“உலக டெஸ்ட் சாம்பியன்ஷிப் பைனலுக்கு கண்டிப்பா போவோம்”.. ஆஸ்திரேலியாவை வீழ்த்திய வங்கதேச அணி திட்டம்

தாகா: ஆஸ்திரேலிய மண்ணில் முதல் டெஸ்ட் வெற்றியைப் பதிவு செய்துள்ள வங்கதேச அணி, அடுத்து 2027 உலக டெஸ்ட் சாம்பியன்ஷிப் இறுதிப்போட்டிக்கு முன்னேற வாய்ப்பு உள்ளதாக அந்த அணியின் தேர்வுக் குழு தலைவர் கூறி இருக்கிறார். 21ஆம் நூற்றாண்டில் ஆஸ்திரேலிய மண்ணில் இந்தியாவுக்கு அடுத்து டெஸ்ட் வெற்றி பெற்ற இரண்டாவது ஆசிய அணி என்ற வரலாற்றுச் சிறப்புமிக்க சாதனையை செய்த வங்கதேச அணி, ஐசிசி டெஸ்ட் தரவரிசையிலும் பெரும் முன்னேற்றம் கண்டுள்ளது.

தற்போது வங்கதேச அணி உலக டெஸ்ட் சாம்பியன்ஷிப் (2025-27) புள்ளிப் பட்டியலில் 40 புள்ளிகள் மற்றும் 55.56 சதவீதத்துடன் 4 வது இடத்தில் உள்ளது. 2027 ஆம் ஆண்டு ஜூன் மாதம் லண்டனில் உள்ள தி ஓவல் மைதானத்தில் நடைபெறவுள்ள இறுதிப் போட்டிக்குத் தகுதி பெற வேண்டுமானால், புள்ளிப் பட்டியலில் முதல் இரண்டு இடங்களில் இருக்க வேண்டும். வங்கதேச அணிக்கு இன்னும் 5 டெஸ்ட் போட்டிகள் மட்டுமே மீதமுள்ளன. இதில் குறைந்தது 4 போட்டிகளில் வென்றால், 66.67 சதவீதத்துடன் முதல் இரண்டு இடங்களைப் பிடித்து இறுதிப்போட்டிக்குத் தகுதி பெறுவதை உறுதி செய்ய முடியும்.

வங்கதேச அணி அடுத்து விளையாடவுள்ள 3 டெஸ்ட் தொடர்களில் 2 தொடர்களைத் தனது சொந்த மண்ணில் விளையாட உள்ளது. வெஸ்ட் இண்டீஸ் அணிக்கு எதிராக 2 டெஸ்ட் போட்டிகளும், இங்கிலாந்துக்கு எதிராக 1 டெஸ்ட் போட்டியும் சொந்த மண்ணில் நடைபெறவுள்ளன. மேலும், வரும் நவம்பர் மாதம் தென்னாப்பிரிக்காவுக்குச் சுற்றுப்பயணம் மேற்கொண்டு 2 டெஸ்ட் போட்டிகளில் விளையாட உள்ளது.

இது குறித்துப் பேசிய வங்கதேச கிரிக்கெட் அணியின் தேர்வுக் குழு தலைவர் ஹபிபுல் பஷார், "உலக டெஸ்ட் சாம்பியன்ஷிப் தொடரில் நாங்கள் மிகவும் வலுவான நிலையில் இருக்கிறோம். ஆஸ்திரேலியாவுக்கு எதிரான வெற்றி மட்டுமல்லாமல், அதற்கு முன்பு பாகிஸ்தானுக்கு எதிராகச் சொந்த மண்ணிலும் அவர்களின் நாட்டிலும் பெற்ற வெற்றிகள் எங்களின் பலத்தைக் காட்டுகின்றன. கடந்த 2 ஆண்டுகளை ஒப்பிடும் போது வங்கதேச டெஸ்ட் கிரிக்கெட் நீண்ட தூரம் முன்னேறி உள்ளது. கடந்த 2000 ஆம் ஆண்டு முதல் வங்கதேச அணி விளையாடிய புள்ளிவிவரங்களுடன் கடந்த இரண்டு ஆண்டுகளை ஒப்பிடும் போது தற்போதைய முன்னேற்றம் மிகச் சிறப்பானது" என்று கூறினார்.

“மாம்பா மென்டாலிட்டி”.. பண்ட்டின் அறிவுரை.. துருவ் ஜுரல் சதம் அடித்த பின்னணி!

மேலும் அவர், "உலக அளவில் சிறந்த டெஸ்ட் அணி என்று இப்போதே எங்களைக் கூற முடியாது என்றாலும், எங்களால் உலக அரங்கில் ஒரு தனித்துவமான தாக்கத்தை ஏற்படுத்த முடிந்துள்ளது. மீதமுள்ள போட்டிகளிலும் சிறப்பாகச் செயல்பட நாங்கள் ஆவலுடன் இருக்கிறோம்" என்று தெரிவித்தார்.

Also Read

வியக்க வைத்த வைபவ் சூர்யவன்ஷி.. பேட்டிங்கில் சொதப்பினாலும் பவுலிங்கில் 4 பந்துகளில் 2 விக்கெட்