டேவிட் வார்னர் அதிரடி சதம்.. விராட் கோலி சாதனை சமன்.. ரோகித் சாதனை முறியடிப்பு.. 39 வயதில் அசத்தல்

சிட்னி: ஆஸ்திரேலிய நட்சத்திர வீரர் டேவிட் வார்னர், ஜனவரி 3 அன்று பிக் பாஷ் லீக்கில் சிட்னி தண்டர் அணிக்காக ஆட்டமிழக்காமல் 130 ரன்கள் எடுத்தார். தனது 9வது டி20 சதத்தைப் பதிவு செய்த அவர், இந்திய நட்சத்திர வீரர் விராட் கோலியின் சாதனையைச் சமன் செய்தார். இருப்பினும், ஹோபர்ட் ஹரிகேன்ஸ் அணியின் வெற்றியால் அவரது சிறப்பான ஆட்டம் வீணானது.

65 பந்துகளில் 9 சிக்ஸர்கள், 11 பவுண்டரிகளுடன் 130 ரன்கள் குவித்த வார்னர், நடப்பு பிக் பாஷ் சீசனின் அதிகபட்ச தனிநபர் ஸ்கோரை பதிவு செய்தார். இதன்மூலம் ரோஹித் ஷர்மாவை பின்தள்ளி, விராட் கோலிக்கு இணையாக 9 சதங்களை எட்டினார்.

முதலில் பேட் செய்த சிட்னி தண்டர் அணி, இரண்டாவது பந்திலேயே 0-2 என தடுமாறியது. ஓப்பனராக களமிறங்கிய கேப்டன் வார்னரும், விக்கெட் கீப்பர் சாம் பில்லிங்ஸும் மூன்றாவது விக்கெட்டுக்கு 66 ரன்கள் சேர்த்தனர்.

பில்லிங்ஸ் வெளியேறியதும், வார்னரும் நிக் மேடின்சனும் நான்காவது விக்கெட்டுக்கு 95 ரன்கள் ஜோடி சேர்ந்து அணியை மீட்டனர். மேடின்சன் 'ரிட்டயர்ட் அவுட்' முறையில் வெளியேற, டேனியல் சாம்ஸுடன் இணைந்து வார்னர் 44 ரன்கள் குவித்து, தண்டர் அணியை 205/4 என்ற ஸ்கோரை எட்ட உதவினார்.

அதிக டி20 சதங்கள் அடித்தவர்களின் பட்டியலில் கிறிஸ் கெய்ல் (22), பாபர் அசாம் (11) ஆகியோர் முதல் இரு இடங்களில் உள்ளனர். ரிலீ ரோசோ, விராட் கோலி, டேவிட் வார்னர் மூவரும் தலா 9 சதங்களுடன் அடுத்த இடங்களை பகிர்ந்துகொண்டுள்ளனர். ஒரு சதம் அடித்தால், வார்னர் மூன்றாவது அதிக சதம் அடித்த வீரர் ஆவார்.

206 ரன்கள் இலக்கை துரத்திய ஹோபர்ட் ஹரிகேன்ஸ் அணிக்கு, டிம் வார்ட் மற்றும் மிட்ச் ஓவன் 108 ரன்கள் ஓப்பனிங் பார்ட்னர்ஷிப் அமைத்து வலுவான அடித்தளம் இட்டனர். ஓவன் வெளியேற, வார்டும் ரெஹான் அகமதும் இரண்டாவது விக்கெட்டுக்கு 40 ரன்கள் சேர்த்தனர்.

இறுதியாக, 166/4 என்ற நிலையில் இருந்த ஹரிகேன்ஸ், நிகில் சவுத்ரி மற்றும் விக்கெட் கீப்பர் மேத்யூ வேட் ஐந்தாவது விக்கெட்டுக்கு 44 ரன்கள் சேர்த்து இலக்கை எளிதாகக் கடந்தனர். இப்போட்டியில் ஹரிகேன்ஸ் ஆறு விக்கெட் வித்தியாசத்தில் சிட்னி தண்டர் அணியை வீழ்த்தி வெற்றி பெற்றது.