ஷமி, இஷான் கிஷன் மட்டுமில்லை.. 5 வீரர்கள் அதிரடி நீக்கம்.. பிசிசிஐ ஒப்பந்தத்தில் மாற்றம்.. ஏன்?

மும்பை: இந்திய கிரிக்கெட் வாரியம் (பிசிசிஐ) நேற்று வெளியிட்ட 2025-26ஆம் ஆண்டிற்கான வீரர்களின் வருடாந்திர ஒப்பந்தப் பட்டியலில், முகமது ஷமி மற்றும் இஷான் கிஷன் உள்ளிட்ட 5 முக்கிய வீரர்கள் அதிரடியாக நீக்கப்பட்டுள்ளனர். கடந்த ஆண்டு ஒப்பந்தத்தில் இருந்த இவர்கள், இம்முறை எந்தப் பிரிவிலும் சேர்க்கப்படாததற்கான காரணங்கள் தற்போது வெளியாகியுள்ளன. மொத்த வீரர்களின் எண்ணிக்கையை 34 -இல் இருந்து 30 ஆகக் குறைத்துள்ள பிசிசிஐ, அணியில் தொடர்ந்து விளையாடுபவர்களுக்கு மட்டுமே முன்னுரிமை என்ற கொள்கையைக் கடைப்பிடித்துள்ளது.

முகமது ஷமிக்கு ஏன் இடமில்லை?

இந்திய அணியின் முன்னணி வேகப்பந்து வீச்சாளராகத் திகழ்ந்த முகமது ஷமி, கடந்த முறை 'கிரேட் ஏ' பிரிவில் இருந்தார். ஆனால், 2025 சாம்பியன்ஸ் டிராபி இறுதிப்போட்டிக்குப் பிறகு அவர் இந்திய அணிக்காக ஒரு சர்வதேச போட்டியில் கூட விளையாடவில்லை. நீண்ட காலமாக அணியில் இடம்பெறாமல் இருப்பதும், காயம் காரணமாகப் போட்டிகளில் பங்கேற்காததுமே அவரது நீக்கத்திற்குக் காரணமாக அமைந்துள்ளது.

இஷான் கிஷன் நீக்கம் ஏன்?

விக்கெட் கீப்பர் இஷான் கிஷன், சமீபத்தில் நடைபெற்ற டி20 போட்டிகளில் சிறப்பாகச் செயல்பட்டிருந்தாலும், பிசிசிஐ கணக்கிடும் குறிப்பிட்ட காலக்கட்டத்தில் அவர் எந்த சர்வதேச போட்டியிலும் விளையாடவில்லை. ஒப்பந்தம் என்பது கடந்த காலச் செயல்பாடுகளை வைத்தே வழங்கப்படுகிறது. அந்தக் குறிப்பிட்ட காலத்தில் அவர் அணியில் இல்லாததே அவருக்கு ஒப்பந்தம் மறுக்கப்படக் காரணமாகிவிட்டது.

சர்ஃபராஸ் கான் மற்றும் ரஜத் படிதார்

உள்நாட்டுப் போட்டிகளில் ரன் மழை பொழிந்த சர்ஃபராஸ் கான், தனக்குக் கிடைத்த வாய்ப்புகளைச் சரியாகப் பயன்படுத்தவில்லை என்று தேர்வுக் குழுவால் ஒதுக்கி வைக்கப்பட்டுள்ளார். குறிப்பாக நியூசிலாந்துக்கு எதிரான டெஸ்ட் தொடரில் அவரது செயல்பாடு திருப்திகரமாக இல்லை என்பதை வைத்தே அவர் வெளியேற்றப்பட்டு இருக்கிறார். அதேபோல, ரஜத் படிதாரும் இந்திய அணியில் தனக்கான இடத்தை உறுதி செய்யத் தவறியதால் ஒப்பந்தப் பட்டியலிலிருந்து நீக்கப்பட்டுள்ளார்.

முகேஷ் குமார் சறுக்கல்

வேகப்பந்து வீச்சாளர் முகேஷ் குமார் கடந்த சீசனில் அணியில் இருந்தார். ஆனால் தற்போது அர்ஷ்தீப் சிங், ஹர்ஷித் ரானா போன்ற இளம் வேகப்பந்து வீச்சாளர்கள் சிறப்பாகச் செயல்பட்டு வருவதால், முகேஷ் குமார் பின்தள்ளப்பட்டுள்ளார். இதனால் அவருக்கு ஒப்பந்தம் வழங்கப்படவில்லை. அணியில் தொடர்ச்சியாக இடம்பெறுவது மட்டுமே ஒப்பந்தத்திற்கான அடிப்படைத் தகுதி என்பதை பிசிசிஐ இந்தத் தேர்வின் மூலம் வீரர்களுக்கு உணர்த்தியுள்ளது.