105 ரன்கள் வித்தியாசத்தில் ஆப்கனை அபாரமாக வீழ்த்தியது வங்கதேசம்!

வங்கதேசம் தடுமாற்றம்

டாசில் வெற்றி பெற்ற வங்கதேசம் பேட்டிங்கை தேர்வு செய்தது. அந்த அணியின் தொடக்க வீரர்கள் அனாமுல் ஹாக் 29 ரன்களிலும், தமிம் இக்பால் 19 ரன்களிலும் ஆட்டமிழந்து ஏமாற்றம் அளித்தனர். இதைத் தொடர்ந்து சவும்யா சர்க்கார் 28, மமுதுல்லா 23, ஆகியோரும் அடுத்தடுத்து நடையை கட்டினர். இதனால் 30வது ஓவரில் வங்கதேசம் 119 ரன்களை மட்டுமே சேர்த்து 4 விக்கெட்டுகளை இழந்து தடுமாறியது.

மிடில் ஆர்டன் அபாரம்

இருப்பினும் ஷகிப் அல் ஹசன் 63 ரன்களும், முஷாபிர் ரஹிம் 71 ரன்களும் குவித்து நல்ல பார்ட்னர்ஷிப் கொடுத்ததால் வங்கதேசம் மீண்டது. இறுதியில் களமிறங்கிய பேட்ஸ்மேன்கள் சொற்ப ரன்னில் ஆட்டமிழக்க வங்கதேசம் கடைசி ஓவரில் 267 ரன்களுக்கு ஆல்-அவுட் ஆனது. ஆப்கன் தரப்பில் ஹமீத் ஹாசன், ஷப்பூர் ஜர்டான், அப்டாப் ஆலம், மிர்வாயிஸ் அஷ்ரப் ஆகியோர் தலா 2 விக்கெட்டுகளை வீழ்த்தி அசத்தினர்.

மூன்று ரன்களுக்கு மூன்று விக்கெட்

இதைத் தொடர்ந்து ஆப்கானிஸ்தான் பேட்டிங்கை தொடங்கியது. ஆனால் ஆரம்பத்திலேயே அதிர்ச்சி காத்திருந்தது. அந்த அணியின் ஜாவீத் அகமது, அப்சர் ஜசாய் மற்றும் அஸ்கர் ஸ்டைனிக்சாய் ஆகியோர் தலா 1 ரன்கள் எடுத்து அடுத்தடுத்து நடையை கட்டினர். இதனால் 3 ஓவர்களில் ஆப்கானிஸ்தான் அணி 3 ரன்களுக்கு 3 விக்கெட்டுகளை இழந்தது (ஒருவேள 3ம் நம்பர் ஆப்கனுக்கு ராசியில்லையோ) .

மிடில் ஆர்டரில் ஓரளவு ரன்கள்

இருப்பினும் நவ்ரோஸ் மங்கல் 27 ரன்கள், சமுல்லா சென்வாரி 42 ரன்கள், கேப்டன் முகமது நபி 44 ரன்கள் எடுத்து அணியை சரிவில் இருந்து மீட்க போராடினர். இருப்பினும் மற்ற வீரர்கள் சீரான இடைவெளியில் சொற்ப ரன்களில் நடையை கட்டினர். எனவே 42.5 ஓவர்களில் 162 ரன்களுக்கு ஆப்கானிஸ்தான் ஆல் அவுட் ஆனது. வங்கதேசம் 105 ரன்கள் வித்தியாசத்தில் வெற்றி பெற்றது. வங்கதேச தரப்பில் வேகப்பந்து வீச்சாளர் மஸ்ரப் மொர்டசா அதிகபட்சமாக 3 விக்கெட்டுகளை வீழ்த்தினார்.

வங்கதேசம் எழுச்சி

வங்கதேசம் கடந்த ஆண்டு நவம்பர் மாதம் முதல் இதுவரை தொடர்ந்து 6 ஒருநாள் போட்டிகளில் வெற்றி பெற்றுள்ளது. கடந்த உலககோப்பை போட்டி மற்றும் இந்த உலக கோப்பையின் முதல் ஆட்டம் ஆகியவற்றை சேர்த்தால் மொத்தம் 6 போட்டிகளில் 4ல் வெற்றி பெற்று அசத்தியுள்ளது வங்கதேசம்.