவில் 8 விக்கெட் இழப்பிற்கு 136 ரன்கள் மட்டுமே எடுத்தது.

லிட்டன் தாஸின் மின்னல் வேக அரைசதம்!

137 ரன்கள் என்ற எளிய இலக்கைத் துரத்திய வங்கதேச அணிக்கு, கேப்டன் லிட்டன் தாஸ் அதிரடியான தொடக்கத்தை அளித்தார். மைதானத்தின் நாலாபுறமும் பவுண்டரிகளையும் சிக்ஸர்களையும் பறக்கவிட்ட அவர், வெறும் 26 பந்துகளில் அரைசதத்தைக் கடந்து அசத்தினார். கடைசி வரை ஆட்டமிழக்காமல் இருந்த லிட்டன், 29 பந்துகளில் 6 பவுண்டரிகள் மற்றும் 2 சிக்ஸர்களுடன் 54 ரன்கள் குவித்தார்.

அவருக்குப் பக்கபலமாக ஆடிய தன்சித் ஹசன் 29 ரன்களில் ஆட்டமிழந்தார். பின்னர் களமிறங்கிய சயிஃப் ஹசன், தனது பங்கிற்கு 19 பந்துகளில் 3 சிக்ஸர்களுடன் 36 ரன்கள் விளாசி ஆட்டத்தை வெற்றிகரமாக முடித்து வைத்தார். வெறும் 13.3 ஓவர்களில் 2 விக்கெட்டுகளை மட்டுமே இழந்து வங்கதேச அணி வெற்றி இலக்கை அடைந்தது. இந்த அபார வெற்றியின் மூலம், வங்கதேச அணி தொடரில் 1-0 என முன்னிலை பெற்று, ஆசியக் கோப்பைக்குத் தாங்கள் மிக வலிமையாக தயாராகி வருவதை நிரூபித்துள்ளது.