இந்தியாவுக்கு எதிராக வங்கதேசத்தை தூண்டிவிட்ட பாகிஸ்தான்? உலகக்கோப்பை புறக்கணிப்பு பின்னணி என்ன?

டாக்கா: இந்தியாவில் நடைபெறவுள்ள 2026 டி20 உலகக்கோப்பை கிரிக்கெட் தொடரில் பங்கேற்கப் போவதில்லை என்பதில் வங்கதேச அரசு உறுதியாக உள்ளது. ஐசிசி காலக்கெடு விதித்த போதிலும், வங்கதேச விளையாட்டுத்துறை அமைச்சர் ஆசிப் நஸ்ருல் இந்த முடிவை திட்டவட்டமாக மீண்டும் அறிவித்துள்ளார். ஒருவேளை வங்கதேசம் இந்தத் தொடரில் பங்கேற்காவிட்டால், அவர்கள் ஐசிசியின் நடவடிக்கைக்கு ஆளாக நேரிடும் என்ற சூழல் நிலவுகிறது. இந்த விவகாரத்தின் பின்னணியில் பாகிஸ்தான் இருப்பதாக தற்போது தகவல்கள் வெளியாகியுள்ளன.

வங்கதேச அணி இந்தியாவில் விளையாட மறுப்பு தெரிவித்ததால், அவர்களின் போட்டிகளை வேறு பொதுவான இடத்திற்கு மாற்றுவது குறித்து ஐசிசி வாக்கெடுப்பு நடத்தியது. இதில் மொத்தம் 16 உறுப்பு நாடுகள் வாக்களித்தன. முடிவில், 14 நாடுகள் வங்கதேசத்தின் கோரிக்கைக்கு எதிராகவும், போட்டியை திட்டமிட்டபடி இந்தியாவிலேயே நடத்த வேண்டும் என்றும் வாக்களித்தன. வங்கதேசம் மற்றும் பாகிஸ்தான் ஆகிய இரண்டு நாடுகள் மட்டுமே இடம் மாற்றத்திற்கு ஆதரவாக வாக்களித்தன. இதன் மூலம் கிரிக்கெட் உலகில் வங்கதேசம் அடியோடு தனிமைப்படுத்தப்பட்டுள்ளது.

இந்த விவகாரத்தில் பாகிஸ்தான் கிரிக்கெட் வாரியம் (PCB) மறைமுகமாக முக்கிய பங்காற்றியதாகக் கூறப்படுகிறது. 2025 சாம்பியன்ஸ் டிராபி விவகாரத்திலிருந்தே இந்திய கிரிக்கெட் வாரியத்துடன் பாகிஸ்தான் மோதல் போக்கை கடைபிடித்து வருகிறது. தற்போது வங்கதேசத்தின் எதிர்ப்பைத் தூண்டிவிட்டு, அவர்களைத் தங்களுக்கு ஆதரவாக மாற்ற பாகிஸ்தான் முயற்சிப்பதாகத் தெரிகிறது.

வாக்கெடுப்புக்கு முன்னதாக, பாகிஸ்தான் வாரியம் வங்கதேசத்திற்கு ஒரு மின்னஞ்சல் அனுப்பியதாகத் தகவல்கள் தெரிவிக்கின்றன. அதில், "வங்கதேசத்தின் கோரிக்கை நியாயமானது. ஒருவேளை இலங்கையில் போட்டிகளை நடத்த சிக்கல் இருந்தால், உங்கள் போட்டிகளை பாகிஸ்தானில் நடத்த நாங்கள் தயாராக இருக்கிறோம்" என்று உறுதியளித்துள்ளதாகக் கூறப்படுகிறது.

பாகிஸ்தான் கிரிக்கெட் அணியின் முன்னாள் வீரர் ரஷீத் லத்தீப் இந்த விவகாரத்தில் வங்கதேசத்திற்கு ஆதரவு தெரிவித்துள்ளார். "பாகிஸ்தான் பங்கேற்காவிட்டால் உலகக்கோப்பையே ஸ்தம்பித்துவிடும். வங்கதேசத்திற்கு ஆதரவாக பாகிஸ்தானும் உலகக்கோப்பையை புறக்கணிக்க வேண்டும். இப்போதுதான் நாம் யாருக்கு ஆதரவு அளிக்கிறோம் என்பதை காட்ட வேண்டிய நேரம்" என்று அவர் தனது வாரியத்திற்கு கோரிக்கை விடுத்துள்ளார். இது ஆசிய கிரிக்கெட் நாடுகளுக்குள் பிளவை ஏற்படுத்தும் முயற்சியாகவே பார்க்கப்படுகிறது.

வங்கதேசம் செய்யும் முட்டாள்தனம்

வங்கதேசத்தின் இந்த முடிவு குறித்து முன்னாள் இந்திய வீரர் மதன் லால் கடும் விமர்சனம் செய்துள்ளார். அவர் கூறுகையில், "வங்கதேசத்தின் முடிவு முட்டாள்தனமானது. இதனால் இந்தியாவுக்கு எந்த இழப்பும் இல்லை. வர்த்தக ரீதியாகவும், விளையாட்டு ரீதியாகவும் வங்கதேசத்திற்கே பெரிய இழப்பு ஏற்படும். இந்தியாவை எதிர்க்க வேண்டும் என்ற நோக்கில் பாகிஸ்தான் தான் வங்கதேசத்தை தவறான பாதைக்கு அழைத்துச் செல்கிறது" என்று குற்றம் சாட்டியுள்ளார்.

ஐசிசி தனது முடிவில் உறுதியாக உள்ளது. ஒருவேளை வங்கதேசம் பிடிவாதமாகத் தொடரை புறக்கணித்தால், அவர்களுக்குப் பதிலாக ஸ்காட்லாந்து அணிக்கு வாய்ப்பு வழங்கப்படலாம். அப்படி நடந்தால், வங்கதேச கிரிக்கெட் அணி அடுத்து வரும் ஐசிசி தொடர்களில் பங்கேற்கத் தடை விதிக்கப்படலாம். இதனால் அந்த அணி பொருளாதாரத்திலும் பல ஆண்டுகள் பின்னோக்கிச் செல்லும் அபாயம் உள்ளது. ஏற்கனவே அணியில் உட்கட்சி பூசல்கள் மற்றும் ஊழல் புகார்கள் உள்ள நிலையில், இந்த விவகாரம் வங்கதேச கிரிக்கெட்டிற்குப் பெரும் பின்னடைவை ஏற்படுத்தும்.